Jann Galeaz Viscont

De Wikipedia
Jump to navigation Jump to search
Quell articol qì l'è scrivud in Lombard, ortografia SL.
Ritrait del Jann Galeaz

Ol Jann Galeaz Viscont (Pavia, 16 de otover 1351 - Melegnan, 3 de setember 1402) l'è stait un member de la dinastia Viscont, Scior de Milan e, despò del 1395, prim Duca de Milan.

Biografia[Mudifega | mudìfica 'l sorgènt]

Joventuu[Mudifega | mudìfica 'l sorgènt]

I domini dei Visconts ind el XIV secol.

Fiœl del Galeaz II e de la Bianca de Savoia, ind el 1360 l'ha sposad l'Isabella de Valois, s'cieta del re de França Joann II. La dota de la sposa l'è staita la Contea de Sommières, po cambiada con qella de Vertus, de la qual ol Jann Galez al ciaperà ol sovernom de Cont de Virtuu. Ol matrimone l'è miga stait fortunad: tuts i s'cietin mas'c (Jann Galeaz, Azon, Carl) i è morts, e a la fin anca l'istessa mader, ind el partorir l'ultem; domà l'unega fiœla, Valentina, l'è restaita col pader.

Intratant ol Jann Galeaz l'ha fait esperienza ind l'art de la guerra e de la diplomazia, grazia ai conflits intra la so famea e i Savoia. Ind el 1373, aprœv a Monticiar, l'è stait vencid e ferid dei trupe nemixe. L'ann dop l'ha rapresentad ol so pader ind i tratative con l'Amedee IV de Savoia, e l'ha firmad la pax de Casal.

Ol governar spartid[Mudifega | mudìfica 'l sorgènt]

Ind el 1375 ol pader al g'ha dait ol govern dei citaa de Novara, Vercei, Lissandria, Tortona, Valenza e Casal, con la facoltaa de far la guerra e la pax coi Savoia. Ol Galeaz al tegniva per lu Pavia, Com, Piaxenza e Bobi col titol de dominus generalis. Quand qe l'è mort ind el 1378, l'è començada la lota de poder intra i do ram de la famea, qell de Jann Galeaz e del so zio, Bernabò, qe al controllava la part orientala dei domini.

Tuts do i circava de controllar qell olter: a l'interna, cond una politega matrimoniala intra i ereds (per reunir i do ram), e a l'esterna cond ol circar dei lianze cond dei oltre casade nobei, per rinforzar ol so poder.

Ind el 1378 l'ha conquistad Ast, e do agn dop l'è rivad a far-s nominar Vicare Imperial del Venceslav de Lussemburg; ma ol Bernabò l'era dree a lavorar a un ligam matrimonial cond el Luis I d'Anjou, Cont de Provença.

Uneg Scior[Mudifega | mudìfica 'l sorgènt]

A la fin ol Jann Galeaz l'ha decidid de liberar-s del so barba: ol 6 de maj del 1385 cond una scusa al l'ha tirad for de la pusterla de Sant Ambrœs e al l'ha fait imprijonar, con l'aidar del Iacopo Dal Verme e del Oton de Mandello. Al sarà tegnid ind el castell de Trez per un qualc mis, per po vesser velenad. I citaa sota ol so domini i ha saludad ol nœv Scior comè un liberator: ol Bernabò l'hiva stait un sovran dur e spietad; inscambe, ol Jann Galeaz l'ha sbassad i tasse.

Espansion[Mudifega | mudìfica 'l sorgènt]

Ol Ducad a la mort del Jann Galeaz.

Paxifegad l'interna dei so domini, g'hiva de vardar-s de l'esterna: i Della Scala, Scior de Verona, i aidava i ereds del Bernabò, donca ol Jann Galeaz al s'è liad con Francesc ol Vegg de Carrara, Scior de Padoa. Ciapade Verona e Vicenza (1387), al s'è po metid decorde con Venezia per spartir-s i domini del so vegg liad: donca l'ha ciapad anca Padoa, Feltre e Bellun (1388), a la Serenissima i è indaite Trevis e Ceneda.

Ind el 1389 l'è mandada in sposa a'l Luis de Valois, fradell del re de França, la Valentina Viscont, cond una granda dota e ol dreit de sucession in cas de estinzion del ram masqil.

