Regn dei Lombards

De Wikipedia
(Rimandaa da Regn lungubard)
Jump to navigation Jump to search
Lombard Occidental Quell articol qì l'è scrivud in Lombard, ortografia SL.


Regn dei Lombards
Regn dei Lombards - Stemma
(detai)
Regn dei Lombards - Localizazion
Dats aministrativ
Nom ufiçal
  • Regnum Langobardorum
  • Regnum totius Italiæ
Lengue ufiçale latina
Lengue parlade latina, longobarda
Capital Pavia
Oltre capital Monça, Milan
Politega
Forma de Stat Regn barbareg
Forma de govern Monarqia eletiva
Rex Langobardorum Re dei Lombards
Organi deliberativ Gairethinx
Nassida 568 con Alboin
Causa Invasion lombarda de la Pianura Padana
Fin 774 con Desideri
Causa Borlada de Pavia
Territore e popolazion
Zona jeografiga Italia
Relijon e societaa
Relijon principala Catolicesim
Relijon de Stat Arianesim fina al VII secol, po catolicesim
Relijon minore Paganesim
Class soçai Ariman, Aldii, Romaneg
Evoluzion storega
Prima al g'era
Byzantine imperial flag, 14th century.svg
Imper Bizantin
L'è stait sostituid da
Charlemagne autograph.svg
Imper Carolinj

Ol Regn dei Lombards, cognossid anc come Regn Lombard (latin: Regnum Langobardorum, jermaneg antig: Langbardland), plu tarde anc come Regn de tœta l'Italia (latin: Regnum totius Italiae), l'era un stat volt medieval cread dei Lombards (o Longobards per distinguer-i dei lombards d'incœ), un popol jermaneg, ind el VI secol d.C. A'l prencepe i ha conquistad la Pianura Padana, per po rivar a controllar anc quase tœta la penisola italega.

Storia[Mudifega | mudìfica 'l sorgènt]

Fondazion del Regn[Mudifega | mudìfica 'l sorgènt]

I Lombards i era orijinare de la Scandinavia, ma i s'era stabilids in Panonia despò de la guerra gotega. Ind el 568 ol re Alboin l'ha decidid de provar l'invasion dei territore bizantin de là dei Alp, per circar una sistemazion meiora per ol so popol.

La prima citaa a vesser conquistada l'è staita Cividal del Friol, indove l'Alboin l'ha nominad ol prim duca (Jisulf). Spazada vià ogne resistenza dei bizantin, i Lombards i ocupa tœta la part volta de la Pianura Padana, da Cividal a Torin. La capital l'è Pavia, qe l'è conquistada ind el 572 dopo quase tri agn de assede. Prope qé, tradid da la so moier Rosmunda (col so amador, ol Elmiqi), al troverà la mort ind el istess agn. Ol so sucessor al sarà ol Clefi, qe al regnerà del 572 a'l 574.

Period dei Duqi[Mudifega | mudìfica 'l sorgènt]

Exquisite-kfind.png Per savir-n plussee, varda l'articol Period dei Duqi.

Despò de la mort del Clefi (copad de un servidor), i duqi i ha miga elejid un nœv sovran. A causa de la fraca del Baduari (576), mandad de l'imperador d'Orient per riconquistar i territore perdids, anc i Lombards a'l servizi de l'Imper i se revolta e i fonda i Ducads (indipendents de la Corona) de Spolet e Benevent. Ol period dei duqi al fenes con l'elezion del Autari ind el 584.

Teodolinda[Mudifega | mudìfica 'l sorgènt]

Prima de morir, l'Autari ind el 590 l'ha sposad la Teodolinda, una principessa bavara. Ol nœv re, l'Ajilulf, segond la lejenda l'è cernid de la stessa Teodolinda, qe la se sposerà con lu. Grazie a lee i Lombards (qe i era per la plu part pagan o arian) i començerà a convertir-s al catolicesim, e ind el so regn la cirqerà la conciliazion intra i dominador jermaneg e i popolazion romanege. Ge sarà anc ol passaj de la concezion fameiara del poder (i duqi i era a cap del so clan, la fara) a qella territoriala.

Sota ol regnar de la Teodolinda g'è staita una granda produzion artistega. Dei ipotesi i dix qe anc'pò la Corona Ferrea la sies staita fabricada in qell period qé.

