Guido Calderoli

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.

El Guido Calderoli (Locadell, 19 de giugn 1885 - ...) a l'è staa 'n medegh e politegh italian.

Biografia[Modifega | mudìfica 'l sorgènt]

Fioeu de Antoni e de Brigida Carenini, in del 1921 el se laurea a Vienna 'me cavadent e 'l tacca a lavorà in del settor, finna a formà 'na vera e propria "dinastia" de cavadent in la bergamasca, de la che 'l fa part anca el sò nevod Robert Calderoli. Dopo de la segonda guerra mondial e con la redazion de la Costituzion italiana republegana el se impegna in d'on moviment de opinion in favor de l'autogoverno lombard e de l'istituzion de la Region Lombardia, e pussee in general di tutt i region, previst de la Costituzion ma minga istituii finna al 1970. El riva a risià a distanza finna cont el Giovannino Guareschi, convint che se i autonomij fussen staa applicaa la ghe saria stada 'na deriva secessionista, menter che luu el pensava che fussen 'na natural conseguenza de l'antifassism.

El tacca a partecipà in di agn '50 cont di professionista de la bergmasca ligaa al Partii Republegan Italian a di Grupp Autonomista Bergamasch, formalment desligaa di partii politegh, che domandaven de istituì a la svelta 'sti reson chi e in del 1956 el deventa 'n partii, el Moviment Autonomista Bergamasch, cont on simbol de 'n omm che 'l s'ceppa in cadenn del centralismo roman, e che 'l ved el Calderoli elegiuu al consili comunal de Bergom e 'l sò collega Ugo Gavazzeni elegiuu a la Provincia.

In del 1958 el da origin al Moviment Autonomista Regional Lombard, con l'obietiv de unì tucc i moviment autonomista de l'area padana, che a fevree l'è offizialment fada e ciamada Moviment Autonomista Regional Padan. Anca se la coalizion l'ha otegnuu nissun scagn al Parlament l'ha faa parlaa fiss in di giornai de l'epoca. El borlà del numer di vot l'ha menaa la pupart di autonomista a giontàss in di fir de la Democrazia Cristiana.

L'ha coniaa di mott che hinn staa poeu doperaa anca in la Liga Nord compagn de "Bergamo Nazione tutto il resto Meridione" e la famosa immagen de la gainna di oeuv dor che hinn robaa de Romma.

Pensee politegh[Modifega | mudìfica 'l sorgènt]

Italia[Modifega | mudìfica 'l sorgènt]

El Calderoli a l'era per l'autogoverno ma minga per l'independenza: de facc el retegniva che 'l federalism e i autonomij fussen la manera la pussee bona per sigurà 'n futur a l'Italia e i sò descor antimeridionalista eren part de 'na retorega patriottega per la che 'n Italia indova che i sgent gh'even de scappà di sò regionn per viv a l'era 'n Pajes debol.

Antifassism[Modifega | mudìfica 'l sorgènt]

El retegneva che 'n sistema autonomista, contrari rispett a quell centralista di fassista, el fuss on sistema natural per l'Italia post fassista, tant che 'l sò Moviment el se ispirava direttament a di programma de la Resistenza italiana compagn de quell del Moviment Guelf d'Azion e 'l diseva che 'n Pajes centralista, anca se a l'apparenza democrategh, l'era semper pussee a ris'c de 'na deriva dittatorial rispett a voeun federal.

Democrazia Cristiana[Modifega | mudìfica 'l sorgènt]

El Calderoli, cattolegh, el doperava 'sto element 'me roba de propaganda e 'l deciarava de pensàlla per la pupart di ròbb 'me la Democrazia Cristiana, foeura che per la question de l'autonomism, vorzuu del Partii Popolar Italian del Luigi Sturzo ma minga de la DC, che lu el retegneva donca traditor.

Lavorà medegh[Modifega | mudìfica 'l sorgènt]

Wikiquote-logo.svg
«Tóle mia fó se no te dièntet ècc e balóch»
(Adasi del Guido Calderoli in sui tonsill, in bergamasch)

In del sò lavorà medegh el s'è occupaa soratutt di tonsill e de la tonsillectomia, con la convizion che l'eliminazion di tonsill senza 'na bonna ragion la fuss 'na pratega dannosa e che la faseva dagn ai personn.

Oeuver[Modifega | mudìfica 'l sorgènt]

  • Il problema tonsillare è problema sociale e di razza : ipotonsillaresimo, Bergom, 1940
  • Il sottosesso nei popoli senza tonsille : le conseguenze sociali della moda della tonsillectomia. Il male inglese di Bicknell. Popoli senza tonsille. Stanchezza e sottosesso, Bergom, 1954
  • Zibaldone autonomista d'un montanaro bergamasco, Bergom, 1958
  • Appendice alla relazione La deviazione dal biotipo di Pende nei senza tonsille, presentata al 1. Congresso dell'Accademia italiana di medicina omeopatica : Roma, 27-30 settembre 1957, presso l'Istituto di genetica e gemellologia G. Mendel, Roma, Bergom, 1958
  • Deviazione dal biotipo di Pende nei senza tonsille : relazione al primo Congresso dell'Accademia italiana di medicina omeopatica : Roma, 27-30 settembre 1957, Bergom, 1959

Riferiment[Modifega | mudìfica 'l sorgènt]