Và al contegnud

Nazzionalism lombard

De Wikipedia
(Rimandad de Autonomism lombard)
Lombard Quest articol chì l'è scrivud in lombard, con la Noeuva Ortografia Lombarda
Vedrína
Vedrina
Vedrina
 Quest articol chì l'è in la Vedrina de la Wikipedia Vedrina
"Allegoria de la Lombardia" del Giovanni Baratta.[1]

El nazzionalism lombard l'è l'idea politega che la considera la Lombardia, de intender 'me concet etno-storegh o 'me region ministrativa, come una comunità nazzional e la scerca de portà inanz la promozion e la defesa de la soa identità e di so interess.[2][3][4]

El moviment el se spartiss principalment in tra la la banda autonomista (autonomism lombard, con di ligam cond el federalism italian) e quella independentista (indipendentism lombard). I do posizzion inn minga separade del tut, tant che pussee de una vœulta a l'è vegnuda fœura un'ideologia unega che la messeda di element independentista e autonomista (ciamada de un quajvun "autogovernism") e, a bon cunt, se pòden considerà storegament compagne.[5][6]

G'è anca una part che la fà di reclamazzion domà de orden economegh e social (senza considerazzion specifega de nazzionalità), che despess la varda domà a la region aministrativa italiana.[7]

Storia

[Modifega | modifica 'l sorgent]

Prima de l'unifegazzion italiana

[Modifega | modifica 'l sorgent]
Mapa de la Republega lombarda insubida del Ranza

I riferiment pussee vegg a un'unità nazzional lombarda se poeuden trovà a la fin del XVIII secol con la creazzion de la Republega Cispadana e despoeu de quella Cisalpina, quand che el politegh piemontes Carlo Botta l'ha scrivud el liber "Proposizione ai Lombardi di una maniera di governo libero", indove che 'l diseva che la Lombardia (ciamada despess in del liber Nazione Lombarda) l'avaria dovud dotàss de na costituzzion independent da quella francesa d'ispirazzion revoluzzionaria[8]. Semper in quei agn li, intra i partecipant al concors de l'Aministrazzion Sgeneral de la Lombardia dal nom "Quale dei Governi liberi meglio convenga alla felicità d'Italia?" per la creazzion di proposte per la noeuva costituzzion cispadana, gh'è de manzonà el proget de carta costituzzional del Giuseppe Faroni intitolad "Polo Costituzionale per la Repubblica Lombarda", indove a l'è mai doperad el termen "Republega Cispadana"[9].

In del midem period el prevet giacobin piemontes Giovanni Antonio Ranza, in del Vera idea del federalismo italiano, l'insubiss de fà su i Stat Liber federai d'Italia, de ispirazzion francesa, che gh'havarien havud dent el Ducad de Milan austriegh, i baliagg svizzer in Italia, i Grison, Modena, Resg, Parma, Piasenza, Berghem. Bressa, Crema e Verona.[10]

I prim moviment, pussee organizad, per l'independenza de la Lombardia vegnen fœura in del period del governa austriegh, e eren despess sociad ai moviment federalista italian, desgià che la pupart di federalista lombard la considerava la Lombardia pussee 'me 'na nazzion che 'me 'na division ministrativa, e 'l midem sentiment a l'era spantegad anca in di ambient patriotegh e in di so produzzion, 'me la preghiera satirega "Pater Noster dei Milanesi" che la dis "Che vegga Italia e la nazion lombarda stesse ad un patto"[11].

I prim mot lombard, eren, a bon cunt, pussee autonomista che independentista italian e domandaven una Lombardia autogovernada in l'Imperi d'Austria e tancc patriota, 'me el Carlo Catani, a eren contrari a l'intervent di piemontes e a la anession che l'è vegnuda dopo, anca se gh'eren di component a favor de l'anession a la Sardegna[12][13].

Sgiamò in del 1815 el Carlo Porta el sperava in l'independenza lombarda, anca se l'ha preferid el governa austriegh a quell franzes, de che l'era un ferm opositor[14][15].