La rejina la seguiterà a governar anc dop de la mort del Ajilulf e l'incoronazion del so fiœl Adaloald (anc'mò picinin). La so politega filo-catolega, però, la porta a una ribellion de la fazion ariana e a la guerra civil, vencida del arian Arioald ind el 625.

Rotari[Mudifega | mudìfica 'l sorgènt]

Ind el 636 l'è salid al trono ol Rotari, duca de Bressa, arian. Ol so governar l'è stait segnad de una espansion militara (l'ha ciapad la Liguria e ol rest de l'Emilia), e de la proclamazion del so Edit (643), qe al regoieva tœte i lej dei Lombards. L'era scriit in latin, anc se l'era indirizad adoma ai so suditi jermaneg (g'era ol principi de personalitaa de la lej: ognun al seguiva ol dirit del so popol). Ol so regnar l'è finid ind el 652.

La Dinastia Bavaresa[Mudifega | mudìfica 'l sorgènt]

Despò de la fin del regn del fiœl del Rotari, ol Rodoald (652-653), i duqi i ha elejid l'Aripert I, duca de Asti e nevod de la Teodolinda. La retornava insé la dinastia Bavaresa, qe l'ha regnad fina al 712. La so politega filo-catolega la porterà a tante ribellion dei arian, qe a la fin i è però deventads una picola minoranza.

Liutprand[Mudifega | mudìfica 'l sorgènt]

Dop la mort del so pader Ansprand, ol prim sovran despò de la fin dinastia bavaresa, ind el 712 ol Liutprand l'è salid al trono. L'ha governad plu a long de tœts i olter sovran Lombards, fina a'l 744. L'ha strenjid una importanta allianza coi Franc (e l'ha aidad plu volte Carl Martell contra i Saracen), e grazie a la so politega sprejudegada, l'è rivad a conquistar dei territore a'l Papa e a l'Esarcad de Ravena, e per la prima volta l'ha portad i ducads de Spolet e Benevent sota ol controll de Pavia.

Jamò del VI secol i romaneg i hiva començad a scalar i posizion ind la jerarqia sociala, e una part dei Lombards l'era inscambe deventada plu povera, e la pudiva plu garantir ol servizi militar. Donca ol Liutprand l'ha tirad vià l'oblig de leva per i Lombards qe i pudiva miga sostentar-s.

I ultem sovran[Mudifega | mudìfica 'l sorgènt]

Sucessor del Liutprand l'è stait ol so nevod Ildebrand, descaçad vià dop una qualc mis del Raqis, duca del Friol. L'è stait un debol sovran, qe al g'hiva poca popolaridaa intra i Lombards. A la fin i duqi i ha elejid come nœv re ol so fradell Astolf, e ol Raqis l'è indait in convent. Espression de la fazion lombarda plu conservatrix, l'ha inviad dei campagne militare qe i è culminade con la conquista de Ravena (751), sede de l'Esarcad bizantin. Per far-l, l'ha duxid far entrar i romaneg ind el esercet (adoma però come fanteria lijera).

Prope quand qe al sœmeava qe l'Astolf al fœss sul pont de vencer tœts i so nemix a sud dei Alp, ol Papa Stefan II l'ha ciamad in so aiut Pipin ol Brev, nœv sovran dei Franc, qe al venç l'Astolf do volte (754 e 756). I Lombards i g'ha de dar a'l Papa Ravena. L'istess ann l'Astolf al mœr e l'è incoronad ol Desideri, qe al g'ha ol gradiment di Franc. Pian pianin al circa de recostruir ol regn in crisi.

La fin[Mudifega | mudìfica 'l sorgènt]

Ol Desideri l'era dree a ciapar i prim resultads de la so politega (anc grazie ai division interne dei Franc), quand qe la mort del Carlomann (771) l'ha lassad camp liber al so fradell Carl Magn, qe ind el 773 l'ha traversad i Alp e l'ha ciapad Pavia ind el 774, despò de una dura resistenza lombarda. Ol Desideri l'è stait esiliad in Gallia, e ol so s'ciet Adelqi l'è indait a circar aiœt a Costantinopoli. In manera formala, ol regn l'è miga stait desligad e l'è stait jontad a'l Regn Franc ind una union personala (ol Carl Magn l'era Gratia Dei rex Francorum et Langobardorum). I ducads ind la Langobardia Minor i è restaits fina a l'invasion dei Norman, ind el 1130.

Cartografia[Mudifega | mudìfica 'l sorgènt]

Riferiments[Mudifega | mudìfica 'l sorgènt]