Elezion politegh italian del 2018

De Wikipedia
Lumbard ucidental Quest articol chì l'è scrivuu in lombard, grafia milanesa.
Elezion politegh italian del 2018
Stat Bandera de Italia Italia
Data 4 de marz 2018
Lejisladura XVIII legislatura
President del Consili de prima
Paolo Gentiloni
2013 2022

I Elezion politegh italian del 2018 gh'è staa el 4 de marz del 2018 per renoeuvà i dò ram del Parlament italian: Cambra di Deputaa e Senad de la Republica dopo del desligament faa del President Sergio Mattarella el 28 de dicember 2017, pocch prima de la fin naturala prevista per el 15 de marz 2018.

El vot, in contemporanea cont el vot lombard e lazial, l'è staa regolaa de l'inscì ciamaa Rosatellum Bis.

Han vist 'n affluenza del 72,93% a la Cambra e 'l 72,99% al Senad: el primm partii a l'è staa el Moviment 5 Stell cont el 32% ma la coalizion de center-destra l'è rivada al 37%.

Sistema de vot[Modifega | modifica 'l sorgent]

Per savenn pussee, varda l'articol Legg elettorala italiana del 2017.

El sistema elettoral de 'sta elezion el sarà l'inscì ciamaa "Rosatellum Bis", del nomm del proponent Ettore Rosato, che la sostituiss l'Italicum per la Cambra di Deputaa e 'l Consultellum per el Senad de la Republica.

El sistema, mist, el preved che:

  • El 37% di scagn (232 a la Cambra e 116 al Senad) hinn assegnaa cont on sistema uninominal senza ballottagg
  • El 61% di scagn (386 e 193) hinn daa in proporzion ai list che han superaa el sbarrament, cont di listitt plurinominai
  • El 2% (12 e 6) a hinn per el vot di italian a l'ester

Espression del vot[Modifega | modifica 'l sorgent]

Scheda elettorala

La scheda elettorala a l'è unica sia per la quota proporzionala sia per quella maggioritaria: A gh'è donca sia el nomm del candidaa uninominal sia i list a lu conligaa, cont ona brev lista plurinominal. A l'è mia ammess el vot desgiontaa.

A l'è donca possibil votà legittimament in trè maner:

  • Cont ona cros in sul candidaa uninominal: Se l'è supportaa domà de 'na lista el vot el sarà estenduu a la lista, se l'è in coalizion el vot l'è sparti proporzionalment.
  • Cont ona cros in su 'na lista, e 'l vot el se estend automaticament al candidaa uninominal
  • Cont ona cros in su 'na lista e in sul sò candidaa, cont i midemm effett de la modalità sora.

I sched a hinn dotaa de taliand antibroeuj cont on numer che 'l President del Segg el scriv giò prima de dà la scheda e 'l controlla prima de mettela dent per evità che sien sostituii.

Quader politich[Modifega | modifica 'l sorgent]

In la XVII legislatura a gh'è stada no 'na maggioranza ciara e gh'è staa trè governi: Letta, Renzi e Gentiloni.

Pocch mes dopo del vot, a november 2013, il Popolo della Libertà el s'è s'ceppaa in su la scerna de votàgh la fiducia al Letta: I contrari, la maggioranza, s'hinn giontaa a la renassuda Forza Italia, quej a favor inveci han fondaa el Noeuv Centerdestra. A dicember 2017 Alternativa Popolar, fioeula de NCD, la se s'ceppa e la sinistra la va in la coalizion de center-sinistra con la Civica Popolar, la destra la va cont el center-destra cont la lista Nunch cont l'Italia.

El Silvio Berlusconi, incandidabil per la legg Severino, a l'è restaa capo de Forza Italia, in coalizion cont la Lega Nord del Matteo Salvini che l'ha provaa a slargà la soa presenza elettorala al Sud e l'ha faa su la lista Lega per Salvini Premier per cavà via el "Nord" del simbol.

L'esit negativ del Referendum Costituzional del 2016 l'ha volzaa la tension interna in del Partii Democrategh che 'l se divid pussee voeult e 'l da origin a Possibil, Sinistra Italiana e Articol 1, che a fin 2017 se gionten per formà la lista Liber e Inguai, guidada del Pietro Grasso. El PD el troeuva però on liaa in di Radicaj de la Emma Bonino, che fan su Pussee d'Europa, e in di Verd e i Socialista, che fan su Insemma.

