Bortol Belott

De Wikipedia
Salta a la navigazzion Và a cercà
Lumbard ucidental Quest articol chì l'è scrivuu in lombard, grafia milanesa.
El bust del Belott a Bergom

El Bortol Belott (Dogn, 26 de agost 1877 - Sonvich, 24 de luj 1944) a l'è staa 'n politegh, storich, poetta e giurista italian, minister de l'agricoltura, commercc e industria del Regn d'Italia del 1921 al 1922 in del governo Bonomi I e voeuna di figur pussee reppresentativ de la Val Brembana in del sò secol e, per estension, de tutta la bergamasca intrega.

Biografia[Modifega | modifica 'l sorgent]

Nassuu a Dogn del Ceser e de la Maria Offredi in d'ona familia de tradizion liberala, l'è iscritt al collegi vescovil a la fin di scoeul elementar e poeu a Licee Sarpi de Bergom, indova che 'l cognoss on alter important letteraa del bergamasch, el Giuseppe Bonandrini, medegh condott in la zona. L'è poeu ammess al Collegi Ghiserli de l'Università di Studi de Pavia e in del 1899 el se laurea in giurisprudenza.

El se trasferiss a Milan e 'l lavora 'me avocatt in del tribunal de la città e 'l scriv di test de giurisprudenza e de dirizz. In del 1907 el tacca a fà politega in del moviment che 'l deventa poeu el Partii Economegh, de destra liberala. L'è elegiuu consiliee comunal a Dogn e in tra el 1909 e 'l 1914 l'è consiliee comunal a Milan.

Del 1913 l'è elegiuu Deputaa a la Cambra e l'ann dopo consiliee de mandament, semper in del collegi de Dogn.

L'ha lavoraa fiss per el desvilupp economegh de la Val Brembana: l'ha vorzuu el slogament de la ferrovia de la Val Brembana finna a Piazza Brembana: rielegiuu in del 1919 del 1921 el deventa minister in del governo de l'Ivanoe Bonomi. Durant del sò mandaa el gh'è el vend de 'n area al Gabriele D'Annunzio che 'l ghe farà su el Vittoriale.

In del menter el se ferma no in la soa attività didattega e 'l scriv on trattaa in sul dirizz turistegh e 'l promoeuv di partii liberai, per poeu entrà definitivament in del Partii Liberal Italian, in di corrent cavourian. In principi moderatament a favor del fascismo, el vota la fiducia al governo Mussolini ma el tacca a criticàll poeu, e l'è donca candidaa puu in di elezion del 1924 e 'l torna donca a fà l'avocatt.

In del 1930 l'è menaa via, formalment perchè 'l voreva dervì 'na rivista cont el Bonomi ma in verità per el sò antifascismo e l'è mandaa al confino a Cava de' Tirreni, indova che 'l resta finna a la Pasqua de l'ann dopo.

El publega in del 1940 vun di liber pussee complett in su la storia de Bergom, la "Storia de Bergom e di Bergamasch", seguida poeu de 'n liber in su la storia de Dogn in del 1942. Cont el borlà del fascismo in del luj del 1943 el torna in contatt cont i omen del liberalismo italian per fà tornà Bergom a la democrazia, ma dopo di event che menen a la Republega Social Italiana l'è obligaa a scappà in Isvizzera, indova che 'l moeur dopo avè faa di event cont di esul compagn del Luigi Einaudi. Pocch mes prima de la mort i bomb di Liaa even destrugaa la soa cà meneghina e donca la soa granda biblioteca.

A la fin de la guerra el sò corp l'è menaa de Lugan a Dogn el 22 de settember 1945, indova che l'ha ricevuu i funerai solenn.

Oeuver[Modifega | modifica 'l sorgent]

L'è staa 'n autor attiv sia in lombard che in italian.

Italian[Modifega | modifica 'l sorgent]

In italian l'è staa attiv soratutt in di camp de la storia e del dirizz, i sò oeuver principai a hinn:

  • La vita di Bartolomeo Colleoni, (1923)
  • La parola di Camillo Cavour, (1924)
  • Il Dramma di Gerolamo Olgiati, (1929)
  • Una sacrilega faida Bergamasca del '500, (1934)
  • Studi colleoneschi, (1939)
  • Storia di Bergamo e dei Bergamaschi, (1940)
  • Storia di Zogno e di alcune terre vicine, (1942)

La storia de Bergom l'è stada publegada cont di ròbb pussee e di foto pussee de 'na voeulta dopo de la soa mort, per vess precis in del 1950 e in del 1990.

Lombard[Modifega | modifica 'l sorgent]

In del sò dialett bergamasch l'ha scrivuu soratutt poesia, regolda in di volumm Poesie della montagna del fiume e della valle, Poesie bergamasche e Val Brembana.

Voeuna di sò poesij pussee famos a l'è "Tèra de Bèrghem", deventaa poeu 'na sorta de inn de facto de la città orobega.

Recognossiment[Modifega | modifica 'l sorgent]

Milan e Bergom gh'hann dedicaa 'na via menter che la nativa Dogn gh'ha faa su ona statova dissegnada del Piero Brolis e del Luigi Angelini.

A Bergom gh'ha dedicaa l'Istitut Tecnegh Commercial e Peritt Aziendai.

Bibliografia[Modifega | modifica 'l sorgent]

  • Per l'inaugurazione del monumento a Bortolo Belotti nel decennale della morte, Bergamo, Stamperia Conti, 1954.
  • Giuliana Donati Petténi, Contributo per una più documentata biografia di Bortolo Belotti (Lettere di Bortolo Belotti e Giuliano Donati-Petteni), in Atti dell'Ateneo di Scienze, Lettere ed Arti,Vol. XL, 1976-1978, pp. 269–283;
  • Felice Riceputi, Storia della Val Brembana, Corponove editrice, Bergamo 1997;
  • Ivano Sonzogni, La casa natale, la villa e il parco di Bortolo Belotti a Zogno, Comune, Zogno 2002;
  • Ivano Sonzogni, Bortolo Belotti. Il pensiero e l'azione politica di un liberale nell'Italia del primo Novecento, prefazioni di Roberto Sestini, Achille Marzio Romani, Valerio Zanone e Valter Grossi, Fondazione per la storia economica e sociale di Bergamo, Bergamo 2007.
  • Bortolo Belotti, Confinati dal duce. Memorie del mio confino a Cava dei Tirreni 1930-1931, introduzione di Gianluca La Villa e postfazione di Ivano Sonzogni, Verona, Il segno dei Gabrielli, 2011.

Alter progett[Modifega | modifica 'l sorgent]

Ligamm de foeura[Modifega | modifica 'l sorgent]