Pontifizzi Istitut Ambrosian de Musega Sacra
|
Quest articol chì l'è scrivud in lombard, con la Noeuva Ortografia Lombarda |
El Pontifizzi Istitut Ambrosian de Musega Sacra (Pontificio Istituto Ambrosiano di Musica Sacra in italian, breviad PIAMS) a l'è un istitut de istruzzion de nivell universitari de Milan, specializad in musega sacra segond el cant ambrosian. [1]
Storia[Modifega | modifica 'l sorgent]
L'istitut a l'è stad fad su de l'Alfredo Ildefonso Schuster del 1931 e tirad in pè canonegament de la Santa Sed del 1940.[1] El Cardinal el voleva havégh un istitut bon de studià a nivell scentifegh e guarnà la tradizzion musegala de l'arcidiocesi de Milan, oltra a formà figure noeuve de la musega religiosa, soratut composidor e orghenista.[2]
El Schuster el s'era ispirad al Pontifizzi Istitut de Musega Sacra, che el PIAMS l'è consociad, e che l'haveva vist in del so temp a Roma. Prima a l'era la Capella musegala del Dom de Milan a tirà inanz la tradizzion ambrosiana, ma despess la soa influenza l'era nanca bona de rivà foeura de la cità.[2] Sostegnuda anca del Papa Pio XI, in principi la se ciamava Scoeula superior ambrosiana de musega sacra, el 12 de marz del 1940 el Pontefice ghe dà el titol de Pontifizzi Istitut, con la facoltà de dàgh i grad academegh pontifizzi.[2]
Dopo la guerra, del 1946, el Schuster el met in ciar l'importanza de quell istitut chi in del sinod e l'invita tucc i ambrosian a aprezzàll.[2]
In di agn '60 el fa san-Martin in d'un palazz in vial Gorizzia dad de la Fabrega del Dom, indova che gh'era anca la capella musegala.[2] Important per la soa storia al temp a l'è stad el preside mons. Ernesto Teodoro Moneta Caglio, che el l'ha guidad del 1955 al 1984.[2]
Del 1984 el Moneta Caglio a l'è sostituid del mons. Natale Ghiglione, sostituid del 1999 del mons. Gianluigi Rusconi, che l'ha guidad l'istitut fina al 2015, quand che al so post l'è nomnad el mons. Carlo Magnoli: sota la soa presidenza l'istitut el va dent a la noeuva sed in cors Garibaldi, arent a la Gesa de l'Incoronada.[2] El 13 de avost del 2021, dopo una deroga per el COVID-19, a l'è fad preside el don Riccardo Dell'Acqua.[2]
Organizazzion e cors[Modifega | modifica 'l sorgent]
El Gran Cangeler a l'è el mons. Mario Delpini, arcivescov de Milan, el preside l'è el don Riccardo Dell'Acqua e 'l secretari el Rag. Claudio Porta. [3]
L'Istitut l'insubiss quater tipi de cors: quei pre-academich, quei academich, quei de dotorad e infin i cors liber, desligad de un percors universitari. [4]
Riferiment[Modifega | modifica 'l sorgent]
- ↑ 1,0 1,1 Pontificio Istituto Ambrosiano di Musica Sacra (Piams).
- ↑ 2,0 2,1 2,2 2,3 2,4 2,5 2,6 2,7 Il PIAMS: dalle origini fino ai giorni nostri.
- ↑ About - Il PIAMS.
- ↑ Didattica.