L'estrema sinistra a l'è sostanzialment spartida in trè: el Partii Comunista del Marco Rizzo l'ha scernuu de corr indeperlu, di alter center sociai e formazion han fondaa Poder al Popol, i trozkista han faa su Per una Sinistra Rivoluzionaria.

L'estrema destra inveci la se troeuva sia in CasaPound, center social de destra neofassista, sia in la lista Italia ai Italian.

El premier sortent, Paolo Gentiloni, l'ha nonziaa che 'l sò impegn el finiss cont i elezion.

List e partii[Modifega | modifica 'l sorgent]

Coalizion Partii Ideologia Leader
Coalizion de center-sinistra
Partii Democrategh (PD) Socialdemocrazia Matteo Renzi
Civica Popolar (CP) Centrism Beatrice Lorenzin
Pussee d'Europa (+E) Liberalism social
Europeism
Emma Bonino
Insieme (I) Progressism
Ecologism
Giulio Santagata
SVPPATT Regionalism Philipp Achammer
Coalizion de center-destra
Forza Italia (FI) Liberalism Silvio Berlusconi
Lega per Salvini Premier (L) Popolism Matteo Salvini
Fredej d'Italia (FdI) Conservatorism nazional Giorgia Meloni
Nunch cont l'Italia (NcI) Cristianesim democratich Raffaele Fitto
Moviment 5 Stell (M5S) Popolism Luigi Di Maio
Liber e Inguai (LeU) Socialdemocrazia Pietro Grasso
Partii Republegan ItalianALA (PRI–ALA) Liberalism Corrado Saponaro
Poder al Popol (PaP) Comunism Viola Carofalo
CasaPound (CPI) Neo-fassism Simone Di Stefano
El Popol de la Fameja (PdF) Conservatorism Mario Adinolfi
Partii Comunista (PC) Comunism Marco Rizzo
Italia ai Italian (IaI) Neo-fassism Roberto Fiore
Per una Sinistra rivoluzionaria (PuSR) Comunism Marco Ferrando

List minor[Modifega | modifica 'l sorgent]

  • 10 Volte Meglio, guidaa de Andrea Dusi, in 14 circoscrizion de la Cambra
  • Lista del Popolo per la Costituzione, guidaa de l'Antonio Ingroia
  • Autodeterminatzione, guidaa de Anthony Muroni, present in Sardegna a la Cambra e al Senad
  • Blocco Nazionale per le libertà, guidaa da Massimo Renato Lorenzo Mallucci de Mulucci, present in 5 circoscrizion a la Cambra
  • Democrazia Cristiana, guidaa da Giovanni Angelo Fontana e present in Lazio al Senad
  • Destre Unite - Forconi, guidaa da Massimiliano Panero e present in 2 circoscrizion al Senad
  • Free Flights to Italy, present a la circoscrizion Ester
  • Grande Nord, guidaa del Marco Reguzzoni, present in 4 circoscrizion a la Cambra e 2 al Senad
  • Italia nel Cuore, guidaa da Mauro Tiboni, in d'ona circoscrizion a la Cambra
  • MAIE, guidaa del Ricardo Antonio Merlo, present in la circoscrizion Ester
  • Movimento delle Libertà, present in la circoscrizion Ester
  • Patto per l'Autonomia, guidaa da Massimo Moretuzzo e present in Friul Venezia Giulia a la Cambra e al Senad
  • Per Tutti - Pour Touts - Pe Tcheut, lista regionalista de la Val d'Aosta
  • Rinascimento Mir, guidaa da Gerardo Meridio e present in Friul Venezia Giulia a la Cambra e al Senad
  • Risposta Civica, present in Val d'Aosta a la Cambra e al Senad
  • Siamo, guidaa da Dario Miedico e present in Friul Venezia Giulia a la Cambra e al Senad
  • SMS - Stato Moderno Solidale, guidaa da Silvana Arbia e present in la circoscrizion Basilicada del Senad
  • UNITAL, present in la circoscrizion Ester
  • USEI, present in la circoscrizion Ester

Programma di partii[Modifega | modifica 'l sorgent]

Center-destra[Modifega | modifica 'l sorgent]

El pont principal del programma comun del center-destra a l'è l'introduzion de 'na flat tax cont ona no tax area pussee volta. I liaa han no trovaa ona percentual in comun, el Berlusconi el dis el 23%, la Liga el 15%. Forza Italia l'ha insubii anca de scancellà l'IRAP e de mett on reddit de dignità, ispiraa a l'imposta negativa.

