Rongorongo
|
Quest articol chì l'è scrivud in lombard, con la Noeuva Ortografia Lombarda |
El rongorongo (o ko hau rongo rongo) a l'è un sistema de glif descovert in de l'isola de Pasqua in del XIX secol e che el par vesser una forma de scritura. Numeros tentativ inn stad fad per decifràll e capì la strutura, ma nissun el gh'ha havud sucess in de l'interpretà el signifegad di glif. Se el fudess confermad coma forma de scritura e el fudess stad desvilupad di nativ in de l'isola de Pasqua prima de la vegnuda di ocidentai, el rongorongo el saria una di poche invenzion indipendent de la scritura esistent al mond.[1]
Lavorà de legn con iscrizzion in rongorongo inn stad trovad in del XIX secol, un quaivun dagnad fess, e trasportad in tant musee e collezzion privade spantegade in tut el mond. Quei lavorà chì a inn principalment tavolete, ma a gh'inn iscrizzion in rongorongo anca in su statov in legn e in su ornament coma el Rei Miro; nissun de quei manufat chì a l'è restad in su l'isola de Pasqua.
El rongorongo a l'è una scritura con andament bustrofedegh invers, o ben a l'è scrivud in direzzion alternant. Tant glif representen forme uman, de animai, de piante, o forme geometreghe astrate. In sul finì del 1800 el rongorongo el descompariss e i poch nativ restad in su l'isola de Pasqua eren pu bon de lensgell e scrivell, a causa di epidemie e di atach di schiavist che hann cambiad fess la società rapanui in del XIX secol.
Etimologia
[Modifega | modifica 'l sorgent]El termen rongorongo el deriva de la lengua rapanui e el segnifega "recità" o "declamà", la parolla Rapanui rongo (/ɾoŋo/) a l'è imparentada in tante olter lengov austronesiane, coma in de la lengua males dengar (/dəŋar/) o in de la lengua figiana rogoca (/roŋoða/), indova quei parolle chì gh'hann el segnifegad de "ascoltà" o "sentì".[2]
El nom origenal de la scritura, o forsi mei la so descrizzion, la saria kohau motu mo rongorongo, o ben "linee incise per vesser cantade".[2]
Descrizzion de la scritura
[Modifega | modifica 'l sorgent].jpg)
e 
) inn ligad de una curva sotila che la podaria vesser stada scrivuda con l'ossidiana. I glif 
inn ligad anca lor de una linea de quell sgener chì, trop debol per vesser veduda in de la foto, che i liga ai man de la figura umana.I test in rongorongo eren scrivud con andament bustrofedegh invers, del bass in volt, de manzina a drizza. El letore el taca donca a lensger del canton in bass a manzina de la tavoleta, el seguta vers drizza in fina a la fin de la riga, el gira la tavola de 180 grad, e el va inanz a lensgere la linea che la vegn. In del lensger una linea, quella che la vegn e quella passada paren donca riflesse.
Strument de scritura
[Modifega | modifica 'l sorgent]Segond la tradizzion oral, i tavolete in rongorongo eren scrivude con stil de ossidiana o dent de squal.[3] I glif eren componid de incision regolar profonde, ancaben sien stade trovade anca debol incision che resten in superfis. A l'è possibel che la tavoleta la vegniva prima sgarlada debolment con ossidiana e poeu scrivuda e incisa definitivament cont i dent de squal, i segn legger restad sarien donca error de scritura o decorazzion. [4]
Una quai tavolete la par vesser scrivuda con strument in ferr. Ancaben di cortell podarissen vesser stad scambiad cont i spagnoeul in di prim contat, quell fad chì el met di dubi in su la real autenticità de quei lavorà chì, che podarissen vesser cobie fade di prim turist in sul finì del 1800.[5]
I glif
[Modifega | modifica 'l sorgent]I glif inn costituid de forme stilizzade uman, animai, vegetai o forme geometreghe, e despess formen compost. Squas tucc i glif che representen figure cont el coo a inn orientad cont el coo in volt e inn vedud sia de denanz o de profil drizz, in de la direzzion de scritura. Se sa minga qual segnifegad el poeuda havé havud un glif cont el coo in sgiò o de profil manzin. I coo gh'hann despess segn longh carateristegh in sui bande che somejen oeugg (coma i glif che representen i bisse scudellere), ma che despess somejen oregge (coma in su un quai petroglif antropomorf). I usell a inn comun; olter glif somejen a pess o artropod. Poch a inn compagn di petroglif trovad in tuta l'isola.
Petroglif
[Modifega | modifica 'l sorgent]
Ancaben larga part di test rongorongo conservad in fina a incoeu sien stad scrivud in su tavolete de legn, un quai esempi de rongorongo a inn stad trovad in sui preje de l'isola de Pasqua coma petroglif. L'isola de Pasqua la gh'ha de fad el pussee rich assortiment de petroglif de la Polinesia.[6] Squas ogne superfis adata a l'è stada sgarlada, anca i mur in preja de una quai cà e de una quai di famose statov mo'ai. Circa mila sit con pussee de quatermila glif inn stad catalogad, un quaidun in bass- o volt-riliev, e un quaidun dipingiud de ross e bianch. Anca se i petroglif poeuden minga vesser datad diretament, un quaidun a l'è in part oscurad de antigh edifizzi in preja precolonial, quest el faria capì che se trata de petroglif relativament vegg.
Note
[Modifega | modifica 'l sorgent]- ↑ Robinson, Andrew, Writing and Script: A Very Short Introduction, Oxford University Press, 2009.
- ↑ 2,0 2,1 Englert 1970.
- ↑ Métraux 1940, p. 404.
- ↑ Fischer 1997, pp. 389–390.
- ↑ Per esempi el Métraux l'ha scrivud in del 1938 a revard de la tavola denominada V: "its authenticity is doubtful. The signs appear to have been incised with a steel implement, and do not show the regularity and beauty of outline which characterise the original tablets."
- ↑ Lee 1992.