Matteo Salvini

De Wikipedia
Lumbard ucidental Quest articol chì l'è scrivuu in lombard, grafia milanesa.
Vedrína
Vedrina
Vedrina
Quest articol chì l'è in la Vedrina de la Wikipedia Vedrina
Matteo Salvini
Salvin in del 2019

Minister di Instrastruttur de la Republega Italiana
In carica
Prencepe del mandad 22 de ottover 2022
Prim minister Giorgia Meloni
Predecessor Enrico Giovannini

Minister de l'Intern de la Republega Italiana
Ol durar del mandad 1 de giugn 2018 –
4 de settember 2019
Prim minister Giuseppe Conte
Predecessor Marco Minniti
Sucessor Luciana Lamorgese

Vicepresident del Consili di Minister
Ol durar del mandad 1 de giugn 2018
22 de ottover 2022 –
4 de settember 2019
In carega
Prim minister Giuseppe Conte
Giorgia Meloni
Vice prim minister insemma a Luigi Di Maio
Insemma a l'Antonio Tajani
Predecessor Angelino Alfano
Nissun

Deputaa italian
Lejisladure XVI, XVII
Grup
parlamentar
Lega Nord
Circoscrizion Lombardia 1

Senator de la Republega
Lejisladure XVIII
XIX
Grup
parlamentar
Liga per el Salvin Premier
Circoscrizion Calabria/Lazzi
Puja

Eurodeputaa
Lejisladure VI, VII, VIII
Grup
parlamentar
Europa di Nazion e di Libertà
Circoscrizion Italia Nord Ocidental

Informazion jenerale
Partid politeg Lega Nord
Tendenza politega Popolism

Euroscetticism
Conservatorism social
Socialism de destra
Post-keynesism
In precedenza:
Comunism
Independentism

Profession Dirigent de partii e giornalista
Firma Firma de Matteo Salvini

El Matteo Salvini (in lombard Mattee Salvin, Milan, 9 de marz del 1973) l'è on politegh e giornalista italian, minister di infrastruttur e vizepremier in del governo Meloni del 22 de ottober 2022 e, prima, de l'Intern dal 1 de giugn 2018 al 4 de settember del 2019, in del governo Conte I

Iscritt a la Lega Nord a partì del 1990, l'ha faa, tra i vari caregh, el consilier comunal a Milan, el deputaa e, al dì d'incoeu, l'europarlamentar. L'è staa anca giornalista in sul giornal La Padania e in su Radio Padania Libera. El 7 de dicember del 2013 l'è staa eleggiuu segretari de la Lega Nord (el terz, despoeu Umberto Bossi e Roberto Maroni) e reconfermaa in del 2017, e l'è 'l leader del moviment Noi con Salvini dal dicember del 2014. Al dì d'incoeu l'è retegnuu vun di leader de la destra italiana e, in general, vun di politegh pussee important del moment.

Biografia[Modifega | modifica 'l sorgent]

Salvini l'è nassuu a Milan in del 1973, fioeu de ona casalinga e de on imprenditor. L'ha studiaa in del Licee Classich Lissander Manzon, per poeu andà a l'università per studià Storia, ma l'ha mai ciappà la laurea. L'ha dii che quand l'era giovin l'ha frequentaa el center social de sinistra Leoncavallo, robba che però 'n quajvun l'ha mittuu 'n dubi, che l'ha influenzaa fiss i sò idej politegh.

Carrera politega[Modifega | modifica 'l sorgent]

Primm agn[Modifega | modifica 'l sorgent]

El Salvini ad on discors di Giovin Padan in del 2006

Da bagaj l'era in del Moviment di Giovin Padan e poeu l'è diventaa segretari de la Lega Lombarda. Ai Elezion Padan del 1997 l'era candidaa in de la lista di Comunista Padan.

In del 1999 a l'è condanaa a 30 di de preson, cont la condizional, per oltragg a publich offizial per avè lanziaa di oeuv al Massimo D'Alema.

L'è staa Consijee Comunal a Milan dal 1993 al 2012, per poeu vess elegiuu de noeuv in del 2016, ma el molla in del 2018, quand che 'l deventa minister, e 'l se candida minga in del 2021.

