Bonvesin de la Riva

De Wikipedia
Sata a-a navegassion Sata a-a serchia
Lombard Quell articol qì l'è scrivud in Lombard, cond l'ortografia Scriver Lombard.





Wikiquote-logo.svg
«Fra Bonvesin dra Riva, ke sta im borgo Legnan

de le cortesie da desco quilò ve dise perman
de la cortesie cinquanta ke se dén servar al desco

fra Bonvesin dra Riva ve'n parla mo' de fresco»

Bonvesin de la Riva (Bonvesin dra Riva in lombard antig; Bonvicinus de Rippa in latin; Milan (?) 1250 ca. – 1313/1315) l'è stait vun intra i prim a scriver jo in lombard ind el secol XIII, considerad la personalità plussee granda del so secol a Milan e pader de la lengua lombarda, ma anca icona de la leteratura in volgar in tut el nord Italia.

Nassud vers la metà del 1200, el Bonvesin a l'è stait un frad de L'Orden dei Umiliati, autor lombard squas certament milanes, l'ha scrivud œvre in poesia e prosa in volgar lombard e in latin: la plupart inn de carater relijos; cont el Liber dei Tre Sctriture l'ha anticipad la Comedia del Dant Liger.

El nom[Modifega | mudìfica 'l sorgènt]

Œvra De magnalibus urbis Mediolani de Bonvesin de la Riva, qì ind la soa ristampa del 1921 de la cà editrix Cogliati

L'indicazion onomastega de l'autor a l'è minga univoga. Principiom de la parentella, la forma drovada dei editor plussee recent, çoè "de la Riva", a l'è qella qe la figura denter del codex plussee important dei œvre volgar de l'autor, l'Ital. Qu. 26, incœ conservad a la Staatsbibliothek de Berlin.

Ind i codex dei œvre volgar a g'è "Da Riva" per probabel semplificazion latinejant[1]. In duu documents in sul Bonvesin scrivuds in latin se pœden trovar anca i forme "de Lariva" e in un olter qella "de Laripa", inscambi la plupart dei documents la scriv "de la Riva", alternad a "de Ripa" o "de Rippa", forma con la qual l'autor medem se ciama ind el De magnalibus urbis Mediolani.

Per el nom, oltre forme inn "Bonus Vicinus", "Bonvicinus", "Bonvecinus", "Bovecinus", "Bonvisinus", "Bonvesinus"[2].

Vita[Modifega | mudìfica 'l sorgènt]

El Bonvesin de la Riva al nass squas certament el 1240 a Milan, so pader se ciama Petrus de Laripa, i so jent i stan de cà ind el quartier de Porta Texinesa (la so parentella la vegn de fait de la Ripa de Porta Texinesa), indovè qe anca luu al ciaparaa un stabel el 26 marz 1291[3].

A l'è stait magister, o doctor gramaticae, segonda l’epigraf de un at notaril. Despœ de un period de insegnament a Legnan indovè qe al finanzia l'Ospedal de sant Erasm, l'epitafi funeber[4] del Bonvesin la atribuiss la soa fondazion a l'autor, ma g'è no un quaicoss qe 'l pœda confermar o smentir qella afermazion qì[5], de la permanenza a Legnan a l'è testimoni un so componiment in volgar cognossud comè De quinquaginta curialitatibus ad mensam[6], implunemanc se cognoss minga con precision l'arc cronolojeg ind el qual al viv ind el borg.

A l'è a Milan prima del 1288, ann de stesura del De magnalibus urbis Mediolani, test prosasteg in latin. A l'è stait anca frad terziari de l’Orden dei Umiliati[7], in su qella adesion qì del Bonvesin a l'è possibel domà dir qe la sia precedenta a la stesura del De quinquaginta curialitatibus ad mensam, perqè a l'interna de qell componiment qì el Bonvesin al se nomina comè frad[8]. L'ha fait part dei decan de l’Ospedal nœv o de Dona Bona de Milan, a l'è stait confratell dei moneg de l'orden de Sant Giovanni Gerosolimitano, çoè i Ospitalieri, ind la giexa de Porta Romana. L'ha iœtad tants istituzion de carità, comè disen i font, i accords ciapads cont i convents, e l’epigraf in su la lapid. Poc coinvolt ind i desorden citadin, al se linea, plussee per prudenza qe per politega, ai Visconts.