Regn d'Italia e autonomism milanes

[Modifega | modifica 'l sorgent]
I mòti de Milan del 1898.

Di temp del massacher de Bava Beccaris in del 1898 i font rivade al govern parlaven de un moviment per fà su ancamò el Stat de Milan in Lombardia. 'Sti vos eren probabilment esagerade, ma in del midem period el Filippo Turati, esponent socialista, l'haveva espress l'ideja de 'n Stat lombard governad di lombard, vist i diferenze, a nivell economegh, social e de responsabilità, intra el Nord e 'l Sud del Paes, ispirad anca de la soa contrarietà al Francesco Crispi,[16] diferenze che l'Eugenio Torelli Viollier, el fondator del Corriere della Sera, el gh'haveva evidenziad sgiamò el dì despœu di repression militari del govern italian, quand che 'l diseva che i proteste i eren no domà socialista, ma anca autonomista[17]. St'ategiament di socialista italian a l'era criticad di element socialista e federalista de la Bassitalia 'me el Gaetano Salvemini.[18]

El Dario Papa, republegan e autor de un giornal mazzinian, l'ha sostegnud in su L'Italia del Popolo la necessità de fà su 'sto Stat de Milan, in d'un proget inspirad al federalism de la Svizzera vorsud cinquant'agn prima del Carlo Cattaneo e ai ideai de liberalism, invers al statalism spantegad in Meridion.[16] A Milan, intant, cressen i ideie del municipalism in la pupart di partid e in del 1914 i elezzion ministrative inn vengiude di socialista, cont un programma municipalista e per el des'centrament ministrativ.[19][20]

In del 1895 el giornal "Il Mattino di Napoli", in respœusta al desideri autonomista, el sponsoriza 'na secession de la Bassitalia cont di articoi assee difamatori in di confront di lombard, e i giornai lombard ghe responden che se gh'è de fàlla, la secession, bisògna fàlla, e in del midem ann scomenzen di manifestazzion contrarie al governa central e i so tasse.

In del 1913, in ocasion di scioper che hann menad el Regn d'Italia a mœuver 30'000 soldad pussee giornai american e canades, el pussee important el The New York Times,[21] hann did che:

«I leader [del moviment] inn dree a incoragià i ideje separatista, e disen che la Lombardia, la region la pussee prospera, l'è ingiustament forzada a sostegnì i zone pussee povere del Sud»
(The leaders are encouraging the separatist ideas, arguing that Lombardy, a most prosperous region, is being unjustly forced to support the poorer districts of the South[22])

Republega italiana

[Modifega | modifica 'l sorgent]
Umberto Bossi, fondator de la Liga Lombarda, in del 1990 a Pontida.

Dopo de la fin de la Segonda Guerra Mondiala el nass el Moviment Autonomista Bergamasch, che in del 1956 el deventa un partid organizad a nivell regional, el Moviment Autonomista Regional Lombard, e 'l tœu part ai elezzion comunai de Berghem e 'l ciapa el 1,96% di vot, o ben 1239 preferenze. [23]

In del 1958 el tœu part ai elezzion politeghe 'me Moviment Autonomista Regional Padan, che 'l dimandava l'istituzzion de la Region Lombardia 'me Region Autonoma del Stat Italian, istituzzion pœu fada in del 1970, 22 agn despœu che l'è stada promulgada de la Costituzzion e 'l ciapa el 0,24% di vot, o ben 70'589 preferenze.[24][25]

El moviment independentista el deventa però mai un partid de massa fina al 1982 cont el nass de la Liga Lombarda, un partid de ciar stamp autonomista, anti-partitocrazzia e independentista, fiœula de n'union autonomista nassuda in del 1979. In del 1989 la tœu part a la Liga Lombarda - Alianza Nord che la fonda i bas per la Liga Nord, partid che 'l preferiss pontà a l'independentism padan, senza però renonzià a quell lombard finna al 2018, cont el bandonà de tucc i ideie secessionista de part del secretari federal Matteo Salvini[26][27], dopo un period de ambiguità de pu o manch cinch agn.[28]