In del roeul de consejee comunal l'ha defenduu 'l center social Leoncavallo del sgomber che l'aveva ordenaa el sindegh leghista Formentini.

Politega Europea[Modifega | modifica 'l sorgent]

L'è staa eleggiuu in del Parlament Europee in la Region Nord-Ovest e l'è 'ndaa in del Grupp Messedaa. In del 2009 l'è andaa in del grupp Europa de la Libertaa e de la Democrazia, l'è 'ndaa foeura in del 2014. In del 2015 l'ha fondaa, insema al Front National de la Marine le Pen, el noeuv grupp Europa di Libertaa e di Nazion. L'è anca el VicePresident de la delegazion italiana al Parlament Europee.

L'ha tolt part ai commission sanità, ambient e sicurezza del mangià e a quella de la coltura e educazion. L'è staa anca member de la collaborazion in tra l'Union Europea e 'l Cile. El s'è dimettuu in del 2006.

L'è staa rieleggiuu in del 2009, e l'ha tolt part ai commission Protezion del Comprô e Mercaa Intern e a la delegazion per la Corea e l'India. L'è sostituu per la Commission Mercaa Forest e per i relazion cont el Sud-Africa.

Capp de la Lega Nord[Modifega | modifica 'l sorgent]

Manifestazion a Turin

El 7 de dicember del 2013 el Salvini, cont el support del Roberto Maroni e del Flavio Tosi, l'è staa elegiuu segretari de la Lega Nord, despoeu avè battu ai primari el Umberto Bossi con l'82% di vot. La settimana dòpp el Congress de Turin l'ha ratifegaa la soa candidadura. Lung la soa segreteria el Partii l'ha ciappaa ona vision euroscettega, soratutt in di confront de l'Euro, ciamaa dal Salvini "crimen contra l'umanità". Di Elezzion Europee del 2014 l'ha scominciaa a collaborà con la Marine Le Pen, capa del Front National e cont el Geert Wilders, capo del Partii de la Libertaa olandes. I sò lianz e la soa politega europea hinn staa criticaa sossenn da l'Umberto Bossi, che 'l ha ricordaa al Salvini i sò radis de sinistra, e anca dal Flavio Tosi, che 'l reppresentava l'ala centrala del Partii, a favor de l'Union Europea.

In del April 2014 el Salvini el presenta el noeuv logo per i Elezion Europee, con scrivuu "Basta Euro" inscambi de "Padania", che 'l reppresenta ben la noeuva politega euroscettega e che la voeur portà l'Italia foeura da la Zona Euro. In quej elezion la Lega l'ha mittuu in di sò candidaa anca i reppresentant di olter moviment autonomist e anti-Euro, 'me Die Freiheitlichen, partii secessionista del Sud Tirol.

Ai elezion Europee l'ha ciappaa el 6,2% de vot, e donca l'ha nominaa 5 Deputaa. El resultaa l'è staa peggior di precendent Elezion Europee (-4%), ma mej di ultim elezion generai (+2.1). La Lega l'è rivada terza in Veneto cont el 15.2%, innanz ai partii nassu del vegg Popol de la Libertà 'me Forza Italia, ma el Flavio Tosi l'ha ciappaa pussee vot del Salvini, e l'è staa ciappaa 'me segn che minga tutta la LN l'è unida in di idej euroscettegh del Salvini. In Lombardia la Lega l'è rivada quarta, cont el 14.6% de vot. In quij elezion la Lega l'ha perduu el Piemont, che l'è diventaa a guida del PD del Massimo Chiamparino ma ha eleggiu el Massimo Bitonci sindegh de Padoa, loeugh tradizionalment de sinistra, roeul perduu poeu in del 2017, dopo che Forza Italia l'ha mollaa la maggioranza.

El Congress de la Lega a Padoa del luj 2014 l'ha approvaa i sò idej politegh, e soratutt l'ideja de creà on partii politegh giomell in del Sud Italia e in di Isol. I Elezion Regionai de l'Emilia Romagna han daa a la Lega Nord el 19.4% di vot, e l'è diventaa el segond partii de la Region e l'ha superaa de bon Forza Italia, e l'ha daa a la Lega la possibilitaa de divegnì la guida del center-destra italian. In del dicember l'è staa lanziaa el partii giomell Noi con Salvini e 'l Salvini l'ha ciappaa tanta popolariraa, tant che in d'on sondagg ipsos del 28 de febrar del 2015 l'ha ciappaa el 33% di preferenz, e l'ha "cementaa la soa posizion de moviment in cressita", han dii lor.