La soa prima mier a l'è la Bengedica[9] (o Benghedice), cont la qual al viv (segond un document datad 26 marz 1291) ind la cà de Porta Texinesa a partir del 1290, vexin a la giexa de San Vit, cà indove a l'è cert qe 'l Bonvesin al viveva ind el 1313[10]. Inscambi, un document datad 2 febrar 1290 al dix qe 'l Bonvesin l'ha imprestad 200 lire de terzœi ai frads de l'Ospedal de la Colombetta de Milan, prestit in cambi del qual al segura un vitalizi per sé e per la mier a careg dei frads[11].

Grazia a un document datad 9 setember 1296, inscambi, sem a cognossenza de la soa entrada ind la confraterneda dei moneg de l'orden dei Ospitalieri. A l'interna de qell document qì, a'l Bonvesin a l'è riferid per cinq vœlte el titol de magister e per una vœlta qella de doctor gramaticae[12]. El Bonvesin al resulta vesser stait member del Collegio dei decani de l'Ospedal Nœv o de Dona Bona ind i agn 1303-1305, period cronolojeg del qual vegnen quater documents ind i quai el so nom a l'è associad a qella soa posizion sociala[13].

Semper a l'interna de qest ultem ospedal, el Bonvesin al fa scriver jo el so prim testament, datad 18 otober 1304[8] e ranzad via nœv agn despœ, sostituid de un segond testament del 5 jenar 1313. Ind el prim dei duu documents apena citads el Bonvesin al resulta sposad plu con la Bengedica, ma con una fomna de nom Floramonte. Amalastant i duu matrimoni, al resulta minga qe 'l Bonvesin l'habia havud dei fiœi[14]. A l'è ancamò el prim testament a indicar qe 'l Bonvesin al fudess proprietari minga domà de la scœla indovè qe l'insegnava, ma anca de la catedra, dei banc e de tucc i ojets, anca i liber detegnuds in pegn dei students. Semper del medem document se pœl capir qe 'l Bonvesin al possedeva una quai cà in Porta Tosa qe l'era daita in afit[15].

El segond testament del Bonvesin al forniss un terminus post quem per datar la mort de l'autor: qest qì a l'è de fait l'ultem document rivad a num ind el qual el Bonvesin al resulta ancamò in vita e a l'è datad a'l 5 jenar 1313. A qesta data l'autor al g'haveva de haver desmetud de prategar el mester de maister, del moment qe ind el document inn minga menzionads né liber, né olter material per l'insegnament[8]. Ind el testament l'autor al lassa in eredità ai Frads de la Colombetta el stabel de la giexa de san Vit. El Bonvesin a l'era mort segurament prima del 13 marz 1315, data a la qual al resal un decred cont el qual el Matee Viscont, sior de Milan, l'esenta de un quai pagament i frads de la Colombetta, in qell document qì l'autor al vegn citad comè mort[16].

Grazia ai œvre de carità soratut a ents relijos, a l'è possibel capir comè la vita del maister milanes la sia staita caraterizada de l'ativism social, in camp educativ e filantropeg; in mesura menora anca in ambet politeg[17], ind el qual el Bonvesin al sœmeia elejir comè personalità de riferiment qella de Oton Viscont[18].

De fait, a l'è propri ind la figura del vescov e pœ sior de Milan qe 'l Bonvesin al trœva la persona qe l'havaria podud garantir la concordia civila[19]. A qest proposit al pœl vesser regordad comè l'Ospedal Nœv, del qual el Bonvesin a l'era stait decan, l'haveva havud ind el 1267 un permess special in su la cernida del minìster prepost a l'ofici liturjeg de part de l'Otton Viscont medem[20].

El Bonvesin a l'è ritenud la personalità plussee rilevanta de la cultura milanesa del XIII secol, el major poeta del Nord Italia, diventad donca icona ideala de la letteratura didattega in volgar del Nord[21].

