Rogoree

De Wikipedia
(Rimandad de Rogored)
Lumbard ucidental Quest articol chì l'è scrivuu in lombard, grafia milanesa.
La gesa de Rogored
«Quell che son dree a cuntàvv l'è ona storia vera

de vun che l'è mai staa bon de dì de nò.
I s'eren cognossuu visin a la Breda:

lee l'era de Rogored e lù el soo nò.»
(Enzo Jannacci, Andava a Rogoredo, 1964)

Rogored (Rogoredo) l'è on quarter de Milan.
El se troeuva al confin sud-est de la città e 'l toeu part al Municipi 4. El confina con San Donaa a sud-est, Nosed a est, Morsengg a nord e Corvett a nord-ovest. L'è lontan pù o manch sett chilometri del centro. Lì arent la scomincia l'autostrada (la tangenzial Est).

Storia[Modifega | modifica 'l sorgent]

El nomm del paes el vegn del fatt che on temp lilinscì gh'era on bosch de rogor. El ven nominaa per la prima volta in d'on document del 880.

L'è staa on comun indipendent per on bell poo de temp: al temp di piev el partegniva a la Piev de San Donaa. Ai temp de Napoleon (1811-1816) l'è staa taccaa insema a San Donaa al noeuv comun de Viboldon; quand hinn tornaa i Austriegh l'è staa destaccaa de Viboldon e giontaa a Nosed.

In del 1870 però l'è staa taccaa de noeuv a on alter comun, quell de Ceravall (insema a Nosed): in del 1923 Ceravall, con tutt i sò frazion, la passa a Milan, e inscì l'è anca al dì d'incoeu.

Rogored, a partì del 1880 l'ha viduu nass prima ona tranvia (Milan-Lod) e poeu ona stazion de treni: quella chì l'è vegnuda la robba pussee importanta in quell borgh. Hinn vegnuu foeura anca di industri.

In del 1991 gh'è stada fada ona stazion de la metropolitana; on quai ann dopo gh'è vegnuda anca la sede noeuva de SKY Italia.

Vos corelaa[Modifega | modifica 'l sorgent]