Max Pezzali

Quest articol chì l'è scrivuu in lombard, grafia milanesa.

Vedrina

Quest articol chì l'è in la Vedrina de la Wikipedia

El Pezzali (2013)

El Max Pezzali, a l'anagrafe Massimo Pezzali (Pavia, 14 november 1967) a l’è on cantautor italian.

Cenni biografegh

Vegnùu famós come la vos di 883, grupp fondàa insemma a l’amis Mauro Repetto in del 1991, dal 2004 el Pezzali el s’è miss adrèe ind ona carriera de solista, quand che l’ha bandonàa a la definitiva i "883".

El sò primm album de solista a l’è stàa Il mondo insieme a te, l’è vegnuda adrèe in del 2005 la raccòlta di grand succèss (disco de diamant in Italia) TuttoMax, che’l gh’ha denter i singój del disco vegnùu prima e i succèss pussée grand di 883. Tra i du album de inedit Time Out (2007) e Terraferma (2011) l’è miss foeura l’album dal viv Max Live 2008, intanta in del 2012 e in del 2013 i sortissen Hanno ucciso l'Uomo Ragno 2012 e Max 20; chi du album chì i gh’hann denter i vègg succèss di 883 in ona quaj noueva versión cantàda insemma de differént artisti dela mùsega italiana. El 2015 el ved la sortida del sò quart album de inedit, Astronave Max. In del 2017, de celebrà i 25 ann di carriera l’è pubblicada la raccòlta Le canzoni alla radio.

A l’è vun infra i cantautór pussée vardàa adrée in la musega italiana con pussée de 7 milion di dischi vendùu (comprés quej di 883) in la sóa carriera, indova l’ha miss foeura in del’insemma 21 album e 61 singoj e l’ha ricevùu premi de tanti sòrt, compres tredes Telegatti, trii Festivalbar su dodes partecipazión, vun riconossment a Un disco per l'estate in su dò partecipazión, des Italian e Wind Music Awards, vun Premio Lunezia, trii partecipazión in del Summer Festival, quatter Premi Italiani della Musica, trii Venice Music Awards, sètt Premio Roma Videoclip, du TRL Awards e trii World Music Awards.

Biografìa

Nassùu a Pavia, fioeu de ona cóbbia de fioristi (el Sergio Pezzali e l’Alba Scanavini),el Max Pezzali a l’è fin de giovin vun che’l gh’ha la passion de moto, de mùsega e de ròck, specialment in di ann del liceo. Dòpo ona bocciadura al terz ann del liceo (al Liceo Scientifich Niccolò Copernico de Pavia), tra i banch di scoeùla el conóss el Mauro Repetto. Dòpo che ’l s’è diplomàa, el Max Pezzali el s’iscriv a la facoltà de scienz politegh, ma ’l porta a la fin domà on esàmm (in sociologìa) .

I 883 (1989-2004)

Adrèe al princìpi cont el nòmm provvisori I Pop e l’apparizión in del programma dela televisòn 1, 2, 3 Jovanotti, indova lu cont el Jovanotti el proponn el brano Live in the Music cantàa domà in Lengua inglesa, in del 1991 i partecipen al Festival de Castrocaro cont el brano Non me la menare. In questi ann chì, el Max el se fa notà sia per i so dòt vocàj, sia per i paròll miss giò insemma al Mauro Repetto, scrivùu cont on lenguagg sempliz ma dirètt e ch’el riva a coo. Grand succèss a hinn stàa Hanno ucciso l'Uomo Ragno (catàa foeura del disco che’l gh’ha el stèss nòmm), Con un deca, Sei un mito , Nord sud ovest est e Come mai (che ghe fa vinc el Festival italiano 1993). L'album Nord sud ovest est el venderà pussée de 1.300.000 còpi. Come che in del 1994 el Repetto el lassa el grupp per via de i sò ambizion cinematigrafich, donca el Max el diventa el coo e principal compositór del grupp.

I 883 i metteràn foeura, poeu La donna il sogno & il grande incubo in del 1995, La dura legge del gol! in del 1997, la fortunada raccòlta Gli anni in del 1998, Grazie mille in del 1999 e Uno in più in del 2001. L’è de vèss ricordaà el succèss del concèrt del 21 de luj del 1998 a Milan ind la Piazza del Dòmm, indova a hinn vegnùu a sentil circa 100.000 persòn. De là del'attivitàa del grupp, in del 1998 el Max Pezzali el se mètt adrée a scriv e ’l mett foeura Stessa storia, stesso posto, stesso bar (che’l comincia con Gli anni, vun intra brani pussée famós di 883), on liber indova el Max el ghe liga insemma i so esperienz de vita con i tèst di sò canzon. Ancasì, l’è el protagonista de Jolly Blu, film fàa su cont i canzon 883, che ’l n’hà avùu poch de succèss al cinema ma l’è andada mej in TV. In del 1995, infra i so laô, el se mètt adrèe a fa l’autor per alter cantant (el scriv Aeroplano per la Caterina Rappoccio che, a quei temp là, la gh’aveva 16 ann e L'ultimo bicchiere per el Nikki), e ghe prova per la prima vòlta in la soa carriera la partecipazión al Festival de Sanremo. El ghe partecipa sia come cantant in gara cont el branoSenza averti qui, sia come autór, insemma al Repetto, con la canzon Finalmente tu, cantada del Fiorello.

In del 2002 l’è pubblicada la raccòlta Love/Life (cont el sottìtol L'amore e la vita al tempo degli 883, che in lengua lombarda occidentàl el po vèss inscì tradòtt: “ L’amor e la vita al temp di 883”). In raccòlta a gh’è dent i pussée famós ballàd del grupp pu du inedit, Ci sono anch'io (sottfónd musicàl italiàn di film Disney Il pianeta del tesoro e Quello che capita. El se firma cont el nòmm Max Pezzali/883, come se el perìod di 883 el fudèss adrèe a finìi e lu el fudèss adrèe a comincià ona carriera de solista. Tucc e du i inedit hinn sortìi ‘me singoj. In del 2003 el sortìs el noeuv album di Elio e le Storie Tese che’l gh’a me tìtol Cicciput, indova, infra i vari artisti che gh’hann laoràa adrèe, gh’è anca el Max Pezzali in la canzón Shpalman®, singól de slanz che’l ghe farà vinc ai Italian Music Awards el prèmi del videoclip miglior.