La scœla Bonvesin de la Riva de Legnan

In tante citaa taliane el Bonvesin de la Riva al vegn incœ regordad con vie a luu intitolade e ind la citaa de Legnan una scœla segondaria la g'ha el so nom.

Œvre in lombard[Modifega | mudìfica 'l sorgènt]

La produzion volgar del Bonvesin a l'è de circa dexmilla lissandrit[22]. El Contini l'ha assegnad a çascun componiment in volgar una corrispondenza con una letera alfabetega e l'ha spartid i œvre segond tre categorie: contrast, volgar espositiv e narrativ, volgar didateg.


Contrast:

  • Disputatio mensium (T)
  • De Sathana cum Virgine (A)
  • De peccatore cum Virgine (I)
  • De anima cum corpore (E, F)
  • Disputatio rose cum viola (G)
  • Disputatio musce cum formica (H)


Volgar espositiv e narrativ:

  • Liber dei Tre Scriture (S): De scriptura nigra (S I); De scriptura rubra (S II); De scriptura aurea (S III)
  • De falsis excusationibus (Q)
  • De vanitatibus (R)
  • De quindecim miraculis (C)
  • De die iudicii (D)
  • Laudes de Virgine Maria (L)
  • Rationes quare Virgo tenetur diligere peccatores (M)
  • Vulgare de elymosinis (B)
  • Vulgare de passione sancti Iob (O)
  • Vita beati Alexii (P)

Volgar didateg:

  • De quinquaginta curialitatibus ad mensam (N)
  • Expositiones Catonis (V)


El g'ha de vesser jontad anca el componiment De Cruce (U)[23], ancamò inedit a'l temp de l'edizion del Contini e publegad domà pœ[24].

La produzion volgar del Bonvesin a l'è componida de test poeteg. El sqema strofeg prevalent a l'è qell dei quartin monorim de lissandrit (segond la configurazion strofega aaaa), a part duu componiments (N e V) ind i quai la rima a l'è baxada (sqema strofeg aabb)[25]. Studios eminents comè el Contini e 'l D'Arco Silvio Avalle i hann individuad ind el Bonvesin autor de volgar, l'œvra de un voltador[26] e de un volgarizador[27] de preesistents tests latin.

Forsi, el cas plussee esplicit de qesta atitudin a l'è qell dei Disticha Catonis (V) version volgar de l'œvra tard-antiga del Dionisio Catone. Se pœl lassar gnanca el cas del contrast intra i dodex mes de l'ann, ind i quai el Bonvesin al se revela voltador de se medem[28]: donca el De controversia mensium latin al sarà cronolojegament anterior a la Disputatio mensium (T) volgar.

De soraplu, anca el poemet De vita scolastica al g'ha a'l so interna un quai esempi qe vegnaran parafrasads e ampliads ind un quai œvre in vers lombards[26].

El Liber dei Tre Scriture a l'è considerad, in bas a carateristege struturai e formai, el capolavor in volgar del Bonvesin[29]. L'œvra la costituiss un antecedent de la Comedia del Dant Liger: i torments del fœg, del giaç e dei serpents velenos inn de fait elements in comun intra l'infern bonvesinian (descrivud in S I) e qell dantesc. De soraplu, la spartizion dei regn ultraterren in dodex pene e dodex glorie (qest'ulteme descrivude in S III) la resulta un'anticipazion de la distribuzion dantesca in cercc e in ciel. Ind l'œvra del Bonvesin, implunemanc, la trœva minga sit la descrizion del purgatori: S II la costituiss, de fait, una parafras poetega dei vanjei de la Passion[30].

Ind el jener dei contrasts, la Disputatio mensium (T) e la Disputatio rose cum viola (G) inn duu dei test ind i quai el Bonvesin al esprim i propri convinzion politege[18]. Ind el segond componiment la viœla, umil e laboriosa, la "g'ha la mei" in su l'aristocratega e boriosa rœsa, la qual la sortiss sconfida del confront per decred del Giglio[31]. In qell poemett qì el Bonvesin al esalta i virtù de Milan incarnade del popol, contrapposte a la prepotenza de una certa part de la nobiltaa qe la g'ha l'obiettiv de otegnir la tirannid con guere interne[32].

