Porta Vittoria

Quest articol chì l'è scrivuu in lombard, grafia milanesa.

Quella vos chi la gh'ha mìnga dì font o a hinn tròpp pocch. Per piesè, gionta di font a la vos.
Per avè on'ideja di alter vos senza font, vardee chichinscì.

Porta Vittoria, cognossuda in lombard anca 'me Porta Tosa (italian: Porta Vittoria, fina al 1861 Porta Tosa) l'eva vuna di port de Milan.
La se trovava a est del centro, in sui Bastion e in su la strada che la menava a Limed, e incoeu la va drizza fina a l'areoport de Linaa. L'era situada a sud de Porta Venezia e a nord-est de Porta Romana.
A someja che l'abbia ciappaa el sò vegg nomm del fatt che in de vun di sò bassrilev (al dì d'incoeu conservaa al Castell Sforzesch) a gh'era la figura de ona tosa che l'era dree rasàss lì giò in bass.
In del 1861, con l'Unità d'Italia, gh'è staa cambiaa el nomm per regordà la battaja che l'era stada fada lilinscì ai temp di Cinch Giornad, quand i Austriegh eren scappaa proppi de lì.
On temp, arent a la porta a gh'era on canal che 'l nasseva del Navili milanes e 'l sortiva foeura de la città e l'andava invers al Lamber in direzion de Malnoè. Foeura di Bastion a gh'era anca el Redefoss, i paes de Calvairaa, Morsencc, Talied e Pont Lamber (oltra che de Malnoè) e la Senavra.

La porta l'è stada trada giò a la fin del Vottcent per lassà el spazzi al monument ai Cinch Giornad del Giuseppe Grandi; al dì d'incoeu resten ammò i duu casei del dazzi. La porta la ghe da el nomm al cors che 'l partiss minga lontan del Verzee e 'l riva fina a la Piazza 5 Giornad (là indè che gh'era la Porta), e indove gh'è la Camera del Lavorà e 'l Tribunal de Milan.

Alter progett

Wikimedia Commons el gh'ha dent imagin o alter archivi su Porta Vittoria

Vos corelaa