Carriera solista (2004-incoeu)

Il mondo insieme a te (2004)

In del 2004 el Max el decid, donca, de lassàa el stòrich marchio di 883. In del 2004 el realizza l'album Il mondo insieme a te, che a l’è miss foeura in dò versión: la versión normàl, che l’è fada su domà del CD, e la versiòne speciàl, cont anca el DVD, in ediziòn limitada, de chesta chì a hinn stà miss foeura domà 30.000 copi numeràd. L'album l’è on succèss e ’l ricèv du dischi de platin grazie ai sò 200.000 copi vendùu. De chesstchì a hinn tràa foeura cinch sìngoj: Lo strano percorso, Il mondo insieme a te, Fai come ti pare, Eccoti e Me la caverò. A Lampedusa el partecipa in del mes de settember, al festival O' Scià, ciamàa del Claudio Baglioni e’l ghe canta insemma la soa canzon Come mai. In quest perìod chi el Max Pezzali l’è arènt de vèra ai sò fan e attiv comè in sul Internet. De fatt el derva el photoblog "Una al giorno"( Vuna al dì ), indova el ghe mett denter 365 foto (cioè vun ann) che l’ha scattà lu medèmm, on’idéa originàl, mai doperada prima de on cantant italian. Nel luglio 2004 inizia il Max Live Tour 2004. In del 2005 Max al’ottegna anca du premi al Premio Roma Videoclip per i video de Lo strano percorso e Il mondo insieme a te.

El succèss de TuttoMax (2005-2006)

In del 2005 la ven foeura vuna raccòlta di succèss sò e di 883, che la gh’ha ‘me titól TuttoMax. Nissun brano inedit, ma domà el riarrangiament de Eccoti (che gh’era denter in del album che l’è vegnùu prima e primm singol), e l'inserimént de on alter tòcc del’album passàa, Me la caverò, sortìi come second sìngol. Impunemanch, el doppi cd el resta per 12 setimàn ona adrèe al’altra in sula scima di classifich italian in del period del’estàa, e’l ricev quatter dischi de platin per i sò 350.000 copi e alter anmò vendùu e ’l vinc al Festivalbar el premi de vèss l’album miglior del'ann. El 2 de april el Pezzali el se sposa e i immagin del matrimòni i caratterizzarann el final del video de Eccoti. El 21 de ottober 2005 el sortis el second singol dela raccòlta ind ona special edizión Digipak che la gh’ha denter Eccoti e Me la caverò pu i esibizión dal viv de Bella vera, Come mai e Nessun rimpianto. El 25 de november del stèss ann dello, el sortis anca el TuttoMax Video, on DVD che ‘l gh’hà denter 34 video de canzon scrivùu del cantant, con ancasì i question domandàa pussé despèss al Max Pezzali. El 24 dicember 2005 l’è mandà in onda, in sul Italia 1, on special de on or del concèrt del cantant che gh’è stàa al Forum de Assago el 31 de ottober 2005. Ancasì, el Max el derva on pòdcast indova el ghe mett denter film piscinin del tour, sòttman de tucc i sò fan. El 2005 al’è anca l'ann indova el Max Pezzali el torna al Festival de Sanremo, após 10 ann, ind la giornada di grupp fàa de du cantant, quand el canta cont el DJ Francesco el brano Francesca. Dal stess grupp la ven foeura anca la versión in studi in del album del DJ Francesco intitolàa Il mondo di Francesca. On alter laô insema d’on alter l’è quel del album La fantastica storia del pifferaio magico del Edoardo Bennato, e cont lu el ghe canta insemma la canzón La televisione, che felicità. In ottober el taca con el Max Live Tour 2005. In del 2005 el Max l’ottén anca du premi al Premio Roma Videoclip per i video de Eccoti, Fai come ti pare e Me la caverò.

El 2006 a l’è on ann de pausa per l'artista, anca se el partecipa in del album de cover del Lucio Battisti Innocenti evasioni 2006, indova lu el ghe canta La metro eccetera con el Stylophonic e ‘l ghe laora insemma ai Flaminio Maphia in del singol de slanz del sò album, La mia banda suona il rap, sia come autòr, sia come interpret del ritornèll del brano. Max Pezzali el partecipa anca in di Venice Music Awards, indova el ricév el premi per l’album miglior grazie a TuttoMax. Poeu el ricev, per el stèss album, anca el premi Telegatto.

Time Out (2007)

Max Pezzali in concèrt in del 2007

El 25 de magg 2007 el mètt foeura on noeuv album, Time Out, el primm disco d’inedit dal 2004, diventàa disco de platin prima dela sortida in di negozi per le 80.000 prenotazion registràa. L'album l’è andà subit al primm post dela classifica italiana di dischi pussée vendùu. El singolo de slanz, Torno subito, a l’è stàa vun di tormentoni del estàa del 2007. In del sìngol, come in del rest dell'album, el Max el sviluppa e consolida el tema, che gh’è depertùtt in la soa discografia, dela visión dela vita compagn d’on "viagg". El Pezzali medèmm l’ha ditt:

«L'immagin del viagg a l’è vun di tema che l’intraversa tutt l'album e che hoo sviluppàa pussée ind la mia carriera: vivom ind on’época semper pussèe svèlta, indova a gh’è semper besògn de córr, laorà e prodù, indova a gh’è besògn de moeuves del sit A vers’el sit B pussée alla svelta possìbil. Sia in del viagg,sia in la vita in general. Per mi inveci in del viagg la cunta minga la destinazion indova gh’ho rivà,ma domà la strada, el fatto de godess la strada, la compagnia, ogni singol profùmm. "Time Out" el voeur dì proppi quest: fermèmess e godèmess el viagg, fa nagòtt la destinazion.»

Proppi cont el singol de slanz del noeuv album el Max Pezzali el partecipa in del Festivalbar 2007. Al princìpi de settember (in di dì adrèe al 7, in di radio ) el va foeura el second singol, Sei fantastica. El brano el ved la partecipazion del’ Eros Ramazzotti, esecutór dell'assòlo di ghitara ala fin. In del album gh’hinn anca ater laô insemma ala Syria e al Tiziano Ferro.

El 12 de ottober el comenza el Max Pezzali 2007 Tour, in gir per i palazzitt d'Italia. I dat de Cuneo, Bologna, Milan, Torì, Treviso e alter amò han registràa il tutt esaurii e a Roma hinn stàa organizza dò dat pròppi per i tropp domànd.

In del 2007 el Max l’ottèn anca du premi al Premio Roma Videoclip per i video de Torno subito e Sei fantastica. Semper in del stèss ann el Max Pezzali el partecipa anca ai Venice Music Awards 2007 indova el ricev el premio per l’album miglior.

