Isola de Pasqua

De Wikipedia
Salta a la navigazzion Và a cercà
Lombard Quest articol chì l'è scrivud in lombard, con la Noeuva Ortografia Lombarda
Mapa de l'isola de Pasqua

L'Isola de Pasqua (in pasquens Rapa Nui, leteralment "granda isola/corna"; in spagnoeul Isla de Pascua)[1] a l'è un'isola de l'Ocean Pacifegh meridional che l'apartegn al Cile. La capital e unega cità de l'isola a l'è Hanga Roa, in de la part sud-ocidentala de l'isola.

Geografia fisega[Modifega | modifica 'l sorgent]

A pussee de 3 601 km a ovest di coste del Cile e 2 075 km a est di isole Pitcairn, a l'è vun di insediament abitad pussee isolad del mond. I so coordinade geografeghe a inn 27° 07' S 109° 22' W: la latitudin a l'è visina a quella de la cità cilena de Caldera, a nord de Santiago. El territori de l'isola el si compon de quater volcan: Poike, Rano Kau, Rano Raraku e Terevaka. Famos inn i numeros moai, i statov de preja che adess se troeuven longh i coste. Del pont de vista aministrativ a l'è una provinza a sé de la region de Valparaíso del Cile. L'orari standard a l'è ses ore indree rispet a l'UTC (UTC-6).

L'Isola de Pasqua a l'è in su la dorsal pacifega da la che la ciapa origen. La costa la se sbassa donca rapidament arent a l'isola in fina a profondità che poeuden rivà a tremila meter. A causa di so origen volcaneghe, l'isola la s'è formada in su una bas basaltega tipega per i dorsai oceaneghe; la gh'ha minga, donca, tante spiage. La pupart a l'è distinta de scoeujere.

La so forma la regorda un poo quella de un triangol retangol, cont una longhezza massema de 24 chilometer e una larghezza massema de 13 chilometer. I tre elevazzion principai corrisponden a tri con de volcan smorzad, o ben el Rano Kau, el Maunga Puakatiki e el Maunga Terevaka. Quest ultem el riva a un'altezza de 509 meter e l'è donca el pont pussee in volt de tuta l'isola.

A sud de l'isola, se troeuven tre isole minor (Motu Iti, Motu Kau Kau e Motu Nui), disabitade. L'arcipelagh pussee visin a l'Isola de Pasqua a l'è l'arcipelagh di Isole Austrai, cont i isole de Tubuai e Rapa. A causa de la so posizzion, l'Isola de Pasqua la presenta un clima subtropical con temperadure medie intorna ai 21 grad centigrad e con squas nissuna diferenza termega in tra una stagion e l'oltra. L'isola a l'è donca esposta per la pupart de l'ann a l'alisee, che el bofa in direzzion nord est.

Geologia[Modifega | modifica 'l sorgent]

El crater de Rano Kau

L'isola de Pasqua a l'è un'isola volcanega formada sostanzialment de tri volcan smorzad, el Terevaka, che 'l costituiss la part centrala de l'isola, e du volcan pussee piscinin el Poike in de la part oriental de l'isola e el Rano Kau in de la part meridional. Olter testimoni de l'atività volcanega de l'isola a inn el crater Rano Raraku, el con volcanegh Puna Pau e i tante crote volcaneghe, inclus i tunel de lava.[2] L'isola a l'è de sorapu prevalentement dominada de colade de hawaiid e basalt che inn riche de ferr e gh'hann element compagn di preje magmateghe che se troeuven in sui isole Galapagos.[3]

Insiema ai so isole minor coma Motu Nui e Motu Iti, l'Isola de Pasqua a l'è la somità de un grand con volcanegh che el se leva in pè del fond oceanegh de una profondità de pussee de 2.000 meter. Quella montagna chì a l'è part de la cresta Sala y Gómez, una cadena montuosa che per la pupart a l'è sotamarina con desine de guzz. La cresta a l'è formada del passagg de la placa de Nazca sora el pont cold de l'Isola de Pasqua.[4] L'Isola de Pasqua, Pukao e Moai se inn formad circa 750.000 agn indree e inn i pussee sgiovin de questa cadena montuosa marina, inscambi l'eruzzion pussee recent a l'è de poch pussee de 100.000 agn indree.

