Liechtenstein: Diferenza intra i version.

El Liechtenstein (officialment Principaa del Liechtenstein, in todesch Fürstentum Liechtenstein, in alemann Förschtatum Liachtaschta) a l'è 'na monarchia costituzionala europea, situada in tra la Svizzera e l'Austria.

Storia

El nass del principaa

⇒

LORUNIF

Endel sècol XVII la famìa dei Liechtestein, uriginària de la Bàsa Austria, l'ìa dré a sercà la maniéra de ìga 'n pòst endela Dieta Imperiala (Reichstag), ma i pòscc i éra reservàcc apéna ai nòbii che gh'ìa posedimèncc diretamènt sóta 'l tròno imperiàl, sènsa personàgi feudài intermediàre, e nisü dei posedimèncc de la famìa a chèl tép là i respetàa chèsto requizìt.

Endel 1699 la famìa la g'ha ìt l'ocaziù de crumpà de la famìa dei Hohenems la Signurìa de Schellenberg, e quach agn dòpo, endel 1712 la contèa de Vaduz, du teretóre picinì ma che gh'ìa le caraterìstiche che i Liechtestein i sercàa, cioè ìga nisü óter signùr feudàl che l'emperadùr stès.

Endel més de zenér del 1719, dòpo che töte le trafìle per el pasàgi de proprietà i éra stàde completàde, l'emperadùr Carlo VI, el g'ha decretàt l'üniù de Vaduz e Schellenberg, e l'inalsamènt de chèsto teretóre al rànch de Principàt (Fürstentum) col nòm de "Liechtenstein" en unùr al sò fidàt servidùr, Anton Florian del Liechtenstein. L'è alùra che el Liechtenstein l'è deentàt en stat sovrà mèmber del Sàcro Romàno Impéro. A testemognànsa del fat che töta la vicènda l'ìa apéna 'n espediènt pulìtich, el Prìncipe del Liechtenstein el g'ha mìa mitìt pè endel sò nöf teretóre per piö de 120 agn.

La fin de la Confederazion e i guerr

Dopo de la fin de la Confederazion germanica in del 1866 el Stat el renonzia a l'esercit e 'l scerniss de affidà la difesa a la vesina Svizzera.

Dopo de la prima guerra mondiala el Stat el renonzia a ogni ligamm con l'Austria e 'l decid de entrà in union dovanala con la Svizzera e in del 1922 scerniss de doperà el franch 'me moneda.

Durant de la segonda guerra mondiala el Principaa, grazia al Franzesch Isepp, el resta neutral e finna al 1938, cont l'Anschluss, i Prinzep viveven a Vienna. L'espansionism hitlerian a l'era on bell ris'c per el Principaa, an'mò teoricament in guerra cont el stat successor de la Prussia, ma grazia al sò ligamm cont la Svizzera a l'è minga toccaa.

Dopoguerra

Dopo de la segonda guerra mondiala el Stat el deventa 'n canton assee important per el commercc internazional, tant che incoeu a l'è el Stat cont el reddit pro capite pussee volt del mond.

L'ha avuu on para de incident diplomatich: El primm, dovuu ai decrett Beneš ch'han sequestraa ai Liechtenstein i sò terr in Cecoslovacchia, e finii domà in del 2009 quand che 'l Principaa l'ha vert i sò relazion cont Cechia e Slovacchia, e 'l segond cont el Guatemala, relativ a 'n cittadin del Liechtenstein, prumma todesch, consideraa desenemis di autorità e menaa in preson in di Stat Unii, menaa innanz a la Cort Internazionala.

In del 1983 dopo de 'n referendum a l'è deciduu de dàgh el dirizz di vot ai dònn, che l'è recognossuu anca in tucc i comun in del 1986: L'è staa el daree Stat europee a garantì 'sto dirizz.

Dal 1 de genar 2000 el Liechtenstein el gh'ha la soa società de posta, dopo che de l'union dovanala hinn staa gestii de La Posta Svizzera.

In del 2003 a l'è reformada la Costituzion per dà pussee podè al Prinzep e mett la possibilità de secession per i comun e de abolì la monarchia, l'ann dopo el Giovann Adamm el nomina reggent el sò fioeu Luis.

Del 2018 el Paes, el segond in Europa dopo Malta, el scomincia a fà di legg in favor di criptodanee e vuna di banch del Paes la nonzia de vorè fà la soa crittomoneda coverta del franch.