Max Live 2008 e la pausa (2008-2010)

El cantant l’è attiv anca in sul Internet grazie al sò noeuv photoblog "Qualcuna al giorno" ( ona quajvuna ogni dì ) in sula piattafórma Tumblr. El cantant el pubblica link, fotografij, scattàa de lu medèmm e video de condividej cont i sò fan. El 8 de april 2008 l’è sortìi in tutt le librerìj el primm romànz del Max Pezzali Per prendersi una vita, miss foeura del Baldini Castoldi Dalai. A l’è la stòria de quatter bagaj del 1988 e de come i fatt de on estàa i abìen cambiàa per semper i sò vit: subit i vegnen grand per via de ona scelta difficil de vèss ciapada. L'artista l’ha presentàa el liber cont on minitour per tanti librerij d'Italia e l’hà avùu succèss comè. A giugn l’ha scoeudùu el premi ala carriera "TRL History" ai TRL Awards de MTV come artista che l’ha lassàa el sègn ind la storia de Total Request Live, soratùtt ind la generazión di spettatór del famós spettàcol. Adrée a pussée de 17 ann de carriera e 13 ann de tour, la discografia del Max Pezzali a l’è stada resa preziósa grazie a on album Live. El 23 de magg l’è sortìi, de fàtt, el Max Live 2008, el primm CD+DVD Live dela soa carriera. El CD l’è fa su de 17 brani de grand succeèss cantàa in del Max 2007 Tour pu du indit (Mezzo pieno o mezzo vuoto e Ritornerò). El DVD inveci el gh’ha denter el video del concèrt de Treviso del tour 2007 (tutt esaurìi). El primm sìngol inedit catàa foeura, Mezzo pieno o mezzo vuoto, el va in radio el 2 de magg, e a l’è vuna infrà i canzón pussè fàa passaà di radio de tuta italia e fin a diventàa on tormentone del’estàa. El second inedito el gh’ha me titol Ritornerò, ona ballada passada in radio del 29 de agost. In l’estàa del 2008 al taca el Max Live Tour 2008: el tour el part a giugn e passa de pussée de 25 cità italiàn. I concèrt pussée important hinn quej de Monscia (Villa Reale) per la prima tappa del 14 de giugn, Settimo Torinese el 24 de giugn, Roma al RockFestival el de 19 luj, Lignano Sabbiadoro el 28 de agosto, Firenze el 30 de agost al’Idroscalo de Segrate il 5 de settember, Pavia el 7 de settembre, Verona el 15 de settember, e poe alter anmò per rivà a finì dòpo pussè de 3 mes a Padova el 5 de ottober. In la stèssa estàa el ricev ai Venice Music Awards el premi Assomela Mela d'oro. In del settember 2008, in occorrenza del’MTV Day 2008, el Max a l’è protagonista de ona serada special de Mtv Storytellers, el spettàcol indova i artisti i cunten su la génesi di sò canzón e’l so sistéma de scrittura, e anca se métten adrèe a cantà i sò classich in on inedita version semiacustica cont anca el quartètt d'arch Solis String Quartet. El 14 de november 2008 el sortis el ShowTime h. 21.30, on DVD che, in circa 110 minùt, el cunta su el bèchsteigg del Max Tour Live 2007.

Adrèe al capp d’ann in Sardegna a La Pianedda di Castelsardo, el Max l’annunzia che el metterà in second pian i sò impegn musicàj per stagh adrèe al so fioeu, l’ Hilo, nassùu in del settember 2008.

A marz, el ghe laora insemma cont i dARI, grupp gioin emo de Aosta, per el singol Non pensavo. La versión original dela canzon, cantada di dARI, la fa part del so ( di Dari) album de debùtt; ind la noeuva version el Max el canta ona quaj stròff e ’l partecipa come coprotagonista in del video, giràa tutt a Torino a metàa de marz. El 3 de april la canzón la passa in tutt i radio e ’l video el passa in sui red musicaj; el Max el canta insemma ai dARI ai TRL Awards indova lu el vinc el premi "Best Cartello".

Il 21 de april el Max l’ha partecipàa ala registrazion del sìngol Domani 21/04.2009, vorùu del Jovanotti e di Negramaro per ajutà ind la ricostruzion dll'Aquila dòpo el terremòto del’Aquila del 2009.

El Max, in del mes di giugn. el partecipa anca ai Wind Music Awards, indova el ricev el disco de platin per i vendit de Max Live 2008. Ancasì, in del stèss period, el sortis el video officiàl de Il meglio, brano che gh’è denter in del album Time Out del 2007. Particolaritàa de quest video chì l’è che l’è stàa realizzàa da on gioin ammiratór che, vist del Pezzali e del Claudio Cecchetto, el gh’ha avuù l'opportunitàa de doperàa el so laô ‘me video officiàl .

In di mes de luj e d’agost, smentendo in part i promèss d’ona una pausa artistica perché l’diventà padèr, el Max el s’è miss adrée è ind ona tournée "a ritmi ridòtt" rispetto ala band che’l ghe va semper drèe da on para d'ann. In la stèssa estàa el ricev ai Venice Music Awards el premi ala carriera.

El 2 de dicember el Max el ghe canta insemma cont i Yavanna in la final de X Factor con la canzón Come mai. Ancasì, el 31 de dicember, el s’è esibìi a Rimini insemma de alter cantant per el programma in televisión L'anno che verrà, andàa in onda in su Rai Uno per fa festa al noeuv ann. Subit dòpo el Pezzali el decid de fermass per on ann per metters adrèe a scriv‘l sò noeuv album, lontàn di palch.

El 19 de marz 2010 el Max el se fa vedè in on curt cameo in la quarta stagion dela serie dela televisión L'ispettore Coliandro che l’è stada trasmisa in prima visión in Italia dala Rai 2.

Terraferma (2011)

El Max Pezzali el partecipa, in gara, in del Festival de Sanremo cont el brano Il mio secondo tempo, inveci in la serada dedicada al 150º ann passàa del unitàa Nazional, el propònn el cant popolar Mamma mia dammi cento lire ligàa al tema del’emigrazion italiana, e’l canta con l’Arisa. Ind la serada di grùpp de du cantant el canta del noeuv el brano in gara, insemma a on’esibizion còmica e de cant di Lillo e Greg.

Intanta che gh’è el Festival, el 16 de febbrar del 2011, el sortis el so terz album in studi de solista, che’l gh’ha ‘me titol Terraferma. El 31 de màgg in del stèss ann la sortis ona version "Deluxe" del disco con anca 3 tras bonus. Adrèe a la sortida del’album el Max l’informa i sò fan che el Terraferma Tour 2011 el comenzarà el 30 de april a Roma donca el girarà tuta l’Italia.

Il 25 de marz el Max l’annunzia ala radio che el second singol, de fa sortìi, del'album Terraferma el sarà Credi, pubblicàa poeu el 30 de april.

El Max in del mes de april l’ha ciapà la sò part ai TRL Awards, indova l’hà presentàa el singol Credi, passàa in radio ala fin del stèss més. Vèrs la fin de magg, al Terraferma a ghe dàn el disco d'òr per via de pussée de 30.000 copi vendùu, e el Pezzali l’è ciamà a ritiràa el premi ai Wind Music Awards. El Max l’è anca vun di cinch finalisti del Premio Mogol cont Il mio secondo tempo. El Max Pezzali el partecipa ai MTV Days ala fin di giugn.

El 1 de luj el va foeura el terz singol Quello che comunemente noi chiamiamo amore, de accompagnà el perìod del’estàa del tour del Pezzali, tra i mès de luj e d’agóst con noeuv dat che, al contrari de quèll che l’era giamò succedùu in primavera, a hinn in del Sud del’Italia. El Max el se esibirà a Note italiane nel mondo a Trento. A Lampedusa el partecipa in del mes di settember, al festival O' Scià, ciamà del Claudio Baglioni. El Max a l’è anca vun di ospit in la prima pontada de Star Academy, indova el canta ona quaj so vèggia canzon e in deperlù el brano Quello che comunemente noi chiamiamo amore.