L'atenzion a la convivenza intra persone a l'è un tema car a l'autor e partegolarment present ind el De quinquaginta curialitatibus ad mensam (N). Ind el componiment al vegn indicad l'atejament conson de tegnir a tavola: qell moment qì a l'è de fait ritenud estremament segnifegativ sota 'l pont de vista dei rapports sociai[33].

Un quai volgar del Bonvesin al pœl vesser ritenuds a la medema manera de poem ajografeg[34] e inn caraterizads de un andament prevalentement narrativ. In vun de qesti qì, el Vulgare de elymosinis (B) a l'è minga domà contegnuda la narrazion de dex miracoi[28], ma a l'è anca sostegnuda de l'autor l'utilitaa dei donazion economege per i ospedai[35]. Qella affermazion qì la permet de catar fœra un interessant parallel intra el contegnud de un'œvra bonvesiniana e i azion concretament faite de l'autor, qe l'ha iœtad tants ents ospedalier[36].

Semper a l'interna de volgar con tematega analoga, i Laudes de virgine Maria (L) i contegnen la narrazion de cinq miracoi qe i fan de exempla a esposizion dottrinai. Intra qei miracoi qì, frequents fess ind la letteradura de l'epoga inn qei del castellan, del pirata (presents anca ind el De vita scolastica), de la Maria Egiziaca e del frad Ave Maria[37].

Oltr componiments ajografeg, qe se configuren ind la tipolojia dei vite dei sants, inn la Vita beati Alexii (P) e 'l Vulgare de passione sancti Iob (O). Cont i so 524 vers, P al costituiss el test narrativ plussee estes del Bonvesin[28].

El frequent ricors del Bonvesin a exempla ind i so volgar espositiv e narrativ al vexina la divulgazion de l'autor a la predicazion francescana e anca ai test d'ammaestrament in vers del Iacopone da Todi[38].

La cronolojia dei œvre volgar del Bonvesin[Modifega | mudìfica 'l sorgènt]

I studs conducids fin adess in su la produzion volgar del Bonvesin inn minga riussids a stabilir una cronolojia certa dei componiments. El Janfranc Contini l'individua ind i agn Setanta e Votanta del Duuxent l'arc cronolojeg ind el qual l'autor al scriv i so volgar. I ipotes intorna a qell argoment qì se basen principalment in su l'analis de la strutura metrega dei componiments. El Liber dei Tre Scriture (S) a l'è l'uneg componiment per el qual se pœl fornir un'indicazion plutost precisa, çoè el 1274[39].

Qell'œvra qì a l'è formada de quartin monorim de lissandrit, prevalents ind la produzion de l'autor rispet ai quartin de lissandrit con rima baxada. Dal moment qe 'l segond sqema strofeg al par plussee arcaig del prim[40] e, de soraplu, el De quinquaginta curialitatibus ad mensam (N) a l'è l'uneg volgar certament scrivud ind el period de sojorn legnanes (qe al g'ha havud de preceder el 1288), sœmeia qe qest'ultem test al sia de datar minga despœ dei primissim agn Setanta del XIII secol. De soraplu, a l'è stait ipotizad de Raymund Wilhelm qe la Vita beati Alexii (P) la sia posterior a'l Liber dei Tre Scriture (S) e, de conseguenza, la prima œvra citada sia staita scrivuda despœ del 1274[41].

Œvre in latin[Modifega | mudìfica 'l sorgènt]

La produzion latina del Bonvesin la contegn un'œvra in prosa qe la pœl vesser jontada a'l jener dei laudes civitatum[42], el De magnalibus urbis Mediolani, e duu componiments poeteg in vers: De controversia mensium e De vita scolastica.