In del Marz del 2015 despoeu ona litt in tra i dò esponent pussee important de la Lega in Veneto, el Luca Zaia (sostignuu del Salvini) e 'l Flavio Tosi, el Tosi l'è staa mandaa via da la carega de Segretari Federal in Veneto e dal Partii. A bon cunt i elezion in Veneto hinn staa on success, cont el Zaia eleggiuu che, in tra la soa lista personala e i sò partii l'ha ciappaa pocch pussee del 50%.

El Partii l'è rivaa second in Liguria cont el 22.3%, second in Toscana cont el 16.2%, terz in di March cont el 13.0% and terz in Umbria cont el 14.0%. La Lega Nord l'è mai rivada inscì in volt in quij cinch region.

Ai elezion milanes del 2016 a l'è eleggiuu de noeuv al Consili Comunal, e l'è 'l segond pussee votaa dòpo de la Mariastella Gelmini, anca se Forza Italia l'ha ciappaa el doppi di vot de la Lega Nord. Inscambi, el partii Noi Con Salvini l'ha ciappaa circa el 2-5% in di comun del Sud Italia.

El segond incaregh[Modifega | modifica 'l sorgent]

Logo de la Lega per Salvini Premier inscì 'me presentaa in Gazzetta Offiziala ma minga doperaa al vot

L'ha scernuu de recandidàss a capo de la Liga Nord in di primari del 2017 contra l'assessor lombard Gianni Fava, contrari ai sò idej nazionalista ed euroscettich.

L'ha venciuu de tant 'sti elezion primari cont el 82,7% e l'ha subit nonziaa 'na ligna dura contra di dissident e l'espulsion per quej che van foeura de la vos del partii.

Umberto Bossi l'ha dii de valutà l'addio al partii dopo de la soa vittoria, ma poeu l'è restaa in del partii, anca se 'na part di sò sostenitor l'ha fondaa Grande Nord.

A bon cunt i elezion ministrativ del 2017 hinn staa on success per el center-destra unii, che l'ha ciappaa città comé Genoa e Sest San Gioann, ma la Liga indeperlee l'ha perduu Padoa e l'ha faa nissun resultaa important al Sud.

A luj del 2017 el se s'cera contra di vaccinazion obbligatori voruu del Governo Gentiloni.

El se scontra anmò cont el Bossi quand che a la manifestazion de Pontida del 2017 el fa parlà no, e anca li el Bossi l'ha vist la situazion 'me on invitt a sortì de la Liga.

Dal november 2017 i sondagg, però, vista la noeuva descesa in camp del Silvio Berlusconi, dann la Lega semper pussee in bass e 'n cress costant per Forza Italia, che metten assee in dubbi el roeul de Salvini 'me capo del center-destra.

In di elezion politegh italian del 2018 l'è a capo de la lista de center-destra Liga per Salvini Premier, fàda su de la Liga Nord, de Noi con Salvini e de 'na quaj altra formazion pussee piscinina comè 'l Moviment Nazional per la Sovranità cont l'obietiv de vincc la leadership del center-destra e 'vègh la fiducia per deventà President del Consili di Minister.

Attacch a Macerata[Modifega | modifica 'l sorgent]
Per savenn pussee, varda l'articol Sparatoria de Macerata.
Salvini in Piazza Domm a Milan el 24 de febrar 2018

El 3 de febrar 2018 el Luca Traini el terrorizza Macerata per or e 'l sbara a 6 negher, a on bar e a la sed del Partii Democrategh per vendetta dopo che in la città ona tosa cont di problema de droeuga, Pamela Mastropietro, a l'è stada mazzada e poeu squartada de on grupp de nigerian.

El vegn foeura poeu che l'omm, de estrema destra, a l'éra candidaa cont la Liga a Corridonia in del 2016 e che l'ha faa anca el member de la sicurezza in d'on sò comizzi.