Statova de bronz de una sgiovena guerrera lombarda. Monument a la defesa de Casal Monfrad, Francesco Porzio, 1897

In del 2006 el Robert Formigon el nonzia de dervì una tratativa cont el governo in bas a la Costituzzion, a domandà la competenza esclusiva in su 12 materie concorrente. [29] In del 2007 el governo Prodi II e la Region firmen 'n acord preliminar, ma poeu cont el governo Berlusconi IV el se ferma tusscoss.

In del 2013 el nass el moviment CoLoR 44[30] cont la mira de favorì 'na mozzion per un referendum in su l'autodeterminazzion lombarda[31]: la Provincia de Bressa, cont el suport de la magioranza de center-destra e del Giulio Arrighini, e quèlla de Lech, in d'ona version domà autonomista, la voten.[32][33]

El percors de la mozzion el mena al referendum consultiv per l'autonomia del 2017, che l'ha fad, in sui media, parlà de la question anca per la svesinanza temporala cont el referendum per l'independenza de la Catalogna del 2017[34] anca se tecnicament a l'era in su 'n quesit assee diferent, quell catalan in su l'independenza e quell lombard in su l'autonomia in 23 materie, e quell lombard a l'era recognossud del govern central.[35]

El referendum el ved n'afluenza del 38,5%, cont el Veneto che 'l supera el 57%, e l'è no donca retegnud un particolar sucess, anca se 'l permet a la Gionta del Roberto Maroni de dervì i tratative cont el governo Gentiloni.[36][37]

Cont i contemporanee elezzion statai e regionai del 4 de marz 2018 e l'elezzion del nœuv president lombard Attilio Fontana cont la nomina del Stefano Bruno Galli 'me Assessor a l'autonomia la tratativa la se ferma in atesa del nœuv governo italian. [38]

El nœuv governo, fiœul de 'n acord intra Liga e M5S, el nomina la Erika Stefani 'me Minister di Afar Regionai e di Autonomie, che la se impegna a dà l'autonomia prevista de la Costituzzion a la Lombardia e al Venet. [39] Quand che el governo el borla sgiò e 'l va su el Conte Bis l'autonomia la va foeura di programa, ma la torna in del governo Draghi, che però l'è no bon de portàlla a termin prima de borlà sgiò anca lu.[40].

In di elezzion del 2022 el vinc el center-destra, che in del so programa el gh'ha l'autonomia diferenziada, e la noeuva premier, la Giorgia Meloni, la promet in del so prim descor a la Cambra di Deputad de fàlla.[41]

In l'otover 2022 di esponent ligad a la veggia Liga, guidad de l'ex assessor Gianni Fava, dann vita a 'n noeuv moviment, ciamad Moviment Autonomista Lombard, con l'obietiv de presentàss in di elezzion regionai che vegnen.[42]

Simboi

[Modifega | modifica 'l sorgent]
Per savenn pussee, varda i articoi Simboi de la Lombardia e Bandera del Nord Italia.
El Monument al Guerrer de Legnan, prima simbol del MARL e pœu de la Liga.

El nazzionalism lombard el gh'ha no di simboi univoch che inn compartid de tucc i partid.

El pussee famos al dì d'incœu a l'è la statua al Guerrer de Legnan, despess sociada per eror con l'Albert de Giussan, che a l'è comparsa per la prima vœulta in del 1959 in sul giornal La Regione Lombarda, orghen oficial del MARL[43][44]. Doperad sucessivament 'me simbol de la Liga Lombarda, a l'è deventada pœu simbol de la Liga Nord e incœu a l'è retegnud asquas esclusivament un simbol leghista.[45].