In del cors del XX secol a l'è stad vedud sortì pussee de una voeula del vapor di pared del crater Rano Kau.[5] L'Isola de Pasqua la da el nom a la vesina placa tetonega de l'Isola de Pasqua che, anca lee, la nass in su la placa de Nazca.

Art e coltura[Modifega | modifica 'l sorgent]

Moai[Modifega | modifica 'l sorgent]

Una linea Moai
Moai Rano Raraku
I "guardian" de l'isola
Exquisite-kfind.png Per savenn pussee, varda l'articol Moai.

I grand statov, con dimension variabel in tra 5 e 10 meter de altezza, che se troeuven in su l'isola a inn ciamad moai. In su l'isola esisten 638 moai, segond i recerche del Sebastian Englert. Ancaben i ricerche, però el so scopo a l'è minga cognossud con certezza. I statov a inn tute revolte vers el de denter de l’isola e podarissen representà cap tribù indigen mort; segond la credenza popolara havarien permetud ai viv de ciapà contat cont el mond di mort. Quei enorm statov chì vegniven trasportade di voeulte per divers chilometer, despess rivaven in del sit prefissad (inscì la se giustifega la presenza de statov lassade per terra e s'cepade per l’isola), travers sgioeugh de baricenter, permeteven ai abitant de l’isola de trasporta quei gigantesche statov chì squas che “caminaven indeperlor” (coma descrivud di istess isolan).

Rongorongo[Modifega | modifica 'l sorgent]

Test scrivud in Rongorongo
Exquisite-kfind.png Per savenn pussee, varda l'articol Rongorongo.

L'Isola de Pasqua a l'è l'unega in de l'area del Sud Pacifegh a havé desvilupad una scritura propia, ciamada Rongorongo.

Impunemanch inn minga calade, anca al a proposit de la scritura indigena, controversie in del mond scentifegh; l'archeologh statunitens Kenneth P. Emory el sosteneva che i poche tavole scrivude descoverte in tra el 1722 e el 1868 fudessen domà imitazzion fade de la popolazzion indigena de la scritura doperada di prim descovritor de l'Isola de Pasqua.

La scritura Rongorongo a l'è stada minga decifrada completament e per tant decenn a l'è remasta incompresa. Grazzia ai studi condut del todesch Thomas Barthel e a la descoverta de una tavoleta che la reportava un calendari lunar (incoeu conservada in de l'archivi di SS Cuori a Grottaferrata in di press de Roma), la tavoleta Mamari, a l'è stad possibel decifrà parzialment un quai simbol.

In tut el mond esisten 26 tavolete scrivude in Rongorongo, di quai domà una minima part a l'è stada traducida.

Orongo e el cult de l'om usell[Modifega | modifica 'l sorgent]

Vista in su Motu Nui con riliev de l'om usell scolpid in de la preja.

Despoeu di cambiament de denter de la società e ai cambiament ambientai provocad de la popolazzion indigena, rl se verifega anca un cambiament de tradizzion e credenze di tribù indigene che popolaven l'isola. Del 1500 d.C. vegnen pu trad in pè noeuv moai, ma quei che gh'eren vegnen tirad sgiò. La finiss donca anca la venerazzion di av che in fin a quell moment representava la tradizzion pussee importanta de la popolazzion indigena. Al post di av si venera adess l'Om Usell (in polinesian Tangata manu): una creadura per metà om e per metà usell.

Ogne primavera i tribù de l'isola scerniven un guerrer che 'l gh'haveva de partecipà al rito de l'om usell. El rito el consisteva in d'una gara de forza e abilità: si partiva del santuari de Orongo, se soltava sciò in mar del vulcano Rano Kao, se rivava a noeud - cont el ris'c di squai - l'isolot de Motu Nui, chì se catava su el prim oeuv de sterna carisnenta e el se reportava a terra al Gran Sacerdot. Chi l'era bon de portà per prim un oeuv intregh el diventava el noeuv om usell in fina a la primavera che la vegniva, quand che el ritual el si repeteva.