De magnalibus urbis Mediolani[Modifega | mudìfica 'l sorgènt]

Ind el 1288 el Bonvesin al scriv el De magnalibus urbis Mediolani[43], spartid in un prolog e vot capitoi. Caraterizada de un ton marcatament encomiasteg, l'œvra la g'ha el fin de elojar Milan. Ind i prim quater capitoi l'atenzion a l'è incentrada in su la descrizion topografega, demografega e edilizia de la citaa e del so contad[44]. La narrazion dei vicend de politega interna de Milan la se ferma ind el quint liber a la sconfida e mort del Federig II[45]. La descrizion de la citaa e dei so ativitaa produtive a l'è la part de l'œvra qe l'ha stimolad plussee l'interess dei studios, a discapit de la part politega, anca se a l'è present ind el test[42]. De fait, ind el De magnalibus urbis Mediolani el bersai politeg individuad del Bonvesin inn i fazion dei nobil milanes qe partejaven per el Gulielm VII de Monferrad[46], ciamad a Milan per haver el ruol de capitan de guera ind el 1278 e depost de una rivolta popolara capejada de l'Oton Viscont ind el 1282[47]. L'uneg manoscrit rivad a num qe 'l conserva l'œvra (codex 8288 de la Biblioteca Nacional de Madrid, del 1420-1430), descomparid per secoi, pœ trovad ind la biblioteca de la capitala spagnœla ind el 1894 in condizion de fort deteriorament[48].

Œvre latine in vers[Modifega | mudìfica 'l sorgènt]

Duu inn i componiments poeteg in lengua latina del Bonvesin, cognossuds sota el titol de De controversia mensium (DCM)[49] e de De vita scolastica. El prim de qests qì componid de 430 esameter, al rapresenta la version latina de l'omonima œvra in volgar. A l'interna del lavorar besogna verosimilment recognoss un'allusion ai guer politeg-sociai in at in Lombardia e, ind el specifeg, a l'interna de la citaa de Milan, ind la segonda metaa del XIII secol. Plussee precisament, l'œvra la saria una critega a l'inaspriment del rejim autoritari dei Torrian ind i agn Setanta del Duuxent[50]. Ind l'œvra a l'è descrivuda la ribellion dei vundex mes contra Jenar (Ianus in latin), accusad sia de vesser l'uneg de quests qì a lavorar minga, sia de poltrejar ind el ozio e ind el divertiment, ma anca de haver un controll dispoteg in su i oltr mes e de smalandrar e infœgar fœra el prodot dei fatig dei oltr[51]. A qei accus qì la segu la cernida dei vundex de coalizar-s intra de lor per tœver i arm contra el despota. Implunemanc, a la vista de qest qì armad de la soa clava, i balqen e se veden costrinjuds a stipular un tratad de pax con Jenar.

Ind el De vita scolastica el Bonvesin al se ocupa a nivell teoreg de la scœla, ambient a luu familiar a causa del so mester de insegnant. In qell poemet qì de 936 distix elegiaç[52] el poeta al se fissa el fin de trasmeter norme de comportament social sia ai alliev, sia ai maister[33]. A l'interna de l'œvra l'autor al ciama qe i scolar sien just ind el pagament, in manera de far minga preocupar el maister e, de soraplu, al dix qe i scolar i g'havarissen de dar a'l maister ulterior cadò, anca sota forma de compens economeg[53]. Qest componiment del Bonvesin l'ha havud granda fortuna in epoca renassimentala, del moment qe pœdom cuntar una ventina de edizion Cinqucentesc[54].

Per quant revarda i œvre poetege in latin, el Jovan Orlandi a l'è de la tesi qe De controversia mensium al sia anterior a'l De vita scolastica, qest soratut in bas a l'analis prosodega[55] e a'l studi dei cesur[56] dei esameter presents ind i do œvre.

Inscambi, per el De vita scolastica, un'ipotesi de datazion plussee precisa la podaria vesser daita de la probabela dipendenza del componiment in distix del Bonvesin del Speculum morale, œvra falsifegada atribuida a'l Vincenz di Beauvais e cognossuda ind la tradizion del Speculum maius. El terminus ante quem per la stesura de qell test qì al sœmeia haver-g de vesser individuad ind l'ann 1297. Se ciapom comè vera qella suposizion qì, el De vita scolastica al podaria minga vesser stait componid prima de qesta data[57]. De l'Orlandi a l'è inscambi el judizi segond el qual i do œvre latine in vers i sien inferior a'l De magnalibus urbis Mediolani[58].