El Salvini l'ha daa la colpa de l'attacch al Partito Democratico, che l'avaria faa tension sociala in Italia che la mena a on sconter social, e l'ha dii che vun che 'l spara a l'è semper on delinquent.

I sò deciarazion hinn staa sossenn criticaa e vist 'me ona manéra de fà propaganda in su 'n att violent e de sbassà la responsabilità del sò partii in la candidatura de l'omm.

La fin de l'independentism[Modifega | modifica 'l sorgent]

A febrar 2018 l'ha deciaraa che la Liga l'ha bandonaa per semper la secession, de lu retegnuda inadatta al 2018.

El 9 de febrar a l'è vittima de on important attacch informatich ai sò infrastruttur faa de LulzSecITA che han robaa circa 20 GB de dacc e pussee de 70'000 e-mail, publegaa poeu el 22.

El primaa in del center-destra[Modifega | modifica 'l sorgent]

Salvini insemma a Berluscon e a la Meloni al Quirinal

In di elezion politegh italian del 2018 la Liga la riva prima in la coalizion de center-destra, che però la riva nò a la maggioranza, e 'l Moviment 5 Stell l'è el partii pussee votaa. La pupart di segg a hinn tolt al Nord, cont on resultaa medi del 6% al Sud, cont l'eccezion de la Sardegna con circa el 11%. El se dimett dònca de Consiliee Comunal a Milan, roeul ciappaa in del 2016.

L'è recognossuu di forz del center-destra 'me sò leader e a la segonda consultazion cont el Sergio Mattarella e a quej cont la presidenta del Senad Maria Elisabetta Alberti Casellati el s'è presentaa cont el Berlusconi e la Meloni 'me capo delegazion.

El ministeri[Modifega | modifica 'l sorgent]

Per savenn pussee, varda l'articol Governo del Cambiament.

El 1 de giugn el giura 'me minister de l'Intern del governo de coalizion faa cont el Moviment 5 Stell e guidaa del Giuseppe Conte, professor universitari.

El 25 de agost a l'è indagaa de la Procura de Agrigento per el sò roeul in la vicenda de la nav Diciotti de la Guardia Costiera, che l'è fada attaccà a Catania ma i sò immigraa a hinn minga faa sbarcà e dònca a l'è mittuu in del register di indagaa per sequester de persona, abus d'offizi e arrest illegal, insemma al Capo de Gabinett del Viminal. Per 'sti accus la Procura l'ha domandaa l'archiviazion ma el Tribunal di Minister, el 24 de genar 2019, el ordena de andà innanz contra de luu. El 19 de febrar 2019 a l'è salvaa del process de la Gionta di Autorizzazion del Senad, decision confermada del pien del Senad el 20 de marz 2019.

In del luj 2019 el vegn foeura on scandol politegh per el sò partii, che l'è accusaa de avè trattaa cont la Russia per avègh di fond illegai. A bon cunt però el Salvin a l'è minga indagaa o alter, ma a l'è ciamaa a parlà in Parlament, ma el se presenta no.

El 8 de agost del 2019 el decid, dòpo che 'l governo el gh'ha avuu 'n mugg de tension, de s'cepàll e de presentà 'na mozion de sfiducia al Conte.

Tornà a l'opposizion[Modifega | modifica 'l sorgent]

El 4 de settember del 2019 el torna a l'opposizion: El Governo Conte II el scerniss la Luciana Lamorgese 'me ministra al sò post.

El 20 de sginee del 2020 la Gionta di autorizzazion del Senad, cont on vot determinant di leghista, degià che la maggioranza l'éra 'ndada no a votà, la decid de insubì al Senad de mandàll a process per el cas de la nav Gregoretti che lu l'eva tegnuu foeura di port italian per on poo. L'ha lanziaa dònca 'na campàgna per el digiun in sò favor, che l'ha interrot dòpo du dì perchè l'è staa minga bon de resist ai tortellitt.

In del sgenee del 2020 el sostegn la corsa ai regionai de l'Emilia-Romagna de la Lucia Borgonzoni e 'l nass in risposta on moviment civich e popolista, quell di Sardell, ma a la fin a l'è elegiuu l'avversari Stefano Bonaccini. La soa coalizion elegg però la Jole Santelli 'me presidenta de la Calabria.

