Matteo Salvini

De Wikipedia
Va a: navegá, truvá
Lumbard ucidental Quest articol chì l'è scrivuu in lombard, grafia milanesa.
Matteo Salvini
Matteo Salvini - Trento 2015.JPG
Salvin in del 2015

Segretari Federal de la Liga Nord
In carica
Prencepe del mandad 15 de dicember del 2013
Predecessor Robert Maron

Eurodeputaa
Lejisladure VI, VII, VIII
Grup
parlamentar
Europa di Nazion e di Libertà

Deputaa italian
Lejisladure XVI, XVII
Grup
parlamentar
Lega Nord

Informazion jenerale
Partid politeg Lega Nord
Noi con Salvini
Tendenza politega Popolism de drizza
Euroscetticism
Conservatorism

El Matteo Salvini (Milan, 9 de marz del 1973) l'è on politegh e giornalista italian.
Iscritt a la Lega Nord a partì del 1990, l'ha faa, tra i vari caregh, el consilier comunal a Milan, el deputaa e, al dì d'incoeu, l'europarlamentar. L'è staa anca giornalista in sul giornal La Padania e in su Radio Padania Libera. El 7 de dicember del 2013 l'è staa eleggiuu segretari de la Lega Nord (el terz, despoeu Umberto Bossi e Roberto Maroni) e reconfermaa in del 2017, e l'è 'l leader del moviment Noi con Salvini dal dicember del 2014. Al dì d'incoeu l'è consideraa vun di leader de la drizza italiana e, in general, vun di politegh pussee important del moment.

Biografia[Mudifega | mudìfica 'l sorgènt]

Matteo Salvini l'è nassuu a Milan in del 1973, fioeu de ona casalinga e de on imprenditor. L'ha studiaa in del Licee Clasegh Lissander Manzon, per poeu andà a l'università per studià Storia, ma l'ha mai ciappà la laurea. Quand che 'l seva giovin l'ha frequentaa el center social de mancina Leoncavallo, che l'ha influenzaa fiss i sò idej politegh.

Carrera politega[Mudifega | mudìfica 'l sorgènt]

Primm agn[Mudifega | mudìfica 'l sorgènt]

El Salvini ad on discors di Giovin Padan in del 2006

Da bagaj l'era in del Moviment di Giovin Padan e poeu l'è diventaa segretari de la Lega Lombarda. Ai Elezzion Padan del 1997 l'era candidaa in de la lista di Comunista Padan.

L'è staa Consijee Comunal a Milan dal 1993 al 2012, per poeu vess elegiuu de noeuv in del 2016.

Politega Europea[Mudifega | mudìfica 'l sorgènt]

L'è staa eleggiuu in del Parlament Europee in la Region Nord-Ovest e l'è 'ndaa in del Grupp Messedaa. In del 2009 l'è andaa in del grupp Europa de la Libertaa e de la Democrazia, l'è 'ndaa foeura in del 2014. In del 2015 l'ha fondaa, insema al Front National de la Marine le Pen, el noeuv grupp Europa di Libertaa e di Nazion. L'è anca el VicePresident de la delegazion italiana al Parlament Europee.

L'ha tolt part ai commission sanità, ambient e sicurezza del mangià e a quella de la coltura e educazion. L'è staa anca member de la collaborazion in tra l'Union Europea e 'l Cile. El s'è dimettuu in del 2006.

L'è staa rieleggiuu in del 2009, e l'ha tolt part ai commission Protezion del Comprô e Mercaa Intern e a la delegazion per la Corea e l'India. L'è sostituu per la Commission Mercaa Forest e per i relazion cont el Sud-Africa.

Capp de la Lega Nord[Mudifega | mudìfica 'l sorgènt]

Manifestazion a Turin

El 7 de dicember del 2013 el Salvini, cont el support del Roberto Maroni e del Flavio Tosi, l'è staa elegiuu segretari de la Lega Nord, despoeu avè battu ai primari el Umberto Bossi con l'82% di vot. La settimana dòpp el Congress de Turin l'ha ratifegaa la soa candidadura. Lung la soa segreteria el Partii l'ha ciappaa ona vision euroscettega, soratutt in di confront de l'Euro, ciamaa dal Salvini "crimen contra l'umanità". Di Elezzion Europee del 2014 l'ha scominciaa a collaborà con la Marine Le Pen, capa del Front National e cont el Geert Wilders, capo del Partii de la Libertaa olandes. I sò lianz e la soa politega europea hinn staa criticaa sossenn da l'Umberto Bossi, che 'l ha ricordaa al Salvini i sò radis de mancina, e anca dal Flavio Tosi, che 'l reppresentava l'ala centrala del Partii, a favor de l'Union Europea.

In del April 2014 el Salvini el presenta el noeuv logo per i Elezion Europee, con scrivuu "Basta Euro" inscambi de "Padania", che 'l reppresenta ben la noeuva politega euroscettega e che la voeur portà l'Italia foeura da la Zona Euro. In quej elezion la Lega l'ha mittuu in di sò candidaa anca i reppresentant di olter moviment autonomist e anti-Euro, 'me Die Freiheitlichen, partii secessionista del Sud Tirol.

Ai elezion Europee l'ha ciappaa el 6,2% de vot, e donca l'ha nominaa 5 Deputaa. El resultaa l'è staa peggior di precendent Elezion Europee (-4%), ma mej di ultim elezion generai (+2.1). La Lega l'è rivada terza in Veneto cont el 15.2%, innanz ai partii nassu dal vegg PdL 'me Forza Italia, ma el Flavio Tosi l'ha ciappaa pussee vot del Salvini, e l'è staa ciappaa 'me segn che minga tutta la LN l'è unida in di idej euroscettegh del Salvini. Il Lombardia la Lega l'è rivada quarta, cont el 14.6 de vot. In quij elezion la Lega l'ha perduu el Piemont, che l'è diventaa a guida del PD del Massimo Chiamparino ma ha eleggiu el Massimo Bitonci sindegh de Padoa, loeugh tradizionalment de mancina.