Edizion[Modifega | mudìfica 'l sorgènt]

Œvre in volgar[Modifega | mudìfica 'l sorgènt]

  • Beretta, Carlo (ed.), Bonvesin da la Riva, Expositiones Catonis. Saggio di ricostruzione critica, Pisa, Scuola Normale Superiore, 2000
  • Contini, Gianfranco (ed.), Le opere volgari di Bonvesin da la Riva. Volume primo (unico uscito): Testi, Roma, Società filologica romana, 1941
  • Contini, Gianfranco (ed.) Poeti del Duecento, 2 voll., Milano/Napoli, Ricciardi, 1960, tomo I, pp. 667-712
  • Gökçen, Adnan M. (ed.), I volgari di Bonvesin da la Riva. Testi del ms. Berlinese, New York, Lang, 1996
  • Gökçen, Adnan M. (ed.), I volgari di Bonvesin da la Riva. Testi dei mss. Trivulziano 93 (vv. 113-fine), Ambrosiano T. 10 sup., N. 95 sup., Toledano Capitolare 10-28, New York, Lang, 2001
  • Isella Brusamolino, Silvia (ed.), Bonvesin da la Riva, De Cruce. Testo frammentario inedito, Milano, All'insegna del pesce d'oro, 1979
  • Leonardi, Matteo (cur.), Bonvesin da la Riva, Libro delle Tre Scritture, Ravenna, Longo, 2014
  • Wilhelm, Raymund (ed.), Bonvesin da la Riva. La Vita di sant'Alessio. Edizione secondo il codice Trivulziano 93, Tübingen, Niemeyer, 2006

Œvre in latin[Modifega | mudìfica 'l sorgènt]

  • Chiesa, Paolo (ed.), Bonvesin da la Riva, Le meraviglie di Milano (De magnalibus Mediolani), Milano, Mondadori-Fondazone Valla, 2009
  • Orlandi, Giovanni, Letteratura e politica nei Carmina de mensibus (De controversia mensium) di Bonvesin da la Riva, in: «Felix olim Lombardia». Studi di storia padana dedicati dagli allievi a Giuseppe Martini, Milano, 1978, pp. 103-195
  • Vidmanovà-Schmidtovà, Anezka (ed.), Quinque claves sapientiae. Incerti auctoris Rudium doctrina. Bonvicini de Ripa Vita Scolastica, Leipzig, Teubner, 1969

Note[Modifega | mudìfica 'l sorgènt]