El 12 de fevree el Senad l'autorizza i magistraa a processàll per sequester de personna per el cas de la nav Gregoretti.

Durant de la crisi del COVID-19 l'ha criticad l'esecutiv de center-sinistra, per lu poch trasparent, assee centralista e nemis de l'imprenditoria.

El governo Draghi[Modifega | modifica 'l sorgent]

Delegazion de la Liga del Mattarella, in di consultazion per el Draghi

Cont el borlà del governo Conte II, anca se in principi contrari, el scerniss poeu de sostegnì el governo Draghi, indova che l'è no minister.

Cont i elezion del president de la Republega del 2022, el sostegn che 'l Draghi el gh'ha de restà a Palazzi Chigi, inscì de permett a la coalizion de restà in pè e de fà i riform che gh'è de besogn, e insemma a tutt el center-destra l'insubiss el Silvio Berlusconi 'me president.

In del luj del 2022, dopo che 'l Moviment 5 Stell l'ha vert una crisi de governo, anca i parlamentar de Liga e Forza Italian hinn andaa foeura de l'aula, a portàll ai dimission. Se va donca a votà el 25 de settember del 2022, in 'sti elezion la coalizion de center-destra la ciappa la maggioranza, ma la Liga la riva a men del 10%, intorna al 8%, roba che la mena a 'n poo de rebellott in del moviment, cont el nass de 'n Comitaa del Nord, dent del partii, guidaa del Bossi, con l'obietiv de ciappà pussee de vot di autonomista de l'Altitalia.

El governo Meloni[Modifega | modifica 'l sorgent]

'Me partner de minoranza a l'è faa vizepremier e minister di infrastruttur in del governo Meloni, menter el Piantadosi, prefett che l'aveva juttaa a fà el decret sigurezza, a l'è mittuu minister di interni.

Idej politegh[Modifega | modifica 'l sorgent]

I idej politegh del Salvini e del sò partii, despess ciamaa salvinism o salvinomics, a hinn ispiraa principalment al popolism e ghe gionten tant di element de destra, soratutt in del camp social e in su l'immigrazion, quant de sinistra, soratutt in l'economia, anca se quand che se parla di tass ghe va dree a 'na vision pussee liberala.

Economia[Modifega | modifica 'l sorgent]

L'ideja politega salvinista la se fonda in sui ideh del statalism e del post-keynesism, 'me el sostegnì de la necessità di investiment publegh per el cress e la nazionalizzazion di impres che fann no i interess de l'Italia, che voeuren andà via del Paes o che hinn in difficoltà, ma la gionta di element de la tradizion liberista 'me la flat tax, de luu voruda al 15%, la deregolamentazion e la libertà de scerna in materia de scoeula, e del protezionism del Made in Italy, e la lotta ai delocalizzazion, roba che la mena a 'na generala contrarietà al liber mercaa e al liber scambi

Società[Modifega | modifica 'l sorgent]

El salvinism a l'è conservator social, contrari a l'abort, ai matrimoni e adozion omosessuai e dubbios anca in sui union civil, soratutt in di fasc pussee religios. El Salvini, deperlu, el sostegn di formi de tutela per i union de facto gay.

El Salvini l'ha espress di posizion a favor del sens de comunità in di regimm totalitari 'me quell de la Corea del Nord e l'insubiss di mesur de massificazion 'me la coscrizion di giovin in di Forz Armaa.

L'è anca assee ligaa al concett de "radis cristian" de la società, de respettà e applicà.

Immigrazion e Islam[Modifega | modifica 'l sorgent]

El salvinism a l'è assee dur in su la lotta a l'immigrazion clandestina, soratutt quèlla del Mediterraneo, che l'è deventada vun di argoment principal de la Liga in di elezion politegh italian del 2018 e l'è scettegh in su la possibilità di corrent pussee conservativ de l'Islam de adattàss a la Costituzion italiana.

Salud[Modifega | modifica 'l sorgent]

El Salvini el se deciara a favor di vaccinazion ma contra l'obbligh vaccinal e l'ha mostraa pussee de 'na voeulta solidarietà a sociazion antivaccinista e a di presunt danegiaa de vaccin.

