Ceser Cantù

De Wikipedia
Lombard Quest articol chì l'è scrivud in lombard, con la Noeuva Ortografia Lombarda

El Ceser Ambroeus Cantù (Brivi, 5 de dicember del 1804 – Milan, 11 de marz del 1895) a l’è stad on storich, leterad, politegh, registrant e scritor italian. Deputad al parlament del 1860 al 1867, l’è stad el fondator de l'Archivi storich lombard e president onorari de la SIAE[1]. Leterad ligad a l'area romantica e al catolicesim, el Cantù l’è stad autor de tanti Romanz (infra i quai spica "Margherita Pusterla"), di sagg storich "Storia Universale" - Storia universal - e "Grande illustrazione del Lombardo Veneto" - Granda ilustrazzion del Lombard Venet - e de storiografia leteraria ("Ragionamenti per servire di commento ai Promessi Sposi; Storia della letteratura italiana" – Ragionament che servissen de comentà i I promessi sposi). Del 1873 fina a la soa mort l’è stad Diretor de l'Archivi de Stat de Milan e l’ha organizad e 'l n'ha trasferid la sede in de l’ex Collegi Elvetich/Palazz del Senad.

Biografia[Modifega | modifica 'l sorgent]

I prim ann e l'insegnament[Modifega | modifica 'l sorgent]

El Cantù de om fad

El Ceser Cantù l’è nassud a Brivi, on paesin de la Brianza, i sò sgent a inn el Celso e de la Rachele Gallavresi[2]. Alevad al ginnasi San Lissander de Milan[3] , dopo vesser stad minga acetad al Collegi Ghislieri de Pavia, l’è stad maester suplent a Sondri, cità indove l’è restad del 1821 al 1827 insema al fradell minor Ignazzi e indove, in del temp liber, l’ha podud fà su la soa cultura a lensger con avidità i classich italian e quei forest[4], in particolar i "Antichità italiche" del Ludovico Antonio Muratori e la "Storia delle Repubbliche italiane" (Storia di republiche italiane) del svizzer Sismonde de Sismondì.

L’ha fad San Martin con l’andà a stà de cà a Com per insegnà del 1828 el 1832; in quell ann là l’è diventad maester in del collegi San Lissander de Milan indove l’haveva passad l’eta de bagai [2] e indove l’ha podud toeu contat con l'ambient inteletual de la cità, in primis cont el Tomas Gross, col Lissander Manzon e col giurista Gian Domenico Romagnosi[5]. Menad dent el 15 de november del 1833° a vesser sospetad de fa part de la Giovine Italia del Mazzini, l’è stad tirà foeura de la Preson de Porta Noeuva el 11 de otober del 1834, gh’è stada però imposta la pena de l'esclusion di ofizzi publich e donca anca de l’insegnament[6].

L'atività storica e leteraria[Modifega | modifica 'l sorgent]

I ann '30[Modifega | modifica 'l sorgent]

Sgiamò in del 1828 l’haveva publicad, a Com, el poemin Algiso ma l’haveva anca dimostrad di dote storiche notevole a lavoràgh adree a la Storia della città e diocesi di Como (Storia de la cità e de la diocesi de Com), redigiuda intra ‘l 1829 e ‘l 1831[7]. Rivad a Milan, el s’è cimentad in la critica leteraria cont el scriver el sagg Sulla storia Lombarda del secolo XVII: Ragionamenti per servire di commento ai Promessi Sposi (Sora la storia Lombarda del secol quell di derset: Ragionament che servissen de comentà i Promessi Sposi) , stampad in del 1832[8]. In de l’istess ann l’è stad tirad anca Il Sacro Macello di Valtellina (El macell sacher de valtelina). Le guerre religiose del 1620 tra cattolici e protestanti tra Lombardia e Grigioni (El macell sacher de valtelina. I guerre religiose del 1620 infra catolich e protestant intra Lombardia e Grison) , publicad a Milan in del 1832 e l’ann adree i Racconti brianzoli (o Novelle brianzole). Tirad foeura de la preson, el Cantù el s’è dedicad domà a l'atività leteraria, cont el rediger intra ‘l 1836 e ‘l 1837 quater liber de favole per i fiolit indove compar el Carlambroeus de Montaveggia, emblema de la somission ai norme e a l'autorità moral del clero, come varie volte l’è ricordad in d’ona manera precisa e detajada in Il galantuomo (El galantom) [9]. In queste dò opere chì se ved sgiamò el conservatorismo religios che 'l dominarà l’ideologia intrega del Cantù anca in di ann che vegnarann[10].

El prim volum de la Storia Universal del Cesare Cantù, publicad a Turin in del 1838

La Margherita Pusterla e la Storia universal[Modifega | modifica 'l sorgent]

El Cantù, adree al success di Promessi Sposi de l'amis Manzon, el s’è metud adree a stender on romanz storich a l’uso de quell manzonian e del Marco Visconti del Tomas Gross: la Margherita Pusterla, scrivuda intanta che l’era in preson e che l’è stada resa publica domà in del 1838 per via de la censura austriega[11]. A basàss sora la vicenda storica de la Margherita Visconti (XIV secol - 1341), fioeula de l’Ubert che l’è andada in sposa col Francesch Pusterla, l'opera del Cantù la ne recalca la disgrazzia familiar (lee la sarà menada dent e copada per havé minga acetad i lusinghe del scior de la cità, el Luchin) e a l’intreccia con quella de personagg "de fantasia" (istess del romanz storich) che ghe fann de contorna a la vicenda de la damazza milanesa[12]. Nonostant i vesinanze relative al tema e ai ideologiche coi Promessi Sposi (el fidàss a religion come istrument de consolazzion e salvezza contra i mai del mond), Margherita Pusterla a l'è on romanz storich «saturna»[13] e pussee pessimista rispet a quell manzonian, per via sia de la mancanza d’on final alegher, sia de la division "manichea" intra boni e cativ[12].