El 19 de marz 2011 sortis el CD de Non smettere di sognare – el sottfónd musical”, mandà in gir dala Universal Music Italia, che gh’è denter Ti vorrei amare dela Lidia Schillaci, brano scrivùu del Max Pezzali.

Hanno ucciso l'Uomo Ragno 2012 (2012)

Max Pezzali in concèrt in del 2012

El 31 de gennar 2012 a l’è ospit dela festa per i 30 ann dela Radio Deejay al Mediolanum Forum de Milan innanz de 15.000 persòn. In febbrar el Max el ghe laora insemma al’ Irene Fornaciari, come compositor del tèst del brano Come ti è venuto in mente. El Max a l’è anca ospit ind la prima pontada de Non sparate sul pianista.

Ancasì el 27 de april 2012 a l’è ospit a MTV Spit ‘me giùdes special. El 14 de magg el se esibis ala festa di 30 ann dela Radio Italia ind la piazza del Dòmm a Milan. In del stèss period el sortis anca Con due deca, la prima compilation officiàl de cover dedicàda ai 883 che la po vèss scaregata a gratis in sul Rockit.

El 12 de giugn l’è sortì Hanno ucciso l'Uomo Ragno 2012, rilettura rap del'album d'esòrdi di 883 Hanno ucciso l'Uomo Ragno in occorrenza di vint'ann de carriera del Pezzali. In del'album gh’è denter l'inedit Sempre noi (con la partecipazion del J-Ax), oltra ai version rangiàa su de nouev di tras che i faseven su l'album del 1992 cantàa de noeuv coi rapper Club Dogo, Entics, J-Ax, Two Fingerz, Fedez, Emis Killa, Ensi, Baby K e Dargen D'Amico. L'album el va subit in sula scima dela classifica come el succedeva nò de quatter ann , quand che l’era stàa miss foeura Time Out; e l'ultima setimana del 2012 l’è certificàa come disco d’òr. El 18 de agost 2012 a Riccione a gh’è on concèrt insemma al’amis e collegaJ-Ax per fa festa per i 30 ann de Radio Deejay, i 90 ann del comun de Riccione e i 20 anni di Hanno ucciso l'Uomo Ragno.

El Pezzali l’è present anca in del album di Two Fingerz indova lor canten cont el J-Ax in del brano Non capisco cosa vuoi, che l’è fa su a partìi del brano di 883 Non me la menare. Dòpo Sempre noi, l’è catàa foeura come sìngol del'album anca 6/1/sfigato 2012, in radio dal 20 de luj. Vèrs la fin del 2012 el Max l’è candidàa al Premio Videoclip Italiano cont el video de Sempre noi e ai MTV Hip Hop Awards in la categoria ‘’Best Collaboration’’.

In del dicember 2012 el compònn el tèst del brano 100.000 parole d'amore, inedit del Davide Merlini, finalista de X Factor. El ghe laora insemma poi cont i Club Dogo in del sò album Noi siamo il club Reloaded Edition cantando L'erba del diavolo e Con un deca. Del 19 de febbrar 2013 el Max el condùs el programma dela television Le strade di Max.

Max 20 (2013-2014)

El 24 de febbrar el Pier Paolo Peroni l’annunzia che l’è adrée a laorà per on noeuv album, disendo minga se el sarà on remake d’on album passàa o d’on album de inediti. In april, l’è confermàa che el 4 de giugn el sortirà on noeuv album, Max 20, che ‘l gh’hà denter 14 brani di 883 e del Pezzali fàa su cantandogh insemma de alter artisti italian famós ( in du ) e 5 inedit. El 10 de maggi a l’è stàa miss foeura el primm singol catàa foeura de Max 20, che ‘l gh’ha ‘me titol L'universo tranne noi, e ‘l scoeud succéss comè in Italia. A hinn adrèe annunziàa i 22 dat del noeuv tour, che 10 de questi chi i hànn fà foeura tucc i bigliètt, sòpo pòch dì. El lavora poeu inséma al Dargen D'Amico in del sò album Vivere aiuta a non morire con Due come noi e Emis Killa per l'album Mercurio con La testa vuota. In del stèss periòd el lavora anca al cinema come doppiador: a l'impresta la soa vos per el personagg Jack Taggert in del settim film del Marvel Cinematic Universe, Iron Man 3.

In del magg 2013 el partecipa come giuràa ala seconda stagion del MTV Spit, condòtta del Marracash. Vèrs la fin del mes, el Pezzali el deciara ind on’intervista a Rockol che el prossim album de inedit el sarà l'ultim prevedùu in del sò contratt con la Warner, e che dòpo la soa pubblicazion el podaria decid de tiràss foeura . Però, in del 2015 el produttor Claudio Cecchetto l’annunzia di veghegh fa de noeuv on contratt de anmò trii ann. Al’inizi de giugn el ghe partecipa ai Wind Music Awards 2013, indova el riceve l disc d’òr per i vendit de Hanno ucciso l'Uomo Ragno 2012 e canta L'universo tranne noi come in del Summer Festival 2013 e ai MTV Awards. In di mes del’estàa el se mètt adrée a incontrass con i fan prèss i librerij e i center commerciaj e, a comenzà del 22 de luj ,el condus insemma del Jake La Furia e dela Paola Iezzi la noeuva trasmission de Italia 1 Nord sud ovest est - Tormentoni on the road, e ‘l ricorda i tanti tormentoni di estàa passàa.

Max Pezzali el se esibìs a Torino cont Il presidente di tutto il mondo in del 2013

A settember el torna de noeuv in radio con Ragazzo inadeguato, el second singol catà foeura de Max 20. In del stèss period l’è nominàa ind la categoria Best Italian Act ai MTV Europe Music Awards 2013. El 10 de ottober a l’è stada misa foeura la sòa autobiografia I cowboy non mollano mai - La mia storia. Semper a ottober el va foeura el videoclip de Ragazzo inadeguato, girà insemma al Paolo Ruffini, Frank Matano, l’Andrea Pisani, el Luca Peracino e ‘l Guglielmo Scilla. La canzon, l’è ancasì misa denter in del sottfónd musical del filmFuga di cervelli con la regìa del Paolo Ruffini, sortìi in di cìnema italian in del november 2013. A novembre el comenza el Max 20 Live Tour, che ‘l fa on grand succèss de pubblich, e ind la pupart di dat gh’è el tutt esaurìi, tant che gh’è besògn di dò dat a Milan, Roma, Torì, Mantova e Firenze. A la fine del tour, el 22 febbraio 2014, l'è rivàa a vegh il oltra 200.000 spettator in 30 concèrt indova i hànn da via fin a l'ultim bigliètt.