A l'è insubida anca la reforma de la legg Fornero e on pian de jutt a l'Africa, paragonaa al pian Marshall.

A l'è on programma de circa 100 miliard de Euro che per i proponent se pòden recuperà di agevolazion, de la lotta a l'evasion e de 'n general moeuves de l'economia.

In di list di Forza Italia a gh'è anca el Moviment Animalista che 'l insubiss de proibì i pellisc e de considerà no i animai domestich 'me robb de luss.

La Liga la voeur abolì la reforma di pension Fornero, mett la pension dopp 41 agn de contribuu, abolì i limit in sul contant e mett la prostituzion legala.

Fratelli d'Italia l'ha insubii de mett i asili nido a gratis, conged parentai pagaa al 80% finna ai 6 agn del fioeu, pussee resors a la polizia e ai soldaa, abolì i scont automàtich di pen e l'abolizion di test d'ingress universitari.

El programma comun el voeur anca toeu via i tass in su la prima cà e macchina, la saradura de Equitalia e la riscossion a nivell local e 'l vincol de mandaa.

Noi con l'Italia l'ha insubii de reformà i municipalizzaa, sbassà i finanziament ai Region e vend i ben improduttiv del Stat.

Center-sinistra[Modifega | modifica 'l sorgent]

El Partii Democrategh el voeur mett on salari minim de 10€ l'ora, sbassà el chignoeu contributiv in sui contratt a temp indeterminaa, dà on assegn de ricollocament ai licenziaa e volzà i incentiv per i famili cont i fioeu, on sistema a pont per i illecit fiscai e 'na revision de la legg de la cittadinanza pussee verta, cont di cost de circa 9 miliard l'ann.

Civica Popolar la supporta i vaccinazion obbligatori, i asili nido a gratis e 'na defiscalizzazion del welfare aziendal e l'abolizion del superticket de 10€, cont on cost de circa 800 milion l'ann e pussee assistenza domiciliar ai anzian.

Insemma el voeur on pian cà de mezz miliard l'ann, di noeuv politegh ambientài con la proibizion entro el 2035 di mezz diesel e benzina.

Pussee d'Europa, 'me suggeriss el nomm, a l'è per l'integrazion europea, a favor de la ricerca scientifega, de la liberalizzazion di droeugh e per la sovranità europea.

Moviment 5 Stell[Modifega | modifica 'l sorgent]

El Moviment 5 Stell el voeur mett on reddit de cittadinanza de 780€ per i single e de 1'638€ per i famili cont du fioeui, ona misura de circa 15-20 miliard l'ann, e ona misura de reduzion del debit publich a longh termen e di àlter provvediment de revision de la spesa e de jutt a l'economia.

Per pagà 'sti mesur el voeur tajà el trasà de la politega e de respettà no, almen in del principi, el patt de stabilità che 'l proibiss de volzà el debit publich de pussee del 3%.

Anca el M5S a l'è a favor del vincol de mandaa e 'l voeur fà ona legg costituzionala per obbligà i parlamentar che voeuren cambià partii a dimettès.

A nivell ambiental a l'è insubida l'abolizion di inceneritor e di tinvell e l'è insubii de favorì i mezz ecològich.

Liber e Inguai[Modifega | modifica 'l sorgent]

Liber e Inguai l'ha insubii de cavà via i tass universitari per quej che hinn in regola cont i esamm, misura del cost de 1,6 miliard, de volzà la lotta a la criminalità (el candidaa Grasso a l'è staa Procurator Nazional Antimafia) e de mett i tutel ai lavorator cavaa del Jobs Act. El partii el domanda anca de fà on progett per mett a post el dissest idrogeologich cont ona carbon tax e l'è in favor de la neutralità de la red.

A l'è insubii de mett on'unich istituu matrimonial sia per i cobbi etero che per quej gay e de dà la cittadinanza italiana ai fiolitt forestee ch'han faa almen on ciclo de studi in Italia.

Àlter list[Modifega | modifica 'l sorgent]

Estrema sinistra[Modifega | modifica 'l sorgent]

El Partii Comunista l'insubiss la sortida unilateral italiana de Euro e NATO, el repudi del debit e la nazionalizazion, senza compens, di settor strategich.

Poder al Popol el voeur abolì l'ergastol, el 41bis, abolì i riatt politegh e volzà i pen per i riatt economich, oltra a fermà i grand oeuver.

