Diagramma del Stüve
El diagramma del Stüve a l’è vun di diagramma tèrmodinamich (insèma al Nomogramma de l'Herlofson e al tefigramma) che 'l servìss de analizzà la struttura tèrmica de l’atmosfera terrèstra e per fà i prevision meteorològich (i diagramma fàa su a quèl fin chì hinn anca ciamàa diagramma aerològich[1]).
Descrizion[Modifega | modifica 'l sorgent]
El diagramma del Stüve el ven doprà per rappresentà in su on diagramma i valor de la temperadura e del pont de rosada vegnùu foeura di misùr effettuàa cont i radio-sondagg , i reoplan e i satèllit meteorològich che ne fànn trà foeura la stabilità convettiva oppùr l’energia potenzial convettiva disponibil (CAPE, sigla de la lengua inglesa che la voeur dì Convective Available Potential Energy). De fianch del diagramma del Stüve, pòden anca vèss mìss di frècc piscinìtt che insegnen la direzion e la fòrza di vent a divèrsi livèj de pression.
El diagramma del Stüve l’è stàa sviluppàa in del 1927 del meteoròlogh todèsch Georg Stüve (1888-1935) e l’è stàa accettàa a la svèlta per via de la soa semplicità de già che ‘l dopera di lìnej drizz per i trè variabel principàj: la pression, la temperadura e la temperadura potenzial. Per via de la semplificazion a hinn andàa perdùu i requisiti de eguaglianza di àarej (de l'equazion del Clausius–Clapeyron) che inveci a hinn sodisfàa in du di alter diagramm dopràa in quèll camp chì, o ben el nomogramma de l'Herlofson e ‘l tefigramma. In di aplicazion pràtegh tuttmanch quèlla semplificazion chì l'ingenera minga di problema particolar. [2] [3]
El sistèma de riferiment cartesian doperàa l’è tal che i ass i gh’hànn ‘me coordinad la temperadura (T), la pression (p o pk);
k = R / l'è 0,2857 (indoe R l’è la costanta universal di gas per l'aria sècca e l’è el calor specifich de l'aria a pression costanta).[4]
A l’è on diagrama che ‘l gh’ha su tanti curv:
- Linej isòbar: la pression atmosferega l’è rappresentada in su l’ass vertical in scala logaritmica, i linej isobar hinn orizzontaj;
- Linej isotèrmi: la temperadura a l’è rappresentada in su l’ass orizzontal in scala linear; i linej isotérmi hinn verticaj;
- Linej isoigrometrich: i linej isoigrometrich hinn on poo inclinàd vèrs sinistra;
- Linej adiabategh sècch: i linej che rappresenten i trasformazion termodinamich adiabategh sècch (o ben senza scambi de calor e senza condensa del vapor de l’acqua) hinn inclinàa vèrs sinistra pussée di isotèrmi;
- Linej adiabategh satur: i linej che rappresenten i trasformazion termodinamich adiabategh satur (o ben senza scambi de calor con l’ambient de foeura, ma con scambi de calor sconduu per via de la condensa ) tenden a sinistra ma men di adiabategh sècch.[5]
In sul diagramma del Stüve poden vèss rappresentàa i dati del stat vertical de la troposfera misuràa per mèzz del radio-sondagg, oppur prevìst per via di modèj meteorologich:
- la curva de stat (che la designa come la temperadura la varia in funzion de la pression - o ben de la quòta che a lee l’è collegada);
- la temperadura de rosada (variazion de la temperadura de rosada con la quòta);
- la curva che la rappresenta i variazion de temperadura che ona bolla d’aria in salida la gh’avarìss. .[6]
Riferiment[Modifega | modifica 'l sorgent]
- ↑ Mario Giuliacci (2010). Manuale di meteorologia (in italian). Alpha Test, 282. ISBN 88-483-1168-7.
- ↑ M K Yau and R.R. Rogers (1989). Short Course in Cloud Physics, Third Edition (in ingles). Butterworth-Heinemann. ISBN 0-7506-3215-1.
- ↑ J.V. Iribarne and W.L. Godson (1981). Atmospheric Thermodynamics, Second Edition (in ingles). D. Reidel Publishing Company. ISBN 978-90-277-1297-4.
- ↑ Organizzazione meteorologica mondiale. Diagramme de Stüve. Eumetcal. URL consultad in data 23 maggio 2010. (arqiviad de l'url orijenal in data 3 marzo 2016)
- ↑ Mario Giuliacci (2010). Manuale di meteorologia (in italian). Alpha Test, 285–286. ISBN 88-483-1168-7.
- ↑ Mario Giuliacci (2010). Manuale di meteorologia (in italian). Alpha Test, 285–286. ISBN 88-483-1168-7.