Corp Sant (MI)
Quell di Corp Sant (Corpi Santi di Milano) l'è staa on vegg comun de la Provincia de Milan, che 'l cattava dent i cassinn e i borgh tutt intorna a Milan. L'è esistii del 1757 fina al 1873. In del 1871 ghe viveven 62.976 personn.
Storia
[Modifega | modifica 'l sorgent]El nomm probabilment el vegn del fatt che ai temp di Austriegh i cimiteri se trovaven tucc foeura di bastion milanes, proppi in la zona indove che se trovava el territori de quell comun chì.
L'è staa istituii de l'imperadris Maria Teresa in del 1757 cont el nomm italian de Corpi Santi, anca se l'è vegnuu ona realtà domà in del 1782.
El comun di Corp Sant l'era ona zona agricola, ricca de camp e de ort, oltra che ricch de cors d'aqua (el Lamber, l'Olona, el Seves, el Niron e i Navili).
L'è staa taccaa a Milan ai temp del Napoleon, anca se poeu l'è tornaa indipendent con la Restaverazion. In del 1859 l'ha mudaa el sò nomm in Corpi Santi di Milano, per minga sconfondes cont el comun omonim in provincia de Pavia.
In del 1860 s'è taccaa a parlà de on'union tra i Corp Sant e Milan: anca se minga tucc eren d'accordi (e de fatt la gh'è stada anca ona quai rivolta popolar), i Corp Sant hinn staa annettuu a Milan el vott de giugn del 1873. On quai borgh però l'è staa spartii cont i alter comun confinant: quest chì l'è 'l cas de Cimian (taccaa a Crescenzagh), Lampugnan (taccaa a Trenn) e Lorentegg (taccaa a Corsigh).
Composizion del comun
[Modifega | modifica 'l sorgent]El comun di Corp Sant a l'era spartii offizialment in duu mandament (quell de sett e quell de vott del Circondari de Milan) e in vundes borgh (anca se poeu ghe n'era di alter, senza cuntà tutt i cassinn):
- La Maddalena
- San Sir
- Bativacca
- Calvairaa
- San Peder
- Carrera
- Cassinn di Biff
- Morsencc
- Santa Maria Rossa
- Mirasol
- Grattasoeuj
Inoltra gh'era anca i borgh e i cassinn de la Barona, de la Ghisolfa, de la Bovisa, di Trii Ronchett, de Monluè, de Talied, de Fontana, de Lorentegg, de Lampugnan e Cimian.
I duu mandament eren dividuu vun de l'alter di port de Milan, ai quai de norma besognava pagà el dazzi: ma el comun di Corp Sant l'era minga soggett ai dazzi, inscì tutt quell che ghe vegniva el costava meno.