Giustizia[Modifega | modifica 'l sorgent]

El Salvini a l'è contrari di scont de pena e l'è a favor de la castrazion chimica per i pedofil, i stupraator e i maniach conclamaa. L'è contrari ai limitazion a la polizia e al riatt de tortura.

Forma de Stat[Modifega | modifica 'l sorgent]

A nivell territorial a l'è autonomista e a favor di investiment al Sud, dopo on period de ciar antimeridionalism. Independentista finna al 2014, in del 2018 l'ha deciaraa la soa contrarietà a l'independentism.

Prima de andà al governo contrari a l'esistenza di Prefett, ch'eren vist 'me segn del poder centralista del Stat, al governo l'ha inveci sostegnuu la necessità de dàgh pussee poder.

Politega foresta[Modifega | modifica 'l sorgent]

El Salvini l'ha espress vari formi de euroscetticism, sia dur e a favor de la sortida de la moneda unega e de l'Union, sia pussee morbid, cont domà 'na volontà de reforma de l'Union.

A l'è deciaratament contrari ai sanzion daa de l'Europa a la Russia.

Rappòrt cont i politegh forèst[Modifega | modifica 'l sorgent]

El sostegn tipicament di formazion de destra popolista ed euroscettega, per esempi l'ha supportaa el Donald Trump ai elezion presidenziai di Stat Unii del 2016, la Marine Le Pen in di elezion presidenziai in Franza del 2017 e 'l Norbert Hofer in di elezion presidenziai in l'Austria del 2016, oltra che 'l Geert Wilders in di legislativ olandes.

Controversij[Modifega | modifica 'l sorgent]

Unità d'Italia[Modifega | modifica 'l sorgent]

In del 2009 a la Festa de Pontida l'ha intonaa di cor de stadi offensiv contra di napoletan che han faa indignazion in tutt el mond politich, anca in di sò liaa.

L'ha anca espress pussee de 'na voeulta el sò distacch de la bandera italiana: In del 2011 l'ha dii de 'vègh a cà soa domà la bandiera de Milan e quella lombarda e de trovà che 'l Tricolor el fuss domà la bandera de la squadra del folball, che lu el tifava no.

Immigrazion[Modifega | modifica 'l sorgent]

El 7 de magg 2009, in occasion de la presentazion di candidaa de la Liga ai elezion de la Provincia l'insubiss de fà di vagon de la metropolitana domà per donn, per lu minasciaa di extracomunitari, e di post reservaa ai milanes. L'è staa criticaa sia del Partii Democrategh che de el Popol de la Libertà, e 'l President de la Commission Sociala del Comun, Aldo Brandirali del PdL, l'ha dii che l'unica manera per fàll saria de pontà ona stella in sul pecc di gent, on reciam a l'Olocaust, e l'ha dii che 'l Salvini, pur de ciappà vot, a l'è pront a deventà disuman.

In del magg 2013, dopo che on imigraa l'ha mazzaa trè personn cont on piccon, l'ha criticaa i politich d'immigrazion del governo Letta e soratutt la ministra Cecile Kyenge e l'ha dii che i "clandestitt che voeuren regolarizzà mazzen a picconaa" e che "i vertur a hinn on invit a la delinquenza". L'è staa criticaa assee del PD e anca de la commissaria europea Cecilia Malmström, che l'ha definii razzista.

El 15 de agost 2016 l'ha dii a la festa estiva de la Liga a Pont de Legn che boeugna "nettà i città di immigraa" e "dà man libera a la Polizia". Oltra a l'indignazion de la politica anca i sindacaa de Polizia s'hinn indignaa e l'è staa accusaa de vorè fà ona nettada etnica.

Salvini, anca se l'ha mai citaa direttament, l'è retegnuu on sostenitor de l'esistenza del pian Kalergi, pian inventaa de on negazionista che 'l afferma che i elite voeuren fà ona sostituzion etnica in Europa.

Diritt gay[Modifega | modifica 'l sorgent]

El Salvini el s'è s'ceraa contra di matrimoni e di adozion gay e l'ha domandaa de retirà di bibliotech de Milan on liber che 'l parlava de ona familia gay, deciarand che se la società la scomincia a considerai normai l'è finida.

