Cant ambrosian
|
Quest articol chì l'è scrivud in lombard, con la Noeuva Ortografia Lombarda |
El cant ambrosian (anca cognossud coma cant de Milan) a l'è l'insema de cant drovad per la liturgia catolega del rit ambrosian. Compagn del cant gregorian, el cant ambrosian a l'è un esempi de cant pian, che 'l ciapa el so nom del vescov Ambroeus. El cant ambrosian a l'è l'unega tradizzion de cantus planus ocidental, insema al cant gregorian, a vesser recognossuda an'mò incoeu a nivell ofizzial de la Gesa romana catolega e a vesser an'mò pratigada in di gese del territori.
Storia
[Modifega | modifica 'l sorgent]El vescov Ambroeus l'havaria menad in ocident l'inodia tipega de l'orient, 'me l'haveva fad el Sant Illari de Poitiers. El par che l'habia scrivud almanca tredes ini sacher (quater inn quei segur). De sorapu, l'havaria ciapad, de la tradizzion orientala, la salmodia antifonega, basada in su l'alternanza de du cor de vos. El Sant Agostin, in del so liber Confession (ix, cap. XVII), el parla di novità de la musega de la Gesa de Milan al temp del Sant Ambroeus, però el scriv minga che i noeuve manere de cantà eren stad menad in cità del vescov Ambroeus, donca podarissen vesser di tradizzion pussee antighe. La pupart di cant ambrosian, de tute i manere, l'è nassuda e la s'è desvilupada in di agn, dopo del secol del Sant Ambroeus, e l'ha ciapad influenze di rit bizantin, gallican e roman.
La liturgia e el cant ambrosian l'ha influenzad anca i bande vesine, infina a spantegàss in l'Europa central, in Boemia, e in Italia central e del sud. El cant gregorian, poeu, l'ha sostituid la pupart di vari cant pian europee. El cant ambrosian a l'è stad vun di poch, in pratega l'unegh, che l'ha segutad a vesser drovad in la so forma original, grazzia a l'autorità politega e eclesiastega de la cità de Milan in del Medioev. Incoeu la so zona de influenza a l'è quella del rit ambrosian.
La musega l'è stada conservada al dì d'incoeu grazzia a la notazzion neumatega di font meneghin. I font scrivude pussee antighe inn del secol XI, cont i test de la liturgia: un Manuale cont el test intregh e l'Ordoet caerimoniae Ecclesiae Ambrosianae Mediolanensis del Berold (ca.1125). I prim e pussee important font che ne lassen scrita la musega inn del secol XII, anca se gh'è di frament pussee vegg scrivud con neumi minga diastemategh. Quei chì caten la Messa e l'Ofizzi e spartissen i fonzion religios de l'estad (de la Pasqua a l'Avent) per la basilega de Santa Tecla, de quei de l'inveren (de l'Avent al dì prima de Pasqua) per la basilega de Santa Maria Magior. I font per l'inveren inn tre, inscambi per l'estad ghe n'è doma vuna.
Descrizzion
[Modifega | modifica 'l sorgent]Respet al cant gregorian, el cant ambrosian el presenta una varietà de stili pussee granda in tra i vari sgener liturgegh. Anca i diferenze de stil in tra i cant sillabegh e quei melismategh inn pussee grand respet al cant gregorian.
I ingressae, de solet neumategh, gh'hann anca di part melismategh. I antifone de l'Ofizzi inn de solet sillabegh, inscambi i psalmelli, i Alleluia e i responsoria cum infantibus gh'hann di melism longh fess. El iubilus de l'Alleluia el gh'ha do forme: la melodia prima e la melodia secunda. I melodiae secundae, che vegnen dopo de la repetizzion de l'Alleluia dop del verset, inn di longh melism. I offerendae inn de solet melismategh e conserven i so verset. El confractorium e el transitorium, compagn di ingressae, poden havégh di melodie neumategh o anca melismategh.
El cant ambrosian, per certi aspet de melodia e strutura, a l'è vesin al cant beneventan, con di lavorà compagn in di test e in di melodie, e a quell mozarabegh per l'ornamentazzion di melism in di so melodie. El podaria vesser stad anca compagn del cant gallican, che incoeu l'è in larga part descognossud. In particolar i antiphonae ante evangelium podarissen vesser de orisgen gallicana.
Font de musega
[Modifega | modifica 'l sorgent]I principai font per el cant ambrosian sorarivud infina a incoeu inn:
- Antiphonarium Ambrosianum del secol XII, conservad al British Museum de Londra (Codd. Add. 34209). El cata i cant per i fonzion de l'inveren
- Antiphonarium de Bedero Valtravaglia del secol XII, conservad in de la gesa de San Vitor, Piev de Valtravaja, a Bresc de Beder. A l'è la pars aestiva di cant
- Antiphonarium Ambrosianum del secol XIII, conservad in la Biblioteca Capitolar de Milan (II.F.2.2). El cata i cant per i fonzion de l'inveren
Bibliografia
[Modifega | modifica 'l sorgent]- La nuova enciclopedia della musica, Garzanti, 1983
- Enciclopedia della Musica: La musica europea dal gregoriano a Bach, Einaudi, Milan
- The new Grove Dictionary of Music and Musicians, Stanley Sadie
Ligam de foeura
[Modifega | modifica 'l sorgent]- Berold in su Enciclopedia Treccani
- Antifonarium de Bresc de Beder in su Chiesa di Milano