Guerra gotega (535-553)
|
Quell articol qì l'è scrivud in Lombard, cond l'ortografia Scriver Lombard. |
La guerra gotega (535-553), ciamada anc guerra greca-gotega, l'è staita combatida intra l'Imper Bizantin e 'l Regn dei Ostrogots. L'era part del disegn de Renovatio Imperii in Ocident de l'Imperator Justinian I, començad con la reconquista del Regn dei Vandai.
La guerra l'è començada ind el 535 col sbarcar in Sicilia de un'armada bizantina guidada del Belisari. Ol jeneral l'ha po pontad vers ol nord de la penisola e l'ha vencid i trupe gote del re Teodad e del so sucessor Vitije, e l'ha insé conquistad la plœ part del regn, infina Roma e Ravenna.
Con la incoronazion del Totila e la partenza del Belisari, reciamad a Costantinopel, i Gots i ha reconquestad part dei territore perdids; ol rivar del jeneral Narsete cond una nœva armada l'ha portad però a la mort in bataia del sovran got (552) e del so sucessor Teia (553), e la vitoria de l'Imper d'Orient. I ulteme resistenze jermanege i sarà però s'cepade adoma ind el 562.
Ol domini bizantin, però, l'è stait cort: jamò ind el 568, ol rivar dei Lombards al porterà a una nœva guerra e a la perdida de la plœ part dei conquiste.