  1. Contini, Gianfranco (ed.), Le opere volgari di Bonvesin da la Riva. Volume primo (unico uscito): Testi, Roma, Società filologica romana, 1941, p. XLIII
  2. D'Arco Silvio Avalle, Bonvesin da la Riva in Dizionario Biografico degli Italiani, vol. 12, Roma, Istituto dell'Enciclopedia Italiana, 1971, consultato online al link: [1]
  3. Chiesa, Paolo (ed.), Bonvesin da la Riva, Le meraviglie di Milano (De magnalibus Mediolani), Milano, Mondadori-Fondazone Valla, 2009, p. XIX
  4. Ça la trascrizion de l'epitaffi: «Lege tui caro viva fui, qui vivis amice/ Viva fui, nunc strata rui clava domitrice/ Es quod eram, quod nunc es eram cano te moriturum/ Illud idem quod sum, siquidem te nosce futurum/ Ergo pave, ventura cave, fuge carnis amores/ Ac anime vivendo time cumulare dolores/ Nunc vadens, cras forte cadens subito morieris/ Quere deum: venereris eum dum vivus haberis./ Hic jacet Frater Bonvicinus de Ripa de ordine/ tertio Humiliatorum, Doctor in Gramatica qui/ construxit Hospitale de Legniano, qui composuit/ multa vulgaria, qui primo fecit pulsari Campanas/ ad Ave Maria. Dicatur Ave Maria pro anima eius.» El test riportad a g'è in Pecchiai, I documenti della biografia di Buonvicino della Riva cit., pp. 108-110
  5. Contini, Le opere volgari di Bonvesin da la Riva cit., p. XLV
  6. Contini, Le opere volgari di Bonvesin da la Riva cit., p. 315, v.1
  7. Pio Pecchiai, I documenti della biografia di Buonvicino della Riva, in «Giornale Storico della letteratura italiana», LXXVIII (1921), pp.96-127, pp. 108-111 e Giuliana Albini, Bonvesin da la Riva, un intellettuale laico alla ricerca di una dimensione religiosa nella Milano di fine Duecento, p. 21. Contribud consultad online al link: [2]. El test a l'è disponibel anca in formad de carta in G. Albini, Carità e governo delle povertà (secoli XII-XV), Milan, 2002, pp. 19-53
  8. 8,0 8,1 8,2 Avalle, «Bonvesin da la Riva» in Dizionario Biografico degli Italiani cit.
  9. El nom de la prima mier al se trœva sota qesta forma in Pecchiai, I documenti della biografia di Buonvicino della Riva cit., p. 98
  10. Pecchiai, I documenti della biografia di Buonvicino della Riva cit., p. 99
  11. Pecchiai, I documenti della biografia di Buonvicino della Riva cit., pp. 98-99
  12. Achille Ratti, Bonvesin della Riva e i frati Gerosolomitani in «Archivio Storico Lombardo», XIX (1903), pp. 191 -193
  13. Pecchiai, I documenti della biografia di Buonvicino della Riva cit., p. 103
  14. Pecchiai, I documenti della biografia di Buonvicino della Riva cit., p. 104
  15. Pecchiai, I documenti della biografia di Buonvicino della Riva cit., pp. 104-105
  16. Pecchiai, I documenti della biografia di Buonvicino della Riva cit., pp. 107-8
  17. Bonvesin da la Riva, Libro delle Tre Scritture, a cura di Matteo Leonardi, Ravenna, Longo, 2014, p. 11
  18. 18,0 18,1 Albini, Bonvesin da la Riva, un intellettuale cit., pp. 2-3
  19. Albini, Bonvesin da la Riva, un intellettuale cit., p. 4
  20. Albini, Bonvesin da la Riva, un intellettuale cit., p. 18
  21. Bonvesin da la Riva, Libro delle Tre Scritture cit., p. 8
  22. Vers risultant de duu emistiqi de ses sillabe ciasqedun, tipeg de la poesia classega francesa. Dal fr. alexandrin. Lissandrit a l'è l'equivalent de "Alessandrino" in talian e de "Alexandrin" in frances, de fait se in talian el nom de persona se dis "Alessandro" e in frances "Alexandre", in lombard se dis "Lissander", donca cont un diminutiv a g'hem i "Lissandrit".
  23. Wilhelm, Raymund (ed.), Bonvesin da la Riva. La Vita di sant'Alessio. Edizione secondo il codice Trivulziano 93, Tübingen, Niemeyer, 2006, p. 75
  24. L'edizion de riferiment del test a l'è (ed.) Isella Brusamolino, Silvia Bonvesin da la Riva, De Cruce. Testo frammentario inedito, Milan, All'insegna del pesce d'oro, 1979. Per la descoverta del test se veda in partegolar ibidem, pp. 7-13. El test a l'è stampad anca in Gökçen, Adnan M. (ed.), I volgari di Bonvesin da la Riva. Testi del ms. Berlinese, New York, Lang, 1996, pp. 211-18