Geografia

El Paes a l'è situaa in sui Alp, e 'l confin ocidental a l'è formaa del Ren. El pont pussee volt a l'è el Grauspitz e, anca se l'è in alt in sui mont, grazia ai vent che riven del Sud el gh'è 'n clima mit.

A bon cunt di alter scimm important del Liechtenstein, che d'invern a l'è 'na meta interessanta per quej che fann sport invernal, a hinn l'Hinter Grauspitz, el Mazorakopf, el Naafkopf e 'l Falknis.

El confina con la Svizzera, a ovest cont el San Gal e a sud cont el Grison e a est cont el Vorarlberg, land de l'Austria.

A l'è, insemma a l'Uzbekistan, vun di Stat dobbiament senza sbocch al mar, degià che tucc i Stat che ghe confinen a hinn minga in sul mar.

Politega

El Paes a l'è 'na monarchia costituzional guidada de 'n Prinzep, incoeu el Giovann Adamm II, anca se dal 2004 el sò fioeu Luis a l'è el reggent. La Costituzion del Liechtenstein a l'è in vigor del 1921 e in del 2003 l'è stada emendada assee per permett de abolì la monarchia e ai comun de autodeterminàss e de fà la secession.

El Parlament del Paes a l'è el Landtag e 'l Prim Minister a l'è 'l Adrian Hasler. El governa a l'è nominaa del Prinzep in sul suggeriment del Landtag, anca se in pratega el se limita a nominà la forza che l'ha vinciuu i elezion.

El Prinzep e gh'ha el podè de veto in sui legg e in sui referendum popolar, foeura che per i referendum che abolissen la monarchia o de autodeterminazion, el poeu parpoeu legg e referendum e 'l pò desligà el Landtag, anca se 'l Pòpol el gh'ha el dirizz de annullà 'sta decision cont on referendum. A l'è anca a capo de la diplomazia statala, anca se a bon cunt a l'è per la pupart delegada a la Svizzera.

Comun

El Liechtenstein a l'è compartii in vundes comun: Ogni comun el gh'ha el dirizz de secession de l'union statala.

I comun a hinn compartii in du circondari elettorai, Oberland e Unterland, che reppresenten l'antiga division in tra Schellenberg e Vaduz.

Oberland
- Schellenberg
- Ruggell
- Mauren
- Gamprin
- Eschen
Unterland
- Vaduz
- Schaan
- Planken
- Triesen
- Triesenberg
- Balzers

Simboi nazionai

La bandera del Paes a l'è bloeua e rossa cont ona corona a reppresentà i prinzep. La gh'è anca 'na bandiera fondada in sui color de la familia Liechtenstein, gialda e rossa.

El stemma a l'è assee compless: De solit a l'è doperaa on stemma semplificaa giald e ross.

L'inn nazional, Oben am jungen Rhein, l'è fondaa in su la melodia del God save the Queen, tolta de la Confederazion germanica, e 'l canta 'n oda al Paes e al Prinzep.

El motto nazional a l'è "Für Gott, Fürst und Vaterland", cioè "Per Dia, el Prinzep e la Patria".

Dirizz uman

I dirizz uman in Liechtenstein a hinn tutelaa assee. Dal 1996 l'è staa faa sù 'n Offizzi di Pari Opportunità, pensaa in origin paj donn e incoeu doperaa soratutt per i disabil e i immigraa.

El Paes el rispetta tucc i libertà fondamentai de immigrazion, de sociazion, de studi e de lavorà. El manca però 'n orghen independent che 'l se occupa de dirizz.

I dirizz LGBT in Liechtenstein a hinn respettaa assee: Gh'è 'na legg anti-discriminazion, i gay pòden unìss civilment e, 'me single, adottà.

Dal 1983 i donn voten e dal 1996 el Paes l'ha firmaa la convenzion in sui dirizz i donn. Hinn tutelaa anca i dirizz di fiolitt: L'età del consens a l'è de 14 agn e 'l stupro a l'è punii cont la galera de 1 a 10 agn.

Hinn recognossuu anca i dirizz di lavorent, che pòden contrattà in su bas collettiva e unìss in sindacaa.

Cittadinanza

El principi fondamentàl de la cittadinanza a l'è el ius sanguinis: El fioeu de 'n cittadin del Liechtenstein a l'è anca luu cittadin del Liechtenstein.