Vaccinazion[Modifega | modifica 'l sorgent]

El Salvini, senza nissuna competenza immunologica, l'ha diciaraa pussee de 'na voeulta che i vaccinazion a hinn pericolos e che se pòden no fà segond el pian vaccinal italian e l'ha ricevuu el biasim di scienziaa italian, soratutt del famos divulgator Roberto Burioni.

Europa[Modifega | modifica 'l sorgent]

El Salvini l'ha espress el sò apprezzament per l'Euro, ma domà per el Nord Italia, e l'ha paragonaa el Sud a la Grecia, e l'ha domandaa che l'Europa la gh'avess el poder politich de lassà foeura de l'Euro i region pover.

In del 2013 l'ha insubii che i Sindegh de la Liga fasessen resistenza civil ai misur impost de l'Europa, che l'ha paragonaa pussee de 'na voeulta a l'Union Sovietega o ai Gulag.

Ignoranza matematica[Modifega | modifica 'l sorgent]

In d'on post del 27 de april del 2018 el Salvini el dis de avè mai capii nagòtt di disequazion e 'l cas a l'è deventaa viral in su la red dopo che 'l partii per la scienza W la Fisica l'ha publegaa on comment a tema e la notizia l'è rivada anca a Porta a Porta, indova el Bruno Vespa l'ha dii de savè nanca sa l'è 'na disequazion.

Independentism[Modifega | modifica 'l sorgent]

El Salvini a l'è despess accusaa de 'vègh on rapport minga ciar e ambigov cont l'independentism. Segretari de la Liga Nord per l'independenza de la Padania elegiuu cont el motto "Futur l'è independenza" in del 2013 e autor de on convegn di independentista de tutta l'Europa in del 2014 el scomincia a in graziàss i nazionalista italian cont di manifest che, cont ona citazion de la Leggenda del Piave, disen "el passa no el forestee" e a la fin de l'ann el fa su Noi con Salvini, moviment destinaa ai meridionai dei sò idej.

Per quatter agn el ciappa mai 'na posizion netta e l'ha preferii restà in l'incertezza e varià i sò argoment a segonda del destinatari del discors, domà in del 2018 el rinnega pubblicament, senza mollà la carica de Segretari de la Liga, l'independentism.

In sul referendum per l'independenza de la Catalogna del 2017 l'ha espress ona posizion contraria e l'ha retegnuu l'att 'na forzadura, dopo agn de support a la causa catalana, e l'ha scatenaa accus de la part independentista de la Liga, che l'ha anca vist fredd e minga interessa ai referendum autonomista de Lombardia e Veneto, de lor retegnuu lesiv del sò progett nazionalista e di sò liaa. El Robert Maron, dòpo di deciarazion contrari de la Giorgia Meloni, l'ha minasciaa 'na crisi de governo regional, evitada grazia al facc che Fredej d'Italia lombard a l'éra assee a favor de la consultazion.

Vita privada[Modifega | modifica 'l sorgent]

In del 2002 el se marida con la Fabrizia Ieluzzi e gh'han on fioeu, Federico, in del 2003. Despoeu se separen e divorzien e 'l Salvini la gh'ha ona noeuva fioeula in del 2012, la Mirta, con la Giulia Martinell.

In del 2015 el giornal de spetegolezz Novella 2000 el dis che 'l Salvini el gh'ha ona storia con la Elisa Isoardi, poeu confermada. In l'estad del 2017 i giornai han parlaa de 'n tradiment e de 'na crisi in tra i du, e l'amor el finiss on quaj mes dopo. Dopo el se mett insemma a la fioeula del Denis Verdini.

El Salvini l'è pròppi on gran tifos del A.C. Milan.

Oeuver[Modifega | modifica 'l sorgent]

  • Matteo Salvini, Secondo Matteo. Follia e coraggio per cambiare il Paese, Milano, Rizzoli, 2016. 8817088900

Riferiment[Modifega | modifica 'l sorgent]

Vos correlaa[Modifega | modifica 'l sorgent]

Ligamm da foeura[Modifega | modifica 'l sorgent]