Dellino Farmer

Quest articol chì l'è scrivuu in lombard, grafia milanesa.

	«Al sanch andèle vène al momènt al mànca mìga, al mè südùr l'è dat da la pasiù e la fadìga!»
	(Dellino Farmer, Sanc e sidur, 2013.)

Andrea Lorenzo Dellavedova, mej cognossuu cont el nomm d'art de Dellino Farmer (Manerbi, vundes de agost del 1988) l'è on rapper lombard.
A l'è famos per i sò canzon rap in lengua lombarda.

Biografia

Nassuu e cressuu in de la bassa bressana, giamò de quand che l'era piscinin el scomincia a interessàss a la musega e in particolar al rap. I sò primm esperienz musicai del viv a hinn de la fin di Agn Novanta.
Dopo 'n period bell longh de silenzi e de lavorà, intorna a la metà di Agn Domilla el scomincia la osa colaborazion cont el beatmaker Giovanni Rinaldi: lor duu, insemma, on quai ann dopo farann nass el progett Italian Farmer.
El progett el nass e 'l partiss de vera in del 2007-2008, quand che 'l sortiss foeura el primm demo ciamaa Dirty Vibes. Giamò in quell demo chì el Demo el scomincia a doperà el sò dialett bressan in di canzon, anca se minga in manera sistematega.
L'ann dopo el ven publicaa l'EP Dialectro, che 'l gh'ha denter di canzon compagn de P.O.T.A. e La me storia l'è diversa. Con quell lavorà chì, i Italian Farmer scomincen a vess cognossuu in de la soa provincia de lor.
In del 2010 el Dellino el publica el sò primm disch ofizial con l'etichetta milanesa Divinazione/Terzo Millennio (giamò editris de grupp tant 'me i Timoria, i Marlene Kuntz, i Audiorama e alter anmò): a se tratta de Raccolta Dialettale, che 'l fa cress anmò pussee el sucess de l'artista a nivell provincial e anca regional.
In del 2011 el fa su 'na parodia de la canzon Tranne te del Fabri Fibra, ciamada Rap Cottimistico: el mett su el video in su Youtube, e quell lì el ven vardaa de quasi 40.000 personn in d'ona settemana, e de 70.000 in del primm mes. Quell lavorà chì el ven faa passà anca in su Radio Deejay duranta la trasmission Ciao belli. Per via de 'sto sucess, el Dellino el pò fà su 'na quai sigla per la radio milanesa: quella de l'estaa 2011 e quella invernal d'on programma de la matin.
El 2012 el ved el Dellino colaborà cont el cantant e cabarettista bressan Piergiorgio Cinelli: el nass inscì el disco Trenta Piò. La canzon de ponta a l'è A Oflaga (cover de la canzon In Italia del Fabri Fibra), che la ciappaa anca lee on quai sucess.
L'ann dopo l'è pien de impegn per el Dellino: prima de tutt el sortiss foeura el sò primm progett discografegh indeperlù, cioè el mixtape Provincia Meccanica; inoltra el fa ona colaborazion in del disch Noseconossemo del cantant veneto Hermann Medrano, insemma a artista compagn de Caparezza, Roy Paci, Natalino Balasso, Oliver Skardy. Invers a la fin de l'ann el tira foeura on singol noeuv, ciamaa Sanc e sidur (Sangh e sudor). Per el 2014 a l'è prevista ona colaborazion cont el cantant roman Er Piotta. Intrattant el seguta la soa atività live in gir per la Lombardia, ma soratutt in de la Provincia de Bressa.
Semper in del 2014 el ven foeura el noeuv album Biorap, che 'l gh'ha dent canzon in lombard (e i singoi Come i panda, Sanc e sidur, 20-25-30 e Gli strani effetti del clima) e in italian.
In del 2015 vegnen foeura i singoi F.E.S. (parodia de P.E.S. di Club Dogo), cantada cont el Piergiorgio Cinelli e Welcome to Padania; inoltra sortissen anca el video de Trenta piò e quell de Gli strani effetti del clima. In del principi del 2016 el sortiss el singol Sa tromba mai, che 'l preced de 'na quai settemana l'album noeuv, ciamaa Riciàpet.

El s'è candidaa ai elezion politegh italian del 2018 per la Cambra di Deputaa insemma al Moviment 5 Stell a l'uninominal de Roman.

Discografia

Demo

Dirty Vibes (2008), comè Italian Farmer.

EP

Dialectro (2009), comè Italian Farmer.

Album

Raccolta dialettale (2010), comè Italian Farmer.
Trenta piò (2012), cont el Piergiorgio Cinelli.
Provincia meccanica (2013), solista.
Biorap (2014), solista.
Riciàpet (2016), solista.
Riciàpet 2 (2017), solista.
The Best-ia (2018), solista.

Singoi/Video

La me storia l'è diversa (2009).
P.O.T.A (2010).
Piazza Italia (2010).
Troppo Rurale (2011).
Rap Cottimistico (2011).
A Oflaga (2012).
Mi-VE (2013).
Sanc e sidur (2013).
20-25-30 (2013).
Come i panda (2014).
FES (2015).
Trenta piò (2015).
Gli strani effetti del clima (2015).
Welcome to Padania (2016).
Sa tromba mai (2016).
Me vegne da la basa Caparezza tribute (2016).
La Ö la Ü (2018).
Il trattorista (2018).

Vos corelaa

Ligamm de foeura