A l'è possibil anca naturalizzàss dòpo 30 agn de residenza o prumma, per vot popolar e approvazion del Landtag. A l'è necessari renonzià a la cittadinanza de prima, anca se in teoria, se vun el gh'ha giamò la cittadinanza a l'è possibil ciappànn on'oltra.

Se maridaa cont on cittadin del Prenzipaa a l'è possibil deventà cittadin dòpo 10 agn, i agn in del matrimoni conten el dobbi, cont la necessità de superà 'n esamm de todesch e de politega.

Residenza per forestee

El Paes l'emett 89 permèss l'ann per forestee, la mità a hinn daa per lotteria e l'altra direttament del governo: 72 hinn garantii ai cittadin del Spazzi Economich Europee.

A l'è assee frequent che i lavorent forestee del Liechtenstein viven in Isvizzera o in Austria, in attesa del permess o anca sènza mai domandàll.

Dopo 5 agn de residenza a l'è possibil deventà resident permanent.

Relazion internazionai

La sovranità del Liechtenstein a l'è defenduda de la Svizzera dal 1866, Paes che 'l gh'ha di fort relazion cont el Principaa, tant che el Liechtenstein el dopera el franch svizzer e i sò confin a hinn protegiuu, dal 1922, di Guardii de Confin svizzer. Finna a la prima guerra mondiala a l'era in union dovanala cont l'Austria-Ongaria e i sò confin eren protegiuu di Guardii de Confin del Liechtenstein

L'è member de la Sociazion Europea de Liber Scambi, de l'Organizzazion di Nazion Unii e del Spazzi Economich Europee.

A causa di decrett Beneš, ch'han tolt via di patrimoni de la fameja Liechtenstein in Cecoslovacchia, el Paes l'ha saraa i relazion cont el Stat e l'ha vert i relazion cont la Cechia e la Slovacchia domà in del 2009.

El gh'ha anca di bon rappòrt cont l'Austria, cont la che collabora in materia de polizia, de preson e de red ferroviaria.

Economia

El Liechtenstein a l'è senza debit publegh e 'l dopera el franch svizzer 'me moneda, cont la possibilità de conià di moned sò, in quantità limitada, senza valor in Isvizzera. In teoria l'è ancamò in vigor el franch del Liechtenstein, che però l'è emettuu domà 'me moneda cerimoniala per i collezionista.

Degià ch'a l'è 'n Paes senza resors, la pupart de la soa economia a l'è fondada in sui banch e in sul commercc cont i Stat forestee, anca se 'l gh'è 'n bon settor industrial. El gh'ha pussee impres registraa che individov resident e 'l gh'ha on reddit pro capite de 139'000 dollar, el pussee volt del mond.

A gh'è anca 'na piscininna industria agricola che la coltriva gran, granturch, pomm de terra e orz e la produs formaj e vin.

Tass

El Paes el gh'ha 'na tassa in sul reddit statala del 1,2%, che cont i tass di comun la riva, in media, al 18%. L'è giontaa on 4% per quej che doperen i servizzi de sicurezza sociala. I aziend a hinn inveci tassaa del 12,5%.

Gh'è 'na tassa patrimoniala progressiva e 'na tassa in sui donazion e i eredità che la varia dal 0,25% al 0,75% per i parent e dal 18% al 27% per i minga parent.

A l'è consideraa on paradis fiscal e finna ai primm agn 2000 el gh'eva on strett secrett bancari, finna a quand, in del 2009, hinn staa abolii 'sti legg.

Coltura

Lengua

La lengua offiziala del Stat a l'è el todesch, ma la pupart di gent la parla on dialett alemann compagn de quell parlaa in Isvizzera o in del Vorarlberg. In del comun de Triesenberg gh'è 'n dialett walser tutelaa offizialment.

Religion

El cattolicesim a l'è la religion offiziala del Stat, e gh'è libertà de cult. In di scoeur a l'è obbligatoria 'n educazion religiosa, cattolica o protestanta.

Art

La fameja Liechtenstein la gh'ha 'na granda collezion d'art, esposta in del Kunstmuseum Liechtenstein e in del Musee Nazional del Liechtenstein.