El de 10 gennar 2014 l’è miss ancasì foeura el terz singol tòlt foeura de Max 20, che ‘l gh’ha ‘me titol I cowboy non mollano, compagnàa de on video musical in del’ambient delvègg west, seguito il 18 marzo seguente dal video ufficiale di Il presidente di tutto il mondo, un altro dei brani inediti contenuti in Max 20, in regalo ai fan dopo la conclusione del Max 20 Live Tour. El ciapa la so part part, poeu, ai Music Awards 2014 indova el ricev el premi "Disco Multiplatino" per i vendit de Max 20 e el "Disco de Platin" per quej del singol L'universo tranne noi. Ind l’estàa del 2014 el partecipa anca al Summer Festival indova el canta L'universo tranne noi in deperlù e Sei fantastica con l’ Emis Killa, e l’è premiàa cont el "Premio Lunezia Pop per el valór Musical-Letterari" per el brano Il presidente di tutto il mondo.

El 1 de dicember 2014 el mètt foeura , laorandogh insemma con la Radio Deejay, el singol natalizzi Natale con Deejay.

Astronave Max (2015-2016)

El 10 de april 2015 l’è annonziàa , per mezz de on Tweet del produttor Claudio Cecchetto, che on noeuv album del Max Pezzali l’è in via de missagg e che ‘l sarà prèst miss foeura . El disco, che ‘l gh’ha ‘me tìtol Astronave Max e l’è miss foeura el 1 de giugn , el ven adrée ai singoj È venerdì e Sopravviverai, miss foeura vun el 24 de april e l’alter el 29 de magg . El 28 de maggi, a quatter dì dela sortida del noeuva album, el Pezzali el ghe partecipa ala quarta edizion de RadioItaliaLive - Il concerto in Piazza del Duomo a Milan. Il 25 de settember el sortis el terz singol catà foeura del noeuv album, Niente di grave, poeu in dicember l’è annunziàa che el Pezzali el farà part di istruttor vocaj del edizion 2016 di The Voice of Italy.

El 13 de maggi 2016 a l’è misa foeura Astronave Max - New Mission 2016, ona noeuva version del'album Astronave Max con du brani inedit (Due anime e Non lo so) e un album dal viv, intitolàa Max Best Live.

In del settember 2016 el Pezzali l’è catàa foeura come testimonial dela McDonald's. . In del stess perìod el canal dela televisión DMAX, in occorrenza dela trasmission in Italia dela serie TV intitolada Harley and the Davidsons, l’invida el cantant a mètt denter i trii episòdi della serie, e cunta su ‘me l’è nassuda la sòa passion per i moto e per el storich marchio Harley-Davidson. Semper in settember del 2016 Benji & Fede annunzien la partecipazion del Max Pezzali ala canzon Traccia numero 3 del sò noeuv album 0+, e disen che quel lavorà chì insemma al Max l’è “on sògn” perché lor hinn cressùu a scoltà i canzon del Max e di 883.

Le canzoni alla radio e i lavorà insemma al Nek e al Francesco Renga (2017-2018)

El 25 de marz 2017 el Pezzali el rivela, in occasion d’on intervista al’Open Day dela sóa concessionària Harley-Davidson a Pavia, che l’è adrèe a lavorà per on noeuv album che gh’avariss de vèss miss foeura adrèe a l’estàa. <ref>Max Pezzali: dopo l’estate il nuovo album seguito da un mega concerto a San Siro. URL consultad in data 25 marzo 2017. (arqiviad de l'url orijenal in data 26 marzo 2017)</ref> El 2 de giugno el va foeura Le canzoni alla radio insemma al Nile Rodgers, primm singol del noeuv album che ’l gh’avariss de sortìi prima de la fin del’ann, e ‘l ghe ven adrée el second singol sortìi l'11 de settember, fàa su insemma al Nek e al Francesco Renga, con titol Duri da battere. In settember l’è anca annunziàa che a comenzàa de gennar 2018 el partirà el noeuv tour insemma del Nek e del Francesco Renga, con el nòmm de Max Nek Renga, il tour. El 18 de ottober el Max Pezzali l’annunzia che’l celebrarà i sò 25 ann de carriera con la pubblicazion, el 17 de novembre, del noeuv album Le canzoni alla radio, che la sarà ona raccòlta di succèss del cantant da solista e alter di 883, indova gh’hàn anca miss denter 7 inedit (comprés Le canzoni alla radio e Duri da battere) e on noeuv remix del brano Tutto ciò che ho.

El 28 de settember 2017 el sortis in di sal cinematografich italian Chi m'ha visto con la partecipazion del Max Pezzali.

Del gennar del 2018 el Pezzali el ciapa la sò part in del grùpp fiss di attor de Che fuori tempo che fa.

El 10 febbraio 2018 partecipa ‘me òspit speciàl ala quinta serada del 68º Festival de Sanremo, indova ‘l ghe canta insemma al Claudio Baglioni, al Francesco Renga e alNek, la canzon Strada facendo. In del stèss dì a l’è annunzià che el brano in ona version inedita a trè vos e 'l sarà miss denter in Max Nek Renga, il disco, doppi CD dal viv in sortida el 9 de marz, che gh’avarà dent tucc i succèss pussée grand del Max Pezzali, Nek e Francesco Renga cantàa de noeuv a trè vos.

El 15 de giugn 2018 el sortis el noeuv singol Un'estate ci salverà, terz tràa foeura del’album Le canzoni alla radio.

El 23 de ottober 2018 l’è annunziàa che ‘l Pezzali el sarà infra i protagonisti del grandissim concèrt de du dì intitolàa "Un Concerto per Genova", in programma el 17 e el 18 de november al RDS Stadium de Sampierdarena a Genova, che ‘l voeur ricordàa le vittim del Pont Morandi, e vèss doperàa de dagh i danée fàa su al’ "Associazione degli sfollati di Via Porro e Via Del Campasso".

El 30 de ottober 2018 l’è annunziàa che el 23 november el sortiràa l'album Duets Forever - Tutti cantano Cristina dela Cristina D'Avena: per l'occorrenza el Max el ghe cantarà insemma in Robin Hood, sigla dela serie animada de Robin Hood.

El 2 gennaio 2019 l'album Le canzoni alla radio l’è certificàa disco d’òr.

Noeuv progètt (2019-incoeu)

In del’aprile 2019 l’è annonziàa che ’l Max Pezzali sarà el testimonial dela campagna per donà el 5x1000 a la ricerca in del càmpo di scienz biomedégh in sui sulle malànn cardiovascolar promòssa dela GSD Foundation, l'organizzazion no profit del Gruppo Ospedaliero San Donato.

El de 21 giugn del 2019 el sortis el singol del’estàa Welcome to Miami (South Beach), che ‘l ven prima del noeuv album de inedit in sortida in del 2020.

Ala fin de ottober, adrèe a on post del Fiorello, el Pezzali l’annunzia per via di red sociaj el singol In questa città, poeu miss foeura l'8 de november 2019. La copertìna del singol l’è disegnada del fumettista romàn Zerocalcare, grand ammirador del Max Pezzali e di 883. El 20 de dicember la sortis version remix del brano insemma del Ketama126.

El 29 de november 2019 l’è miss foeura in sul sò canal YouTube Siamo quel che siamo, insemma al GionnyScandal. Il brano, catàa foeura per la reclamm di Ringo, el sarà denter in del’ album adrée del Pezzali.