Per una Sinistra Rivoluzionaria la voeur portà innanz i tema de la Revoluzion d'Ottober e spantegà el lavor in tra tucc.

Estrema destra[Modifega | modifica 'l sorgent]

CasaPound la ponta in sul reddit de natalità, ossia di danee per i gent che fann fioeu, in su la lotta a l'immigrazion clandestina, a la nazionalizazion de la Banca d'Italia e a la sortida de l'euro e de l'Union Europea. L'è anca insubii el mutuo social per i gent che voeuren crompà cà.

Anca Italia ai Italian la gh'ha on programma arènt, cont on reddit per i mader, la lotta a l'immigrazion clandestina e la fin de la "propaganda gender".

Popol de la Familia[Modifega | modifica 'l sorgent]

El Pòpol de la Familia a l'è ispiraa a la dottrina cristiana e contrari a matrimoni e adozion gay, la liberalizzazion de la droga, a la "propaganda gender" e a favor de on reddit de maternità.

Partii Republegan - ALA[Modifega | modifica 'l sorgent]

El Partii Republegan - ALA a l'è per ona detassazion e liberalizzazion del lavorà, in su la strada del Jobs Act e de l'abolizion di Region cont ona riforma in stil franzes.

Valor Uman[Modifega | modifica 'l sorgent]

El Partii Valor Uman l'è incentraa in sui pari opportunità, in sul sostègn ai famili e in su 'n reddit de dignità. A l'è a favor del monocameralism e de l'abolizion di Region, reduzion de l'orari del lavorà a 4 or, servizzi publich a gratis e vertura a la medesina alternativa.

Sondagg[Modifega | modifica 'l sorgent]

Media dal febrar 2013 al di d'incoeu
  PD
  M5S
  PdL/FI
  SC
  NCD/AP
  LN
  SEL/SI
  FdI
  UdC
  MDP
  CP
  LeU
  I
  CP
  NcI

Resultaa[Modifega | modifica 'l sorgent]


Governo[Modifega | modifica 'l sorgent]

I elezion han lassaa l'Italia senza 'na maggioranza ciara e che l'ha poduu no esprim on governo fioeu de domà 'na part poltega. I consultazion de la prima settimana de april han daa nissun governo e hinn staa repetuu l'11 e 'l 12, senza resultaa. El 18 de april l'è daa on mandaa esplorativ a la Presidenta del Senad Maria Elisabetta Alberti Casellati per cercà 'na maggioranza cont el M5S e 'l center-destra, mandaa poeu fallii. El 23 de april al President de la Cambra Roberto Fico on mandaa per on governo PD-M5S, fallii dopo de 'na forta presa de posizion del Matteo Renzi.

El 7 de magg Sergio Mattarella l'ha nonziaa el falliment di trattativ e la costruzion de on "governo neuter" che l'avaria governaa finna a dicember se fiduciaa o finna a luj/ottober se minga fiduciaa, senza on gran consens in tra i partii. El 9 de magg Lega e M5S han domandaa al Capo del Stat 24 or de temp per on accord in extremis, dopo avè sponsorizzaa i elezion a luj. La sira del midemm dì el Silvio Berlusconi el nonzia che Forza Italia la saria no contraria al governo M5S-Lega, ma che l'avaria votaa nò la fiducia.

El 23 de magg el Mattarella, dopo de 'n accord definitv in tra Liga e M5S el dà l'incarich al Giuseppe Conte, professor universitari, che l'ha accettaa con reserva. El 27, però, dòpo de l'opposizion del Mattarella a nominà Paolo Savona minister, el remett el mandaa.

Dòpo che i partii han voruu no trattà pussee el Mattarella l'ha incaricaa el Carlo Cottarelli de fà su on governo. 'Sta mossa l'ha menaa el Moviment 5 Stell e la Liga a tornà al tavol per dà vita al governo Conte I, l'inscì ciamaa governo del cambiament.

In l'agost del 2019 el governo a l'è mandaa in crisi del Salvin e 'l 5 de settember 2019 el giura el noeuv governo Conte II, fioeu de 'na lianza in tra el Moviment 5 Stell, Liber e Inguai e 'l Partii Democrategh.

El 17 de settember del 2019 i parlamentar arent al Renzi se separen per formà Italia Viva, che 'l sutta a stà cont el governo.

Riferiment[Modifega | modifica 'l sorgent]

Vos corelaa[Modifega | modifica 'l sorgent]