I so mire i ha fait stremir Bologna e sovertut Firenze, qe l'è staita la so nemixa plu granda fina a la so mort. Ind el 1390 la citaa toscana la forma una liga (con dent Francesc Novell de Carrara, Carl Viscont, fiœl de Bernabò, Joann de Armagnac e Stefan de Baviera, qe i ha sposad dei s'ciete del Bernabò) qe la porta la guerra in Lombardia; grazie ai vitorie del Viscont in sui nemix ind el 1392 l'è firmada la pax, con la quala i è recognosside tute i conquiste del Jann Galeaz, manc Padoa, qe la s'era revoltada e l'è tornada sota ol Carrara.

Intra ol 1392 e ol 1393 g'è staits dei contats con la França, per una spedizion comuna contra i fiorentin; ma i oposizion d'una part de la cort de Paris i ha fermad tut. L'ann dop ol Jann Galeaz l'ha mandad una ambassada a'l Re dei Roman Venceslav, per domandar un titol ind la jerarqia feudala per lejitimar ol so poder. I tratative i è indaite inants fina a'l 11 de maj del 1395, e ol 5 de setember ol Jann Galeaz l'è stait incoronads in Sant Ambrœs comè Duca de Milan. Insé, a'l preze de 100 000 fiorin, l'hiva ciapad un titol qe al le metiva sora ai olter nobei locai, dinasteg e quase impossibel de tirar vià. Ol 13 otover del 1396 l'è rivad anca un olter diploma, qe al slargava ol poder ducal a tuts i domini viscontee (cond el prim l'era domà in su la citaa de Milan e ol so contad), al fissava un sistem de sucession basad in sul prim fiœl mas'c, a'l qual l'indava la Contea de Pavia, creada ad hoc. L'ann dop anca Angiera l'è staita levada a Contea, in omaj a la lejenda segond la quala i Visconts i vegniva de Anglo, s'ciet de Enea, qe l'havress fondad la citaa.

L'è fals inscambe ol diploma de nomina a Dux Lombardiæ, ma l'è una prova dei ambizion del Viscont e de la cort pavesa.

Bandonad ol projet de aidar Venceslav a otegnir la corona imperiala cond una spedizion comuna in Italia (in cambe del so aiœt a ciapar Firenze), ind el 1396 l'è staita tacada Mantoa, qe la s'era tirada vià de l'influenza viscontea. Ma l'intervegnir de Firenze, Venezia e Savoia insema l'ha portad a un tregua de dex agn con la citaa (1398). Ol Jann Galeaz al vuliva far-la finida con Firenze, donca al s'è inviad a preparar una smorsa de la quala l'havress pudid miga tirar-s vià: ciapada la Lunijana, ind el 1399 l'ha comprad del Gerard Leonard Appiani la citaa de Pisa e l'ha ciapad la dedizion de Siena, storega nemixa de Firenze; l'ann dop, cond un colp de man, l'ha ciapad Perugia, e despò i oltre citaa minore de l'Umbria i s'è daite deperlore. Domà Lucca l'era restaita libera, ma sota una granda influenza del Viscont.

Per circar de salvar-s, i fiorentin i s'è impegnads cond un grand pagament a'l nœv Re de Jermania, ol Robert de Baviera (qe l'hiva roversad ol Venceslav) perqè al faxess una spedizion contra Milan. Ma una vitoria picinina dei trupe lombarde arent Bressa (1401) l'è staita assee per far tornar indree ol sovran. Despò la borlava anca Bologna (1402), e la smorsa intoren a la republega toscana l'era insé completada.

La mort e la sucession[Mudifega | mudìfica 'l sorgènt]

La mort improvisa del Duca (fors de malaria o pesta) ind el castell de Melegnan (1402) l'ha portad a la fin del so disegn. La joven etaa del so prim ered (Jovann Maria Viscont, 13 agn), la so decision de spartir ol govern intra i so s'ciets e l'ambizion dei so comandants, i ha portad a dei agn de lote intra i fazion, e de perdida de terre per ol Ducad.

Titoi[Mudifega | mudìfica 'l sorgènt]

Ol Jann Galeaz l'era Duca de Milan, olter qe Scior de Milan, Verona, Crema, Cremona, Bergem, Bologna, Bressa, Bellun, Pieve, Feltre, Pavia, Novara, Com, Lod, Vercei, Alba, Ast, Pontremoli, Tortona, Lissandria, Valenza, Piaxenza, Bobi, Parma, Rej, Vicenza, Perugia, Vigevano, Borg San Donen e dei vai del Boite.

Stema[Mudifega | mudìfica 'l sorgènt]

Imajen Stema
Orn ext Duke.png
Coat of arms of the House of Visconti (1395).svg
Jann Galeaz Viscont
Duca de Milan

Matrimone e s'ciets[Mudifega | mudìfica 'l sorgènt]

Riferiments[Mudifega | mudìfica 'l sorgènt]