In dicember l’è annunziàa per el 10 de luj 2020 on concèrt special al Stadi San Siro de Milan (per la prima volta in deperlù) ciamàa San Siro canta Max. esaurì in manc de trè setiman, gh’è stàa giontàa adrèe on second spettacol, semper a San Siro, el 11 de luj. L'avveniment l’è stàa poeu spostàa al’estàa 2012 per via del’emergenza coronavirus.

El 10 de gennar 2020 l’è pubblicada La mia hit, noeuv singol del’album ReAle del J-Ax, fàa su insemma al Max Pezzali.

El 6 de marz 2020 l’è sortì el noeuv singol intitolàa Sembro matto. el 17 de aprile la sortis la version remix del brano insemma del Tormento.

El 5 de giugn el Max Pezzali el mètt foeura Una canzone come gli 883, fada su cont on grupp de artisti, el "DPCM Squad", che gh’hà denter anca Lo Stato Sociale, Emis Killa, J-Ax, Jake La Furia e i Pinguini Tattici Nucleari, indova i danèe che i farànn su i saràn tucc dà via a on fónd de ajutàa i artisti, musicisti e tècnich colpìi de bon a livèllo economich dela Pandemia de COVID-19 del 2019-2020|.

Vita privada

L’è sposàa con la Debora Pelamatti dal 28 de april 2019.

Da on matrimoni de prima con la Martina Marinucci (del 2005 al 2013), l'è nassùu el 24 de settember 2008 el fioeu Hilo.

El Pezzali l’è on grand appassionàa de moto (el nòmm del sò grupp musical l’è stà decidùu ‘me tributt al modèll Sportster dela Harley-Davidson, che la sòa cilindrada pussè piccola che gh’è l’è de 883 cm cubi; El Pezzali l’ha deciaràa avégh mai vorsùu quistàa quel modèll la de moto de scongiur. ) e del 2000 el gh’ha anca ona concessionaria autorizzàda Harley-Davidson a Pavia.

L’è anca on grand appassionàa de fumètt, specialment di fumètt di supereroi dela Marvel e dela serie a fumètt Rat-Man del Leo Ortolani, definida del Pezzali "vun infra i fumètt pussée originaj mai partorìi in del noster paes ". L’è anca on grand fan del fumettista roman Zerocalcare e a metà di ann novanta l’ha miss foeura, insemma de Ade Capone, in anca on so fumètt, che ‘ l gh’ha ‘me titol Gli anni d'oro, indue proppi i 883 i eren protagonisti. El gh’ha ona raccòlta de pussée de 1300 fumètt.

El Pezzali l’è on grand ammirador del cantautor american Bruce Springsteen, che l’è stàa per lu ona important font d’inspirazion de la soa carriera musical On sò sogn de semper l'è quel de vèss adrée a sonà cont el Springsteen.

L’è on grand tifós del Inter. El 27 de magg 2007 l’ha cantàa al Stadi San Siro per i celebrazion del quindicesim scudetto dell'Inter insemma de alter cantant tifós de l’inter compagn del Roberto Vecchioni, del Luciano Ligabue ed dell’Elio.

Formazión dal viv

Adèss

• Giorgio Mastrocola – ghitara ritmica (2011-incoeu)
• Dj Zak – programmazion, scratch (2013-incoeu)
• Davide Ferrario – ghitara ritmica, sintetizzatore, programmazion (2013-incoeu)
• Luca Serpenti – bass (2013-incoeu)
• Sergio Carnevale – batterìa (2011-incoeu)
• Ernesto Ghezzi – pianofòrt, tastera, percussion elettrònich (2004-presente)

Ex member del grupp

• Paolo Carta – ghitara solista (2004-2006)
• Claudio Guidetti – ghitara ritmica (2004-2006)
• Rocco Tanica – tastera (2004-2006)
• Paolo Costa – bass (2004-2006)
• Marco Guarnerio – ghitara ritmica (2004-2005)
• Mario Zapparoli – batteria (2004-2006)
• Michele Fischietti – còr (2005)
• Marco Forni – programmazion, sintetizzatore (2007-2010)
• Francesco Tartarini – còr (2007-2010)
• Lidia Schillaci – còr (2007-2010)
• Chicco Gussoni – ghitara solista (2007-2010)
• Luca Colombo – ghitara ritmica (2007-2010)
• Franco Cristaldi – bass (2004-2010)
• Elio Rivagli – batteria (2007-2010)
• Sergio Maggioni – ghitara solista, còr (2011-2012)
• Daniele "Megahertz" Dupuis – programmazion, sintetizzatore (2011-2012)
• Matteo Lavagna – bass (2011-2012)
• Shablo – programmazion (2013-2014)

Discografia

Cont i 883

Album in studi

• 1992 – Hanno ucciso l'Uomo Ragno
• 1993 – Nord sud ovest est
• 1995 – La donna il sogno & il grande incubo
• 1997 – La dura legge del gol!
• 1999 – Grazie mille
• 2001 – Uno in più

Raccòlt

• 1994 – Remix '94
• 1998 – Gli anni
• 2000 – Mille grazie (misa foeura domà in Austria, Svizzera e Germania)
• 2002 – Love/Life (accreditada al "Max Pezzali/883")
• 2013 – Collection: 883

De solista

Album in studio

• 2004 – Il mondo insieme a te
• 2007 – Time Out
• 2011 – Terraferma
• 2015 – Astronave Max

Raccòlt

• 2005 – TuttoMax
• 2012 – Hanno ucciso l'Uomo Ragno 2012
• 2013 – Max 20
• 2017 – Le canzoni alla radio

Album dal viv

• 2008 – Max Live 2008
• 2018 – Max Nek Renga, il disco (con Nek e Francesco Renga)

Videografìa

Jolly Blu

El Max Pezzali l’ha anca giràa on film intitolàa Jolly Blu, indova el cunta su i origin del so succèss che l’è comenzà in del 1992. L’è on "adesìv" de mètt insèma i vari canzon. El film l’è de tipo musicàl de gia che in del film lu el cunta su anca l’orìgin de quajvuna infra i sò canzon, compagn de La regola dell'amico, Rotta per casa di Dio, Non ti passa più e alter, e gh’è anca on quaj ospit d’onór compagn del [Lorenzo Jovanotti]]. El film el ne gh’hà minga avùu tant de succèss; inveci al’è stà pussè vardàa ala TV.

