Lanzin de Cort

De Wikipedia
(Rimandad de Lancin Curt)
Lombard Quest articol chì l'è scrivud in lombard, con la Noeuva Ortografia Lombarda
La preja del Lanzin

El Lanzin de Cort (anca Lanzin Curt, 1460 - Milan 2 fevrer 1512) a l'è stad un scritor e poeta lombard del temp del Renassiment lombard, regordad per i so sonet in milanes.

Biografia[Modifega | modifica 'l sorgent]

L'è nassud intorna al 1460 in del Ducad de Milan sforzesch e l'ha studiad a Pavia cont el maester Giorgio Merula.

Del 1481 a l'è un contrascriptor, pagad cont un salari de ses fiorin al mes, se pensa che 'l fuss un cobista de concet che 'l faseva i traduzzion di test classegh sota el controll del Merula midem. Del 1488 a l'è insegnant a Pavia e letor de metafisega.

Anca senza mai rivà a l'ecellenza, el gh'ha havud comunque di roeull de importanza in la ministrazzion milanesa, anca sota i frances che haveven ciapad temporaneament el Ducad, che gh'haveva consiliad de trovà un acord con la popolazzion e de stà minga a mortifegàlla. L'è stad del 1503 in la comission per scernì i porte del Dom de Milan e del 1505 l'è stad el representant milanes a l'orazzion per el Luis XII.

Quand che l'è mort el Gustin Bust gh'ha fad un monument funerari, che incoeu l'è dent al musee d'art antiga del Castell Sforzesch, e l'è mitud sota in la Gesa de San March.

Literadura[Modifega | modifica 'l sorgent]

El Curt l'ha lassad trii liber de poesia in latin e una ventina de sonet in milanes.

La soa poesia latina l'è stada a longh retegnuda bassa, sgresgia e fada mal, anca per via di giudizzi gram del Paol Giov, e domà in di ultim temp l'è stada studiada e revalutada.

In del so sonetà milanes, el voleva vesser vesin a la realtà, e ghe piaseva minga la manera de scriver del Petrarca. Vari so sonet critegaven el Baldassar Tacon, poeta e secretari de la cort sforzesca che 'l gh'haveva una moralità che 'l scompartiva no.

Riferiment[Modifega | modifica 'l sorgent]