Gairethinx

Chest artícol a l'è scricc in Lumbàrt, ortograféa orientàl unificàda.

Endèl dirìt longobàrt, el gairethinx el corespónt a la consègna de la lége al pòpol de part del rè. Lége che la gh'ìa de éser prìma apröàda de l'asemblèa dei soldàcc che per manifestà l'apröasiù i picàa co le lànce sö i scùdi.

La paròla la 'ndicàa apò a l'asemblèa stèsa del pòpol en àrme (el Concilum del quàl i pàrla Tacito endèl sò De origine et situ Germanorum e Cesare 'ndèl sò De bello gallico) che, apò a dòpo de che 'l pòpol longobàrt el s'ìa stabilìt en Italia, la dicidìa l'elesiù del rè e la deliberàa sö le scèlte pulìtiche, diplomàtiche, legislatìve e giüdisiàrie piö 'mportante.

L'ìa 'l strümènt per conservà le nòrme tradisiunài del pòpol, ma l'ìa mìa 'na asemblèa democràtica ma piötòst el momènt endèl quàl i duchi, che comandàa le fare, i fàa valì la sò 'mportànsa.