Motu Nui

Quest articol chì l'è scrivud in lombard, con la Noeuva Ortografia Lombarda

Vista in su Motu Nui con riliev del'om usell sgarlad in de la preja

L'isola de Motu Nui a l'è la pussee grand di tre isole situade poch pussee a sud de l'isola de Pasqua. I olter do isole a inn Motu Kao Kao e Motu Iti. Coma tute i olter isole de la zona Motu Nui l'apartegn al Cile e l'è anca la località pussee a ovest in del territori cilen. A Motu Nui fann el nin ogne ann i sterne carisnente, e propi a lor a l'è ligad el Cult de l'Om Usell, che l'ha sostituid el cult di antenad moai.

El Cult de l'Om Usell

Ogne primavera tucc i tribù scerniven un guerrer che che 'l gh'haveva de partecipà a la gara/rit, che la consisteva in d'una rapida corsa longh i percors del volcan Rano Kao (squas 300 m) a Orongo, con noeud in de l'ocean in fina a Motu Nui con un insema de canne per minga negà; una voeulta in su l'isolot, el guerrer el gh'haveva de catà su un oeuv de sterna, e portàll a terra al Gran Sacerdot despoeu de vesser tornad su. Chi el rivava per prim senza feride (i ris'c de un atach de squal, o che l'oeuv el se rompess, eren tant) el vegniva nominad Om Usell e adorad coma un dé in terra, e a la so tribù el vegniva concess el podé giurisdizzional de l'isola per un ann. A la primavera che la vegniva el rit el se repeteva.

Motu Nui, con la pussee piscinina Motu Iti e el scoeui marin de Motu Kao Kao. Fotografia fada in del sgenar 2004, de Orongo del volcan Rano Kau, a circa 250 meter sora el nivell del mar.

Segondo un quaivun, el rit de l'Om Usell a l'era tipegg di culture polinesiane, e la gh'era in de l'isola fin a la so colonizazzion, inscambi olter sostegnen che el fudess stad frut de una quai casta de guerrer per seguràss una posizzion de riliev. L'ipotesi pussee recent a l'è che el sia stad una spece de cambiament de la religion prima doperada, che la se fondava in sul cult di antenad e in su l'erezzion di moai, i statov in so onor. La so costruzzion però, in tra scultura e soratut trasport (vegniven doperad bore de piante in manera semper pussee granda) la finì probabilment con l'impoverì l'isola e desboscàlla completament: inscì s'è rivad a una catastrofe ecologega indova, per el fad che el calava el mangià, s'è rivad fin al canibalism. De scià, donva, la decision de "trovà" una noeuva religion, in del tentativ de salvà l'isola.

Ligam de foeura

• Katherine Routledge: The mystery of Easter island, Adventures Unlimited Pr 1998, ISBN 0932813488 (in Google Books [1] and in Internet Archive [2]) (reprint of original book from 1919)
• Patrick C. McCoy: The Place of Near-Shore Islets in Easter Island Prehistory. The Journal of the Polynesian Society, Vol. 87, No. 3 (September 1978), pp. 193-214