Quai sien i origen de quell ritual chì a l'è descognossud e an'mò manch se sa se la tradizzion de l'om usell l'esistess sgiamò prima del 1500 o se la sia stada frut (come un quai archeologh el pensa) de una quai casta de guerrer[6], che voleven in quella manera chì havé una posizzion de riliev. Ciar a l'è che in su tante isole popolade di polinesian se venerava sgiamò in passad l'om usell. Se poeul pensa donca che quell tip de cult chì el gh'habia di origen lontane e che el fudess sgiamò praticad de la popolazzion indigena prima del 1500, anca se forsi in forma minor.

Rei Miro[Modifega | modifica 'l sorgent]

Rei Miro representad in su la bandera de l'Isola de Pasqua

El Rei Miro a l'è un petoral de legn tipegh de la coltura de l'Isola de Pasqua. In passae quell chì a l'era fad su cont el legn de la pianta de Toromiro, e l'era decorad ai do estremità de du coo de animai, scolpid. El Rei Miro el poeul representà sia un usell che un'imbarcazzion. Un quai esemplar gh'hann anca incision in Rongorongo e du bus per fà passà una corda piscinina che, probabilment, la serviva per francàll. Qual el sia la fonzion o el segnifegad de quell lavorà chì a l'è ancamò descognossud.

El Rei Miro a l'è anca diventad el simbol de l'Isola de Pasqua. In su la bandera de l'isola de fad a l'è representad un Rei Miro de color ross in su sfond bianch.

I crote[Modifega | modifica 'l sorgent]

El dé Makemake scolpid in su una preja

I origen vulcaneghe de l'isola hann fad sì che la gh'habia un bell numer de crote. Quei chì, formade in de la fas finala di eruzzion, quand che i fium di magma sota terra tacaven a fredàss, inn stade doperade per tant secoi da la popolazzion indigena coma sit de cult. A testimonianza de questa atività, in tante de queste se poeuden ancamò trovà dipint rupester e Altoriliev che representen sia l'om usell che el dé Makemake.

L'esata collocazzion di singole crote a l'era un secret ben protesgiud di cap tribù, che tramandaven a vos i rit de fà e i sit di crote a singol member de la comunità. Una quai crota a l'era anca doperada per soterrà in d'un quai cas i propi mort, coma testimonien ritrovament de oss uman. In del period di deportazzion da part di mercant de s'ciav i crote vegnen doperade per scondess.

Note[Modifega | modifica 'l sorgent]

  1. Portal Rapa Nui. URL consultato in data 11 febbraio 2012(archiviato dall'url originale in data 14 gennaio 2012)
  2. "Easter Island Arqiviad qé: [1] ol 14 maggio 2013". Global Volcanism Program, Smithsonian Institution. Acceduto il 18 marzo 2010.
  3. P. E. Baker, F. Buckley e J. G. Holland, Petrology and geochemistry of Easter Island (PDF), in Contributions to Mineralogy and Petrology, vol. 44, 1974, pp. 85–100, Bibcode:1974CoMP...44...85B, DOI:10.1007/BF00385783. URL consultato il 25 luglio 2011 (archiviato dall'url originale il 21 febbraio 2011).
  4. Inst of Petrology Vol 38 The Petrogenetic Evolution of Lavas from Easter Island and Neighbouring Seamounts, Near-ridge Hotspot Volcanoes in the SE Pacific – Haase, Stoffers & Garbe-Schoneberg 15. URL consultato in data 2 maggio 2019(archiviato dall'url originale in data 24 maggio 2011)
  5. Rapanui: Edmunds and Bryan Photograph Collection Arqiviad qé: [2] ol 3 aprile 2008. Libweb.hawaii.edu. Ultimo accesso: 6 novembre 2010.
  6. Heide-Margaret Esen-Baur, 1500 Jahre Kultur der Osterinsel–Schätze aus dem Land des Hotu Matua, Katalog zur Ausstellung veranstaltet von der Deutsch-Ibero-Amerikanischen Gesellschaft Frankfurt a. M. vom 5. April bis 3. September 1989, Mainz am Rhein 1989, p. 109.

Bibliografia[Modifega | modifica 'l sorgent]

  • (EN) Irina K. Federova, Versions of Myths and Legends in Manuscripts from Easter Island, in Thor Heyerdahl e Edwin N. Ferdon Jr. (a cura de), Reports of the Norwegian Archaeological Expedition to Easter Island and East Pacific, Stocolma, Forum, 1965, volum 2, pp. 395 – 401.