La Cros de San Sgiorg a l'è retegnuda de solet un simbol de la pupart di independentista lombard[46][47], anca se di moviment hann defendud el Ducal[48], o ben la bandera stòrega del Ducad de Milan, la Rœusa Camuna[49] o 'na bandera ispirada a quèlla di volontari federalista lombard del 1848, cont la Cros de San Sgiorg in d'on camp verd.[50][51] Gh'è anca l'ipotesi de doperà una bandera con dent insema la Cros de San Sgiorg e 'l Bisson Viscontee[52].

Moviment independentista lombard

[Modifega | modifica 'l sorgent]
Coreografia independentista cont el fœugh.

Gh'è un poo de moviment che vœuren l'independenza de la Lombardia, ma poch inn ativ incœu, e vann ideologicament dal liberalism a la destra, di vœulte estrema.[53]

Incœu el moviment pussee ativ a l'è Pro Lombardia Independenza: centrista e de inspirazzion liberal.[54]

A sostegnì l'independenza lombarda a gh'è anca di alter partid pussee piscinit 'me Indipendenza Lombarda, entrad in Grande Nord, Fronte Indipendentista Lombardia, Grande Lombardia e Identità Oltrepò, cont el ultem mia panlombard, ma domà cont di mire independentisteghe mia lombarde storeghe.[55][56]

Storicament se pò regordà Domà Nunch, moviment ecologista e independentista che l'è deventad 'na sociazzion[57], Avanti Lombardia, entrad pœu in Pro Lombardia[58] e la Liga Lombarda, incœu sezzion regionala lombarda del partid nazzionalista italian de destra[59] Liga Nord che l'ha scernud de mantegnì el so simbol e nom.[60]

Anca di sociazzion de coltura e de economia hann suportad l'independenza o l'autonomia, 'me Terra Insubre, Brescia Patria, Terre di Lombardia, che la ved la participazzion del Gianni Fava[61], 300 Lombardi e 'l Tea Party Lombardia, che 'l ved in l'independenza na manera de liberàss di volte tasse italiane[62][63][64].

In de la literadura lombarda

[Modifega | modifica 'l sorgent]

Sgiamò el Carlo Porta el mostrava di penser nazzionalista in la soa poesia[65], con l'esempi classegh de "Paracar che scappee de Lombardia" indova che 'l parlava di domini forester 'me di boja che scannen la Lombardia, intra i che, dop di problema del governo napoleonegh, se podeva gnanca vesser indeferent, ma anca in de La Ninetta del Verzee el parlava sgiamò del besogn de un governo che 'l fuss no né la Franza, né la Spagna e né l'Austria, representad del Sciampagn, de l'Alicant e del Tocaj, con pœu una metafora assee autodeterminazzionista, el var a dì "per el stomegh d'on bon Milanes, ghe va robba del noster paes". In la poesia A certi forestee che viven in Milan el se mostra propi indiferent in sui italian, che 'l ved 'me forester, e 'l dubita del Stat che 'l Napoleon l'haveva formad e de la necessità de fàll su cont i mort.[66]

In la novella L'Anarchich ricostituent del Luis Pavia el personagg principal del "Seghizz" a l'è propi contra el centralism di sabàud e 'l fa, in pratega, un manifest contra el centralism e a favor del federalism, del municipalism e de 'na renonzia ai principi del nazzionalism.

