Và al contegnud

Moviment Guelf de Azzion

De Wikipedia
Lombard Quest articol chì l'è scrivud in lombard, con la Noeuva Ortografia Lombarda

El Moviment Guelf de Azzion (Movimento Guelfo d'Azione in italian) a l'è stad un moviment politegh italian fad su in del 1930, in del mez del regim fassista, part del moviment del neoguelfism.

Storia[Modifega | modifica 'l sorgent]

A l'è fondad in del 1930, cont i prim bas mitude sgiò in del 1928, de l'inconter de vari catolegh democrategh e antifassista, compagn di milanes Pietro Malvestiti, Gioacchino Malavasi, Armando Rodolfi, Gaetano Carcano e Enrico Falk e di bressan Pietro Cenini, Andrea Cazzani, Angelo Pina e Oliviero Ortodossi. Tachen a spantegà di sgolantin cont el so manifest "Cristo Re e 'l Popol", dad foeura in di quarant'agn de l'enciclega Rerum Novarum, ma inn becad di autorità e in d'un gran process el Tribunal Special per la Sigurezza del Stat el condana el Malavasi, el Malvestiti, el Rodolfi e l'Ortodossi, e l'è stada la prima voeulta che 'l regim l'è andad adree a l'oposizzion catolega in manera inscì dura.

El torna ativ in del 1938, ancamò centrad in Lombardia, grazzia a l'aprovazzion di lesg razziai e de 'n opression pussee de la Gesa. Inscì, el se liga a sgent compagna del sindacalista Achille Grandi, de l'Alcide De Gasperi e del Primo Mazzolari.

In del 1941, dann foeura el so programa, convint che 'l ghe saria stad un dopo regim, fondad in sul regionalism assee largh, un parlament europee e la partecipazzion di operari a l'azzionariad di aziende. In l'estad del 1942 a gh'è una conferenza per provà a fà su un noeuv partid, a ciapà quell che restava del Partid Popolar Italian del don Sturzo, roba che la mena al nasser de la Democrazzia Cristiana e al so programa de Milan, ispirad a quell di Guelf e, cont el borlà del fassism el 25 de luj 1943 el Moviment el se desliga del tut, con l'andà dent in la noeuva DC.

In del 1943, comunque, la pupart del moviment bressan la lassa, cont el fà su de "Comunità Noeuva", che la ciaparà part anca a la Resistenza.

Riferiment[Modifega | modifica 'l sorgent]