El Congress de la Lega a Padoa del luj 2014 l'ha approvaa i sò idej politegh, e soratutt l'ideja de creà on partii politegh gemell in del Sud Italia e in di Isol. I Elezzion Regionai de l'Emilia Romagna han daa a la Lega Nord el 19.4% di vot, e l'è diventaa el segond partii de la Region e l'ha superaa de bon Forza Italia, dand a la Lega la possibilitaa de divegnì la guida del centerdrizza italian. In del dicember l'è staa lanziaa el partii gemel Noi con Salvini e 'l Salvini l'ha ciappaa tanta popolariraa, tant che in d'on sondagg ipsos del 28 de febrar del 2015 l'ha ciappaa el 33% di preferenz, e l'ha "cementaa la soa posizzion de moviment in cressita", han dii lor.

In del Marz del 2015 despoeu ona litt in tra i dò esponent pussee important de la Lega in Veneto, el Luca Zaia (sostignuu del Salvini) e 'l Flavio Tosi, el Tosi l'è staa mandaa via da la carega de Segretari Federal in Veneto e dal Partii. A bon cunt i elezion in Veneto hinn staa on success, cont el Zaia eleggiuu che, in tra la soa lista personala e i sò partii l'ha ciappaa pussee del 40%.

El Partii l'è rivaa second in Liguria cont el 22.3%, second in Toscana cont el 16.2%, terz in di March cont el 13.0% and terz in Umbria cont el 14.0%. La Lega Nord l'è mai rivada inscì in volt in quij cinch region.

Ai elezzion milanes del 2016 el vegn eleggiuu de noeuv al Consili Comunal, e l'è 'l segond pussee eleggiuu despoeu la Mariastella Gelmini, anca se Forza Italia l'ha ciappaa el doppi di vot de la Lega Nord. Inscambi, el partii Noi Con Salvini l'ha ciappaa circa el 2-5% in di comun del Sud Italia.

El segond incaregh[Mudifega | mudìfica 'l sorgènt]

L'ha scernuu de recandidàss a capo de la Liga Nord in di primari del 2017 contra l'assessor lombard Gianni Fava, contrari ai sò idej nazionalista ed euroscettich.

L'ha venciuu de tant 'sti elezion primari cont el 82,7% e l'ha subit nonziaa 'na ligna dura contra di dissident e l'espulsion per quej che van foeura de la vos del partii.

Umberto Bossi l'ha dii de valutà l'addio al partii dopo de la soa vittoria, ma poeu l'è restaa in del partii, anca se 'na part di sò sostenitor l'ha fondaa Grande Nord.

A bon cunt i elezion ministrativ del 2017 hinn staa on success per el center-drizza unii, che l'ha ciappaa città comé Genoa e Sest San Gioann, ma la Liga indeperlee l'ha perduu Padoa e l'ha faa nissun resultaa important al Sud.

A luj del 2017 el se s'cera contra di vaccinazion obbligatori voruu del Governo Gentiloni.

El se scontra anmò cont el Bossi quand che a la manifestazion de Pontida del 2017 el fa parlà no, e anca li el Bossi l'ha vist la situazion 'me on invitt a sortì de la Liga.

Idej politegh[Mudifega | mudìfica 'l sorgènt]

El Salvini l'è assee euroscettegh e contra la moneja Euro, che ciama "crimen contra l'umanitaa". L'è anca contra a l'immigrazion clandestina, che per lù l'è vun di problema pussee important de l'Italia.

In del settor economegh l'è a favor de la flat tax, de tajà i tass e del federalismo fiscal.

In di tema sociai l'è contra al matrimoni e a l'adozzion gay, anca se 'l sostegn di form de tutela di union de facto, l'è a favor de dervì i borej e donca regolamentà la prostituzion. L'è anca contrari a la gestion europea d'incoeu di fenomen migratori e tendenzialment a favor de sarà i frontee.

In politega foresta l'è contra i sanzion economegh a la Russia e l'è a favor de dervì l'economia ai paes orientaj e de l'Est Europa.

In di rapport politegh forest el sostegn tipicament di formazion de drizza popolista ed euroscettega, per esempi l'ha supportaa el Donald Trump ai elezion presidenziai di Stat Unii del 2016, la Marine Le Pen in di elezion presidenziai in Franza del 2017 e 'l Norbert Hofer in di elezion presidenziai in l'Austria del 2016, oltra che 'l Geert Wilders in di legislativ olandes.

Vita privada[Mudifega | mudìfica 'l sorgènt]

In del 2002 el se marida con la Fabrizia Ieluzzi, e 'l gh'ha on fioeu: El Federigh, in del 2003. Despoeu se separen e divorzien e 'l Salvini la gh'ha ona noeuva fioeula, la Mirta, con la Giulia Martinelli in del 2012.

In del 2015 el giornal de spetegolezz Novella 2000 el dis che 'l Salvini el gh'ha ona storia con la Elisa Isoardi, poeu confermada. In l'estad del 2017 i giornai han parlaa de 'n tradiment e de 'na crisi in tra i du.

El Salvini l'è pròppi on gran tifos del A.C. Milan.

Vos correlaa[Mudifega | mudìfica 'l sorgènt]

Ligamm da foeura[Mudifega | mudìfica 'l sorgènt]