Riferiment

[Modifega | modifica 'l sorgent]
  1. ↑ Descrizion: Una bella fomna cond un vestid verd decorad d'or e arsgent; ind la man dreccia la tegn la corona imperiala d'arsgent, in quella manzina un bazzil cond tante corone ducai d'or. A la dreccia, arent ai pè, el fium Po, o ben un om vegg biot, con barba e cavei longh, cond una corona d'or (come variazion, el poeu havégh una crapa de tor); posgiada in banda un'urna de la qual la ven foeura tanta agua che la se spartiss in set ram, e ind la man manzina una cornucopia. Iconologia di Cesare Ripa - Lombardia 1603
  2. ↑ l movimento per la Lombardia indipendente
  3. ↑ La Lombardia Storica
  4. ↑ “Salut Lombardia!” I deliri del movimento nazionalista lombardo
  5. ↑ Come Berlusconi ha inventato il primato di Milano. URL consultad in data 3 aprile 2022.
  6. ↑ l'Italia dice sì al referendum del Veneto
  7. ↑ Da Tea Party Italia a Tea Party Indipendenza?
  8. ↑ Carlo Botta - Biografia
  9. ↑ Polo Costituzionale per la Repubblica Lombarda
  10. ↑ Ranza Giovanni Antonio, Vera idea del federalismo italiano. Opuscolo rivoluzionario del repubblicano Ranza, 1797.
  11. ↑ Pater Noster dei Milanesi
  12. ↑ Cattaneo, Carlo - Enciclopedia dei Ragazzi
  13. ↑ Savoia o federalismo? La svolta centralista nelle Cinque giornate della Milano insorta
  14. ↑ Carlo Porta, grande poeta italiano di lingua milanese
  15. ↑ Monumento a Carlo Porta
  16. ↑ 16,0 16,1 Fu Milano a tentare la prima secessione dall'Italia. E lo fece la sinistra!
  17. ↑ Autonomia: da due secoli sogno lombardo
  18. ↑ Federalismo, socialismo e questione meridionale in Gaetano Salvemini
  19. ↑ CENT'ANNI FA IL PRIMO SINDACO SOCIALISTA A MILANO
  20. ↑ Milano e la borghesia degli imprenditori
  21. ↑ MORE MILAN RIOTS; 30,000 TROOPS OUT; Strike Leaders Demand the Separation of Lombardy from Rest of Italy.
  22. ↑ Test del giornal
  23. ↑ The Movimento Autonomista Bergamasco and the Lega Nord: continuities and discontinuities
  24. ↑ Che cosa vuole il M.A.R.L.
  25. ↑ E Guareschi bacchettò Calderoli (nonno)
  26. ↑ Lega Nord, dizionario di Storia
  27. ↑ Salvini: "Nel 2018 la Lega non parla più di secessione"
  28. ↑ Lega Nord, la base chiede ancora la secessione a Salvini: “Ok il consenso, ma non dimenticare il tuo popolo”
  29. ↑ Così la Lombardia sarà autonoma - 29 de luj 2006
  30. ↑ Iniziativa per tutti i lombardi e non di una parte politica
  31. ↑ Autodeterminazione del popolo lombardo, dura risposta del comitato CoLoR44
  32. ↑ Indipendenza Lombardia: il consiglio provinciale di Brescia approva la mozione per referendum
  33. ↑ Approvata la risoluzione Color44: anche Lecco chiede il referendum per l'autonomia lombarda
  34. ↑ Dal Pirellone alla Laguna: indipendentismo lombardo-veneto
  35. ↑ Beyond Catalonia: pro-independence movements in Europe
  36. ↑ Il Veneto supera il quorum (57,2%), Sì al 98,1%. Lombardia, affluenza del 38,5%
  37. ↑ Regione Lombardia, ecco i 6 punti della trattativa con Roma sull'autonomia
  38. ↑ Autonomia, Regione Lombardia: "Ripartiranno le trattative col nuovo governo"
  39. ↑ Il ministro Erika Stefani: "Realizzerò l'autonomia di Veneto e Lombardia". Bonaccini: "E l'Emilia?"
  40. ↑ Autonomia per il Veneto: cinque anni e quattro governi dal referendum, senza portare a casa nulla
  41. ↑ Governo, Meloni: "Io underdog, stravolgerò pronostici. Farò quello che va fatto"
  42. ↑ Nasce il “Movimento Autonomista Lombardo”
  43. ↑ Il simbolo del Carroccio? Nacque prima della Lega (lombarda)
  44. ↑ I segreti dello spadone da Giussano
  45. ↑ La storia del simbolo della Lega Nord
  46. ↑ The many Crosses of St. George
  47. ↑ Croce di San Giorgio: la bandiera dei lombardi
  48. ↑ Il ducale simbolo dell'Insubria non è inventato
  49. ↑ Collettivo Avanti: Rosa Camuna la nostra bandiera
  50. ↑ Proposta per una bandiera lombarda
  51. ↑ A flag for Northern Italy
  52. ↑ Bene la bandiera lombarda, ma niente "italianate"
  53. ↑ Cosa c'è dietro la crescente voglia indipendentista in Lombardia
  54. ↑ Il movimento per la Lombardia indipendente
  55. ↑ Arrighini e quel sogno chiamato Grande Nord
  56. ↑ Autonomia territori. Identità Oltrepò invitata al Congresso dell'Union Valdotaine
  57. ↑ Autonomisti e verdi, ma non leghisti. Nelle terre varesine nascono i Domà Nunch
  58. ↑ AVANTI LOMBARDIA CONFLUISCE IN PRO LOMBARDIA INDIPENDENZA
  59. ↑ Le giravolte della Lega di Salvini sono pura tattica. Parla Carlo Lottieri
  60. ↑ Maroni: "Via 'Nord' dal simbolo? Qui siamo la Lega Lombarda"
  61. ↑ Terre di Lombardia - Giannifava.org
  62. ↑ Omaggio del siciliano Buttafuoco agli irriducibili di Terra Insubre
  63. ↑ Brescia Patria in piazza per le «dieci giornate»
  64. ↑ Nasce a Cavaria “300 Lombardi” associazione per l'Indipendenza della Lombardia
  65. ↑ "Carlo Porta, un campione di lombardismo"
  66. ↑ La patria del Porta (ovvero: contro le forzature nazionalistiche)