VHS

• 1993 – Nord sud ovest est Video LP
• 1995 – La donna il sogno & gli altri video
• 1997 – La dura legge del gol! Video LP
• 1998 – Gli anni Video LP
• 1999 – Jolly Blu

DVD

• 2005 – TuttoMax Video
• 2008 – ShowTime h. 21.30
• 2008 – Max Live 2008

Tour

• 2004 – Il Mondo Insieme a Te Tour 2004
• 2005 – Max Live Tour 2005
• 2007 – Max Tour 2007
• 2008 – Max Live Tour 2008
• 2011 – Terraferma Tour 2011
• 2013 – Max 20 Live Tour
• 2015 – Astronave Max Tour
• 2018 – Max Nek Renga, il tour

Libri

• 1995 – Gli anni d'oro (fumetto)
• 1998 – Stessa storia, stesso posto, stesso bar (autobiografia)
• 2008 – Per prendersi una vita (romanzo)
• 2013 – I cowboy non mollano mai - La mia storia (autobiografia)

Programma TV

• Sanremo giovani (Rai 1, 1998)
• Telethon (Rai 1, 1998) inviato
• Sabatokyo (Italia 1, 1999)
• Le strade di Max (Deejay TV, 2012-2013)
• MTV Spit (MTV, 2013)
• Nord sud ovest est - Tormentoni on the road (Italia 1, 2013)
• The Voice of Italy (Rai 2, 2016) coach
• Che fuori tempo che fa (Rai 1, 2018-2019)

Filmografìa

Cinema

• Jolly Blu, regia del Stefano Salvati (1998)
• Chi m'ha visto, regia del Alessandro Pondi (2017)
• Cobra non è, regia del Mauro Russo (2020)

Televisión

• Un medico in famiglia, regia di Riccardo Donna (2000)
• L'ispettore Coliandro, regia dei Manetti Bros. (2009)

Laorà insemma de alter

Max Pezzali el gh’ha laorà insemma de different artisti del princìpi dela sóa carriera:

• cont el Fargetta - Hanno ucciso l'Uomo Ragno remix e Con un deca remix, miss foeura in di album Remix '94 e Hanno ucciso l'Uomo Ragno.
• cont el Molella - Nella notte remix, miss foeura in del’album del Remix '94 e Nord sud ovest est.
• con Datura - Nord sud ovest est remix, miss foeura in del’album del Remix '94 e Nord sud ovest est.
• cont i U.s.u.r.a. - Non ci spezziamo remix, miss foeura in del’album del Remix '94.
• cont el Dj Mirko - Weekend remix, miss foeura in del’album del Remix '94.
• cont elStefano Secchi - Sei un mito remix, miss foeura in del’album del Remix '94 e Nord sud ovest est.
• cont el Bliss Team - Gli anni remix e Il grande incubo remix, miss foeura in del’album La donna il sogno & il grande incubo.
• con la Caterina Rappoccio - Aeroplano, sortida in del 1994 e misa foeuraa del Pezzali in la seconda edizión del 2000 de Nord sud ovest est.
• cont el Nikki - L'ultimo bicchiere, brano principal del'album Rock normale (1994) del disc jockey e musicista milanés. Una dimostrazion dela canzon è stada misa foeuraa in la riedizion del 2000 de Nord sud ovest est.
• cont el Fiorello - Finalmente tu, canzon indova l'artista sicilian el partecipa al Festival de Sanremo 1995. Max, che ‘l n’è l'autór insemma al Repetto, la canta de noeuv ind la La dura legge del gol: ancasì i du cantant i fan su on video (catàa su in Nord sud ovest est) indova i canten la canzonCome mai, scritta cont el Mauro Repetto, che ‘l comparis anca in del video, e in Stasera pago io del 2004 indova el canta Sei un mito cont el Pezzali e in del’album Max 20 cont Sei un mito.
• cont i B-Nario - La musica che piace a noi, miss foeuraa in del’album del 1996 di B-Nario La musica che piace a noi.
• con i Paola & Chiara - in del’album La donna il sogno & il grande incubo come coristi.
• con gli Eiffel 65 - in del’album Grazie mille con La regina del celebrità (Eiffel 65 Remix)
• con Jovanotti - Cloro, miss foeuraa in del’album Uno in più e con Tieni il tempo 2013, miss foeura in del’album Max 20.
• con J-Ax - Noi - parte 2 miss foeuraa in del’album del 2001 Uno in più, Sempre noi miss foeura in del’album Hanno ucciso l'Uomo Ragno 2012 e La mia hit, miss foeura in del’album ReAle. Max l’ha anca scrivùu el brano Nati così, che l’è denter in del’album Il bello d'esser brutti.
• con la Syria e l’Alex Britti - in del’album Uno in più cont Essere in te, che l’è stada poeu misa dent in del’album Le mie favole di Syria.
• cont i Elio e le Storie Tese - Shpalman®, miss foeura in di album di EelST Cicciput e Gattini, e in del’album Max 20 cont Nord sud ovest est.
• cont i Gli Atroci - tèst e mùsega de Lasciala stare miss foeuraa in del’album 2004 di Gli Atroci L'armata del metallo, poi registrada in version demo di 883 e misa dent in la riedizion del 2000 de Hanno ucciso l'Uomo Ragno.
• cont el Dj Francesco - Il mondo di Francesca miss foeura in del’album che ‘l gh’a el stèss nomm del Dj Francesco del 2005 ed cantada de lor du dal viv in del Festival de Sanremo 2005.
• con l’ Edoardo Bennato - La televisione che felicità miss foeuraa in del’album del 2005 di Edoardo Bennato La fantastica storia del Pifferaio Magico e in del’album Max 20 con La dura legge del gol.
• cont i Flaminio Maphia - La mia banda suona il rap che el Max gh’hà laorà insemma in del scriv tèst e mùsega, e anca cantà el ritornèll. In periodi passàa el grupp roman era comparì in di video Come deve andare e Uno in più.
• cont i Stylophonic - La metro eccetera, cover dela canzon delLucio Battisti.
• cont i Nomadi - in occorrenza dela festa de i 40 ann de attivitàa del grupp, che gh’è stada in del 2003, el Max Pezzali l’è andà lì ‘me ospit ind’on infra i trii concèrt organizza, indova el canta la famósissima Un pugno di sabbia e poe ala fine del concèrt el ritornèll Io vagabondo,che l’è on alter succèss del grupp emilian.
• cont el Tiziano Ferro - in del’album Time out el Ferro el partecipa in di cori ind la canzon che ghe dà el titol al'album.
• cont l’ Eros Ramazzotti - in del’album Time out Ramazzotti el sona l'assol de ghitara in del brano Sei fantastica e in del’album Max 20 con Lo strano percorso.
• cont el Danilo Calvio (batterista di Finley) in del’album Time Out sona la batteria in del brano Il meglio.
• cont el Claudio Bisio – in del singolo Comme Jamais in sui not del brano pussée famós Come mai.
• cont i dARI – in del brano e in del videoclip de Non pensavo, singol trà foeura dell'album Sottovuoto generazionale del 2008 e poeu riadattàa.
• con 55 artisti dela musega italiana - in Domani 21/04.2009.
• cont i Lillo & Greg - Il mio secondo tempo cantada con lor dal viv Festival de Sanremo 2011.
• con l’Arisa - per Mamma mia dammi cento lire eseguida al Festival di Sanremo 2011 e missafoeuraa ind la version deluxe de Terraferma.
• con la Lidia Schillaci - autor del tèst del brano Ti vorrei amare.
• con laIrene Fornaciari - autor del tèst del brano Come ti è venuto in mente.
• con i Two Fingerz - nel loro album Mouse Music ind la tras Non capisco cosa vuoi (insemma al J-Ax) e in Hanno ucciso l'Uomo Ragno 2012 con 6/1/sfigato 2012.
• con la Emis Killa - in del’album Hanno ucciso l'Uomo Ragno 2012 con Te la tiri e in del’album Mercurio con La testa vuota.
• cont i Club Dogo - in del’album Hanno ucciso l'Uomo Ragno 2012 con Con un deca e in del’album Noi siamo il club con L'erba del diavolo.
• cont el Dargen D'Amico - in del’album Hanno ucciso l'Uomo Ragno 2012 con Hanno ucciso l'Uomo Ragno e in del’album Vivere aiuta a non morire con Due come noi.
• cont iEntics - in del’album Hanno ucciso l'Uomo Ragno 2012 con Non me la menare.
• cont el Ensi - in del’album Hanno ucciso l'Uomo Ragno 2012 con S'inkazza (Questa casa non è un albergo).
• cont el Fedez - in del’album Hanno ucciso l'Uomo Ragno 2012 con Jolly blu.
• cont el Baby K - in del’album Hanno ucciso l'Uomo Ragno 2012 con Lasciati toccare.
• cont el Davide Merlini - autor del tèst del brano 100000 parole d'amore.
• cont el Paolo Zanocco - in del’album La pastiglia con La mè giuentù.
• cont el Claudio Baglioni - in del’album Max 20 con Come mai.
• cont el Davide Van De Sfroos - in del’album Max 20 con Come deve andare.
• cont el Nek - in del’album Max 20 con Nessun rimpianto.
• cont el Raf - in del’album Max 20 con Sei fantastica.
• cont el Gianluca Grignani - in del’album Max 20 con Rotta x casa di Dio e in del’album Una strada in mezzo al cielo con Primo treno per Marte.
• cont el Giuliano Sangiorgi - in del’album Max 20 con Ti sento vivere.
• cont el Antonello Venditti - in del’album Max 20 con Quello che capita.
• cont el Cesare Cremonini - in del’album Max 20 con Gli anni.
• cont el Francesco Renga - in del’album Max 20 con Eccoti.
• con la Syria - autor del tèst del singol Odiare di Syria e in del’album Astronave Max con Fallo tu.
• cont el Ron - in del’album La forza di dire sì con Una città per cantare e Stella mia.
• con i Benji & Fede - in del’album 0+ con Traccia numero 3.
• cont i Nile Rodgers - in del’album Le canzoni alla radio cont el singol che’ l gh’ha el stèss nòmm.
• cont el Nek e ‘l Francesco Renga - in del’album Le canzoni alla radio con Duri da battere, ind la tournée Max Nek Renga, il tour e in del’album Max Nek Renga, il disco.
• cont i Ex-Otago - Un'estate ci salverà.
• con la Cristina D'Avena - in del’album Duets Forever - Tutti cantano Cristina con Robin Hood.
• con el GionnyScandal - Siamo quel che siamo, canzone scelta per lo spot dei Ringo.
• con i Ketama126 - In questa città (Roma Milano Remix).
• con el Tormento - Sembro matto Remix.
• con 54 artisti dela musega italiana - Ma il cielo è sempre blu.
• con la DPCM Squad - Una canzone come gli 883.