  25. Contini, Le opere volgari di Bonvesin da la Riva cit., p. XXII
  26. 26,0 26,1 Contini, Poeti del Duecento cit., p. 667
  27. Avalle, «Bonvesin da la Riva» in Dizionario Biografico degli Italiani cit., p. XXII
  28. 28,0 28,1 28,2 Wilhelm, Bonvesin da la Riva. La Vita di sant'Alessio cit., p. 2
  29. Bonvesin da la Riva, Libro delle Tre Scritture cit., p. 11
  30. Bonvesin da la Riva, Libro delle Tre Scritture cit., p. 14
  31. Orlandi, Giovanni, Letteratura e politica nei Carmina de mensibus (De controversia mensium) di Bonvesin da la Riva, in «Felix olim Lombardia». Studi di storia padana dedicati dagli allievi a Giuseppe Martini, Milano, 1978, pp. 103-195, p. 115
  32. Paolo Grillo, Il frate, il popolo, il marchese. Bonvesin da la Riva e la politica milanese, in «Archivio storico italiano», vol. 173 (2015), pp. 405-425, p. 408 e Orlandi, Letteratura e politica nei Carmina de mensibus cit., pp. 137-38
  33. 33,0 33,1 Albini, Bonvesin da la Riva, un intellettuale cit., p. 2
  34. con questa definizione in Wilhelm, Bonvesin da la Riva. La Vita di sant'Alessio cit., p. 2
  35. Albini, Bonvesin da la Riva, un intellettuale cit., pp. 14-15
  36. Varda n.11
  37. Contini, Poeti del Duecento cit., pp. 669-70
  38. Bonvesin da la Riva, Libro delle Tre Scritture cit., pp. 22-23
  39. Contini, Le opere volgari di Bonvesin da la Riva cit., p. XXII e Beretta, Carlo (ed.), Bonvesin da la Riva, Expositiones Catonis. Saggio di ricostruzione critica, Pisa, Scuola Normale Superiore, 2000, p. XXXIV
  40. Orlandi, Letteratura e politica nei Carmina de mensibus cit., pp. 121-22, n.33-34
  41. Wilhelm, Bonvesin da la Riva. La Vita di sant'Alessio cit., pp. 7-8
  42. 42,0 42,1 Grillo, Il frate, il popolo, il marchese cit., p. 407
  43. Per un'ipotes de datazion anc'mo plussee precisa (intra el 16 maj e 'l 21 lui) varda Chiesa, Bonvesin da la Riva, Le meraviglie di Milano cit. pp. 173-4,
  44. Santorre Debenedetti, «Bonvesin da la Riva», in Enciclopedia Italiana, VII, Roma, Istituto per l'Enciclopedia Italiana Treccani, 1930, p.439, consultata online al link: [3]
  45. Chiesa, Bonvesin da la Riva, Le meraviglie di Milano cit. pp. XXI-XXII,
  46. Grillo, Il frate, il popolo, il marchese cit., p. 419
  47. Grillo, Il frate, il popolo, il marchese cit., p. 413
  48. Chiesa, Bonvesin da la Riva, Le meraviglie di Milano cit. pp. XLV-XLVI,
  49. Per el titiol varda Orlandi, Letteratura e politica nei Carmina de mensibus cit., p. 104, n. 3 e ibidem, p. 166
  50. Grillo, Il frate, il popolo, il marchese cit., p. 410
  51. Orlandi, Letteratura e politica nei Carmina de mensibus cit., p.110
  52. Succesion o strofe de duu vers; ind la metrega classega, la strofa risultant de un esameter e de un pentameter ( d. elegiaç ). (Dl gr. dístikhon "succesion de duu vers").
  53. Contini, Poeti del Duecento cit., p. 668
  54. Contini, Le opere volgari di Bonvesin da la Riva cit., p. XLII
  55. Qe a l'è in rapport a la quantità dei vogai, (la prosodia la studia la quantità sillabega e in jeneral del ritm poeteg, carateristega de l'antigitaa classega). Del gr. prosōidía.
  56. Pausa a l'interna del vers classeg. Dal lat. caesura
  57. Paolo Garbini, Sulla "Vita scolastica" di Bonvesin da la Riva in «Studi Medievali», 31 (1990), 705-737, pp. 734-35 e n. 93
  58. Orlandi, Letteratura e politica nei Carmina de mensibus cit., pp. 124-31

Vox correlade[Modifega | mudìfica 'l sorgènt]

Oltr projet[Modifega | mudìfica 'l sorgènt]

Bonvesin de la Riva in su la Wikisource

Ligam de fœra[Modifega | mudìfica 'l sorgènt]

  • Bonvesin de la Riva in su Treccani.it – Enciclopedie on line, Istituto dell'Enciclopedia Italiana.