Bibliografia

[Modifega | modifica 'l sorgent]
  • Napoleone Colajanni, L'Italia nel 1898: Tumulti e reazione (1898), Milano, Società Editrice Lombarda, 1898.
  • Guido Calderoli, Zibaldone autonomista d'un montanaro bergamasco, Bergamo, Tip. TOM, 1958, pp. 278.
  • Anselmo Freddi, Breve storia del MAB, Bergamo, Tip. F.lli Carrara, 1963, pp. 23.
  • Romano Bracalini, Brandelli d'Italia. 150 anni di conflitti Nord-Sud, Bergamo, Rubbetino, 2011.
  • Gilberto Oneto, Marco Bassani, La questione settentrionale: la Padania fra mito, storia e realtà, 2008.
  • Luigi Pavia, El miracol de Carabolla e alter novell in milanes, Bergom, 1921.

Vos corelade

[Modifega | modifica 'l sorgent]
v · d · m
Autonomism, autogovernism, federalism e independentism lombard
PersonalitàCarlo Porta · Carlo Catani · Felip Turaa · Guido Calderoli · Giulio Bergmann · Gianfranco Miglio · Umberto Bossi
Partid Moviment Guelf de Azzion · Moviment Autonomista Bergamasch · Moviment Autonomista Regional Lombard · Liga Lombarda · Lega Alpina Lumbarda · Liga Nord · Domà Nunch · Pro Lombardia
Event storegh Rivoeulte in Vall Camonega (1809) · Cinch Giornade de Milan (1848) · Comission Giulini (1859) · Quater Giornade de Milan (1898) · Scioperi in Lombardia (1913) · Referendum autonomista (2017)
In la literadura Stat de Lombardia (1746) · Brindes de Meneghin a l'Ostaria (1810) · Paracar che scappee de Lombardia (1814) · A certi forestee che viven in Milan (1816) · Noeuva canzonetta di tulipan (ca. 1870)
Roba ligada Independentism padan · Federalism italian · Lombardia storega · Simboi de la Lombardia · Liga Lombarda
Utegnüü da "https://lmo.wikipedia.org/w/index.php?title=Nazzionalism_lombard&oldid=1290816"