Fest

In del Paes a hinn festegiaa la pupart di festività cattolich e gh'è du fest publegh: El 15 de agost, Festa Nazionala, e 'l 2 de genar, festa de Berthold V de Zähringen. El 15 de agost i cittadin a hinn invitaa al Castell per parlà cont el Prinzep e 'la Cà Prinzepesca la offriss la birra a tucc.

Media

El Paes a l'è servii de la Liechtenstein Telekom per i telecomunicazion. A gh'è 'na TV privada, 1 FL TV e 'na radio, FL Radio.

Straport

Strada

Gh'è 250 km de strada asfaltada e 90 km de pista ciclabil. El strapòrt publegh a l'è gestii de Liechtenstein Bus, sussidiaria de la società di postaj svizzer, che la conliga el Paes anca a 'na quaj città de confin.

Ferrovia

L'unica ferrovia del Stat a l'è la Feldkirch–Buchs, gestida de l'ÖBB. L'è doperada domà de relazion regionai, ghe passen di treni Eurocity da e per la Svizzera ma se fermen no.

Aria

El Liechtenstein el gh'ha nissun aeroport e domà 'n eliport a Balzers. L'aeroport pussee vesin a l'è quell de San Gall, quell internazional quell de Zurigh.

Sport

Schi alpin

El schi alpin a l'è el sport pussee spantegaa in del Liechtenstein e 'l gh'è sta di atletta famos e plurimedajaa 'me Hanni Wenzel, Andreas Wenzel, Paul Frommelt, Marco Büchel e Tina Weirather.

Folball

La Federazion del Folball del Liechtenstein a l'è in la UEFA e la organizza nissun campionaa: I squader de club giughen in del campionaa svizzer. La gh'è 'na nazional, che la s'è mai qualificada in di copp europee e nanca a la Coppa del Mond. La Liechtensteiner-Cup, che la da access a l'Europa League, la ved i squader sfidàss in tra de lor e anca cont di squader faa de giugador forestee.

Gioeugh olimpich e alter sport

Di atletta del Liechtenstein partecipen ai Olimpiadi: Domà Hanni Wenzel l'ha vinciuu, però, la medaja d'or.

Gh'èl 'na nazional de pallavol, mascolina e femminina, che la giuga in del campionaa europee di Stat piscinitt.

I di Gioeugh di Stat piscinitt, che l'ha ospitaa dò voeult, l'ha vinciuu 64 medaj d'or.

L'ha partecipaa anca a 'n edizion di Gioeugh sènza frontee in del 1976.

Sicurezza e defesa

La sicurezza del Stat a l'è affidada a la Landespolizei, compartida in servizzi statal e comunal, che la gh'ha anca 'n unità paramilitar per dà i onor al Prinzep e gestì di rivolt. A bon cunt el Liechtenstein a l'è vun di Stat con men criminalità in del mond e la pupart di abitant la sara nanca i port prima de andà a dormì. Gh'è 'na collaborazion cont l'Interpol e soratutt cont i polizij svizzer e austriegh.

La defesa del Liechtenstein, Stat neutral, a l'è affidada a la Svizzera dopo che la fin de la Confederazion germanica l'ha liberaa el Stat di sò obbligh militar. Gh'è staa on para de incident de l'Esercit svizzer, vun in di agn 1980, quand che di soldaa han brusaa 'n tocchell de foresta, e vun in del 2007, quand che 170 soldaa hinn entraa per error e, quand han notaa l'error, hinn andaa via e han presentaa i sò scus offiziai. In tucc e du i cas el Liechtenstein l'ha accettaa bonariament i scus, reppreentaa in del primm cas de 'na cassa de vin bianch, e l'ha dii che hinn di ròbb che capiten.

Riferiment

I Stat de l'Europa

1. Stat parzialment in Asia. 2. Stat in Asia, però considerads part de l'Europa per dei rexon storeg e culturai

@@ Riga 217: / Riga 217: @@
 *[https://www.liechtenstein-business.li/en/living-in-liechtenstein/life-in-the-principality/residence-permits/ Liechtenstein - Residence permits]
 *[https://www.amnesty.org/en/countries/europe-and-central-asia/liechtenstein/ Liechtenstein - Amnesty International]
+*[https://coincentral.com/liechtenstein-crypto-powerhouse/ Why Tiny Liechtenstein Is Becoming a Crypto Powerhouse]
 {{Stat de l'Europa}}