Vaduz

De Wikipedia
Va a: navegá, truvá
Lumbard ucidental Quest articol chì l'è scrivuu in lombard, grafia milanesa.
Vaduz
Stema de Vaduz
Panurama de Vaduz
Staa Liechtenstein
Distrett Oberland
Popolazion 5 429 ab.  (Al

30/06/2015)

Superfis

17.315 km²

Altituden

460 m

Còdes postal 9490
Vaduz in Liechtenstein.svg

Vaduz (Vadoz in Aleman; Dulcis Vallis in Latin) a l'è la capital del Principaa del Liechtenstein.

La se troeuva a una altituden de 460 meter sora del nivel del mar e 'l gh'ha 5429 abitant e ona superfis de 17.315 km² per ona densità de popolazion de 314 ab./km².


Geugrafia[Mudifega | mudìfica 'l sorgènt]

Vaduz l'è ona città alpina e la se troeuva in su la riva drita del fium Ren. L'è tacaa ai comun de Eschen, Gamprin, Schaan, Planken, Triesenberg, Balzers, Triesen, Sevelen e Buchs.

Stória[Mudifega | mudìfica 'l sorgènt]

LORUNIF

Par che Vaduz la sàpe mensiunàda endei manüscricc del sècol XII col nòm de Farduzes ma la tradisiù la öl che la sàpe stàda fondàda entùren al 1322 dei cóncc de Werdenberg. Del stès an gh'è 'na citasiù del castèl de Vaduz. Endel 1499, endel córs de la Guèra svéva el castèl l'è stat sachegiàt dei Svìser e la cità l'è stàda distrugìda.

Endel sècol XVII la famìa dei Liechtestein, uriginària de la Bàsa Austria, l'ìa dré a sercà la maniéra de ìga 'n pòst endela Dieta Imperiala (Reichstag), ma i pòscc i éra reservàcc apéna ai nòbii che gh'ìa posedimèncc diretamènt sóta 'l tròno imperiàl, sènsa personàgi feudài intermediàre, e nisü dei posedimèncc de la famìa a chèl tép là i respetàa chèsto requizìt.

Endel 1699 la famìa la g'ha ìt l'ocaziù de crumpà de la famìa dei Hohenems la Signurìa de Schellenberg, e quach agn dòpo, endel 1712 la contèa de Vaduz, du teretóre picinì ma che gh'ìa le caraterìstiche che i Liechtestein i sercàa, cioè ìga nisü óter signùr feudàl che l'emperadùr stès.

Endel més de zenér del 1719, dòpo che töte le trafìle per el pasàgi de proprietà i éra stàde completàde, l'emperadùr Carlo VI, el g'ha decretàt l'üniù de Vaduz e Schellenberg, e l'inalsamènt de chèsto teretóre al rànch de Principàt (Fürstentum) col nòm de "Liechtenstein" en unùr al sò fidàt servidùr, Anton Florian del Liechtenstein". L'è alùra che el Liechtenstein l'è deentàt en stat sovrà mèmber del Sàcro Romàno Impéro. A testemognànsa del fat che töta la vicènda l'ìa apéna 'n espediènt pulìtich, el Prìncipe del Liechtenstein el g'ha mìa mitìt pè endel sò nöf teretóre per piö de 120 agn.