Riconossment

1992 (cont i883)

• Telegatto come rivelazion del'ann
• Telegatto come album miglior con Hanno ucciso l'Uomo Ragno
• World Music Awards come artista miglior italian

1993 (cont i 883)

• Telegatto come miglior grupp del'ann
• Telegatto come miglior album con Nord sud ovest est
• Festival italiano come vincitor (con Fiorello)
• Festivalbar come album miglior con Nord sud ovest est
• World Music Awards come artista miglior italian

1994 (cont i 883)

• Un disco per l'estate come autor del tèst del vincitor Nikki, L'ultimo bicchiere

1995 (cont i 883)

• Festivalbar come miglior singolo con Tieni il tempo
• Telegatto come miglior band dell'anno

1996 (cont i 883)

• Telegatto come miglior tournée

1997 (cont i 883)

• Telegatto come miglior canzone dell'estate con La regola dell'amico
• Telegatto come miglior album con La dura legge del gol!

1998 (cont i 883)

• Telegatto come migliora tournée
• Telegatto come album miglior con Gli anni
• Premio Italiano della Musica come grupp musical miglior
• Premio Italiano della Musica come concerto miglior del'ann

1999 (cont i 883)

• World Music Awards come artista italiano miglior
• Telegatto come grupp miglior

2000 (cont i 883)

• Telegatto come miglior tournée
• Premio Italiano della Musica come tour miglior

2001 (cont i 883)

• Italian Music Awards come grupp miglior
• Premio Italiano della Musica come grupp musical miglior

2002 (cont i 883)

• Italian Music Awards come videoclip miglior con Quello che capita

2003

• Italian Music Awards come videoclip miglior con Shpalman (cont i Elio e le storie tese)

2004

• Premio Roma Videoclip al video de Lo strano percorso
• Premio Roma Videoclip al video de Il mondo insieme a te
• Italian Music Awards de vegh contribuìi per l’indutria italiana.

2005

• Festivalbar - album del'ann con TuttoMax
• Premio Roma Videoclip al video de Eccoti
• Premio Roma Videoclip al video de Fai come ti pare
• Premio Roma Videoclip al video de Me la caverò

2006

• Venice Music Awards come album miglior con TuttoMax
• Telegatto come album miglior con TuttoMax

2007

• Venice Music Awards come album miglior con Time Out
• Premio Roma Videoclip al video de Torno subito
• Premio Roma Videoclip al video de Sei fantastica

2008

• TRL Awards con TRL History
• Venice Music Awards cont el premie "Assomela" - Mela d'oro
• Premi letterario città di Vigevano al liber Per prendersi una vita

2009

• TRL Awards con Best Cartello
• Wind Music Awards cont el CD de platin al'album Max Live 2008
• Venice Music Awards cont el premio alla carriera

2010

• Wind Music Awards con Online Single Track Multiplatino a Domani 21/04.2009 (con altri 56 artisti)

2011

• Wind Music Awards cont el CD Oro all'album Terraferma

2013

• Wind Music Awards cont el CD Oro all'album Hanno ucciso l'Uomo Ragno 2012
• Premio Ideona 2013 al programma TV Le strade di Max
• Giffoni Award cont el Giffone Award Experience

2014

• Music Awards cont el CD platin pu vòlt all'album Max 20
• Music Awards cont el Singolo Platino al singol L'universo tranne noi
• Premio Lunezia per el Valore Musical-Letterario del brano Il Presidente di tutto il mondo

2016

• TIMmusic Onstage Awards cont el premio speciale per gli oltre 500 concerti in carriera
• Wind Music Awards cont el CD Oro all'album Astronave Max

2017

• Wind Music Awards cont el premio Live per l'Astronave Max Tour

2018

• Wind Music Awards cont el premio Live per Max Nek Renga, il tour