Calvairaa
Calvairaa (Calvairate) l'è on quarter de Milan, a sud-est del center istoregh, arent al stradon Corso 22 Marzo-Viale Corsica, che 'l colega al center de la città a l'areoport de Linaa, e poeu in direzion sud (per esempi invers a piazzale Vincenzo Cuoco). El fa part del Municipi 4.
Storia
[Modifega | modifica 'l sorgent]El someja che 'l nomm el vegna del latin Mons Calvarius, perchè lì arent a gh'era ona collinetta sora la qual a gh'era ona cappella con su on quader del calvari[1].
In del Medioev el paes l'è staa denter a la piev de Segraa, ma poeu el se n'è destaccaa, e l'è passaa ai dipendenz de la gesa de San Steven a Milan. La soa gesa l'è deventada parocchia in del 1576, dopo de la visita de San Carlo Boromee.[2].
Finna al 1873 l'era on borgh di Corp Sant de Milan (quei de Porta Oriental), cioè quell comun nassuu in del 1757 che 'l tegniva dent tucc i paes che se trovaven appena foeura di mur spagnoeu milanes.
Al dì d'incoeu l'è on quarter soratutt residenzial e popolar: del vegg paes l'è restaa proppi negott.
El centro del vegg paes a l'è quella che al dì d'incoeu la se ciama Piazza Ferdinando Martini (lì arent de fatt a gh'è anmò la via Calvairaa).
In del Parch Marinai d'Italia gh'è staa, del 1911 al 1969 el noeuv Verzee. La parrocchia del paes a l'era la gesa de Santa Maria del Suffragio, che l'è stada fada in del 1577, trada giò e fada su amò del tutt in d'on alter sitt in del 1896 e che on temp la se ciamava Gesa de Santa Maria che la Nass.
Minga delongg de Calvairaa a gh'era la Senavra. Inoltra, la caratteristega pussee importanta de Calvairaa, almanch in del Vottcent, l'eva el fatt che lilinscì a gh'era la giazzera pussee granda de Milan.
