Epigraf
|
Quest articol chì l'è scrivud in lombard, con la Noeuva Ortografia Lombarda |
Con epigraf (del grech antigh: ἐπιγραφή, epigraphè, scrivud sora) o iscrizzion se intend de solet un test esponid publegament in su un suport de material minga deperibel (soratut marmol o preda, o anca metall).
El test el gh'ha de solet el fin de tegnì viva la memoria de un event storegh, de un personagg o de un at; i parole poeuden vesser incise, dipingiude o fade a mosaich; l'epigraf la se poeud trovà sia in d'un sit sarrad (gesa, capella, palazzi) sia a l'avert (piazza, via, cimiter), o la poeud vesser in su un oget. De solet i iscrizzion inn fade in letere maiuscole, a caraterizzàie però l'è minga domà el stil de la scritura ma anca l'adozzion de particolar register lenguistegh, despess con concision e solenitaa, in fonzion del contegnud, del contest e del fin comunegadiv.
Storia
[Modifega | modifica 'l sorgent]
La tradizzion epigrafega l'è carateristega de la civiltaa classega greca e romana e la testimonia el grad spantegad de alfabetizzazzion de quei societaa chì: senza una bas compagna de quella chì i epigraf havarien minga podud havé la fonzion de comunegazzion publega.
Inn rivade in fina a num circa trecent-milla iscrizzion romane, domà una part picinina de l'insema origenari che, spantegad in sul vast territori de l'Imper roman, l'è inscambi valutad di studios in divers milion de esemplar.
In del Medioev el declin de l'alfabetizzazzion e di istituzzion publeghe el se acompagna a quell di epigraf che, senza la so fonzion, vegnen manch in numer in fina squas a descomparì.
L'usagg di epigraf el fa la so recomparsa a principià de l'XI secol e el se spantega con l'Umanesim e el diret recuper de la forma epigrafega de Roma. Del 1471 l'epigrafia publega per i strade de Roma la gh'ha un fort impuls de l'oeuvra del papa Sisto IV. El tratad De Divina Proportione, publegad in del 1509 del matemategh Luca Pacioli, el deta i regole matemateghe per l'imitazzion di modell antigh.
Studi di epigraf
[Modifega | modifica 'l sorgent]El studi di epigraf l'ha toeu cont el temp un'importanza semper pussee granda, soratut per la so rilevanza coma font storeghe. El lavorà malfà de interpretazzion e datazzion l'ha menad a la maturazzion de un'autonoma dissiplina scientifega che la ciapa el nom de "epigrafia".
I tante tipologie de epigraf hann fad pensà un quai studios a di definizzion che se basen minga in sul material o in su la modalitaa de scritura ma in su criteri imateriai, prim in tra tucc el perchè un'iscrizzion la vegn creada. El Giancarlo Susini e l'Angela Donati i parlen, per esempi, de «scritura esponida» che l'ha in sé «i requisid de la perenitaa»,[1] inscambi el Silvio Panciera el noda el carater unidirezzional del messagg epigrafegh, che 'l se revolg minga a un grup picinin ma a una colletivitaa.[2] El Marci Grossi l'osserva inscambi che i epigraf tenden a trasmeter un'informazzion a tante persone con poche copie materiai del test, e che un'iscrizzion, a diferenza de un liber, la poeud vesser lensgiuda anca in manera involontaria: «l'è iscrizzion un test formulad o copiad cont el fin de spantegà una comunegazzion per rivà al numer pussee grand de letor, fin involontari, cont el numer pussee picinin de copie».[3]
Note
[Modifega | modifica 'l sorgent]- ↑ G. C. Susini-A. Donati, La scrittura esposta: i modi della scrittura romana, in G. R. Cadorna (a cura di), Sulle tracce della scrittura. Oggetti, testi, superfici dai Musei dell’Emilia-Romagna, Casalecchio del Reno (Bologna) 1986, pp. 65–78
- ↑ S. Panciera, What Is an Inscription? Problems of Definition and Identity of an Historical Source, in Zeitschrift für Papyrologie und Epigrafik 183 (2012), pp. 1–10.
- ↑ M. Grossi, Ἔγραψε δὲ καὶ τίτλον ὁ Πιλᾶτος» (Gv 19,19). Verso una nuova definizione di iscrizione, in Zeitschrift für Papyrologie und Epigrafik 197 (2016), pp. 85-95.
Bibliografia
[Modifega | modifica 'l sorgent]- Armando Petrucci, Le epigrafi. Medioevo da leggere, Einaudi, Torino, 1992
- Iscrizioni funerarie, sortilegi e pronostici di Roma antica, a cura di L. Storoni Mazzolani, [Torino], G. Einaudi, [1973]; rist. Iscrizioni funerarie romane, [Milano], BUR, [1991].