In di ann '40 hann anca vedud el Cantù a ciapà pee in del mester storiografich: in del 1837 el librer turines Giusep Pomba el gh'ha insebid al leterad la stesura d’ona Storia Universal che la gh’haveva de catà su tuta la storia de l'umanità. Denanz al lavorà monumental che ‘l ghe se presentava, el Cantù el s’è minga tirad indree e, dopo havé stipulad el contrat in del 1838, l’ha redigiud intra quell'ann là e ‘l 1846 quest'opera chì spartida in 35 volum[14], definida del Marino Berengo «l'opera storica de sicur pussee lensgiuda e consultada per mez secol in Italia». In seguit, la Storia Universal la sarà sgrandida intra ’l 1883 e ‘l 1890 fina a rivà a cinquanta-du volum. Anca lee, però, l’ha risentid fort de l'influss conservator-clerical e diversi error filologich, specialment in del svolgiment de la Età antiga[2].

El period risorgimental[Modifega | modifica 'l sorgent]

Del 1848 a la collaborazzion cont el Massimilian d'Asborgh[Modifega | modifica 'l sorgent]

Edizzion de la Grande illustrazzione del Lombardo-Veneto, Corona e Caimi Editor, Milan 1858 (2ª ed.)

La soa posizzion conservatris e clerical l’ha menad el Cantù a sgiontàss a la tesi neoguelfa portada del Vincenzo Gioberti in del Primato moral e civil di italian second el qual né la tradizzion catolica né i principi de l'inluminismo e de la rivoluzzion francesa podeven vesser l’element essenzial per on process de union di tanti stat a fà su l’Italia, che per rivàgh a ghe sariss stad bisogn de ricorrer a ona filosofia politica nazzional specifica. El Cantù, che in del 1844 e in del 1845 prima l’ha visitad i alter region d'Italia, e l'ann adree Londra e Parigi[15], l’è tornad de noeuv in Lombardia in del 1846, indove i sò posizzion antiaustriache s’inn invelenide an’mò pussee al prenzippi di moti del 1848.

Sospetad de la polizzia, el 21 de sgenar de quell ann là l’è stad costrinsgiud a scapà via de Milan e refugiàss a Turin[16], e poeu l'è tornad an’mò a Milan in del cors di cinch sgiornade e de la prima guerra d'indipendenza[2]. Dopo el tornà indree di armade austrieghe del Radetzky el Cantù el gh’ha ha havud de riparà de noeuv per on poo de temp a l'ester, in Svizzera, de indove l’è tornad ancamò indree a Milan in seguit a l'amnistia in di confront di esul politich, fat che in seguit el gh’è stad minga scusad de tanti patriota. In del cors di ann '50, de fat, el Cantù l’è rivad a lavorà per el governa austregh e a sognà on Lombard-Venet indipendent cont el Massimilian d'Asborgh[17] rè in contrapposizion a on Piemont che, guidad dal Cavour, l’era ‘dree a meter su on politica legislativa anticlerical che el Cantù catolich el podeva minga acetà[18].

In ‘sti ultim ann chì del domini austriegh in del Lombard-Venet el Cantù la repihad l'atività storica e leteraria, cont el scriver i sagg: L'Abate Parini e la Lombardia nel secolo passato (l’Abaa Parini e la Lombardia in del secol passad) (1854), Ezelino da Romano; la Grande Illustrazione del Lombardo-Veneto (Granda ilustrazzion del Lombard- Venet - 1857), enciclopedia storico-toponomastica molto detajada di località principai del Ream; la Storia di cento anni (Storia di cent ann - 1851) Storia degli Italiani (Storia di Italian - 1854). I ultim du a inn stad publicad vun a Firenze e a l’alter a Turin, de sgià che podeven vesser pericolos per l'ideologia nazzional espressa de dent[2].

L'Unità[Modifega | modifica 'l sorgent]

L'atività politica[Modifega | modifica 'l sorgent]

Quand che Milan e la Lombardia a inn stade conquistade di trupe franco-sarde del Vitori Emanuell II e del Napoleon III, el Ceser Cantù l’ha assistid al nasser del Stat Unitari. Dopo havé metud de part i presgiudizzi contra la monarchia sabauda, in del marz del 1860 l’è stad elensgiud in quell che l’era an'mò el Regn de Sardegna in del colesg de Almèn (Bergom) per la VII legisladura[19]. In del 1861 l’è stad batud a Cavrin, ma l’è entrad istess in parlament (VIII legisladura) el 28 de sgenar del 1863, dopo i demission del sò aversari, ma, vist che a gh’eren stade di procedure iregolar, l’è stad deciarad decadud del scagn parlamentar a la fin de l’ann[2]. L’è tornà ancamò in parlament in del 1865 semper in del collesg de Cavrin, e gh’è restad fina al 13 de febrar 1867, la fin de la IX legisladura[20].

In questi quasi set ann chì de presenza in parlament el Cantù l’è stad «orador solitari del partid catolich»[21], a rapresentà, insema al Vito D'Ondes Reggio, la fazzion catolica e conservatris in d’on Parlament dominad de liberai e de massoni. I discors del Cantù eren «enfatich e pessimista foeura de misura»[2] e, inscì come l’era stad raportad del biograf Pietro Manfredi, quasi tucc z eren concentrad sora la difesa de la religion catolica e di sò istituzzion (come raportad chì de sota), ma anca a difesa di paisan meridionai e contrari a la Lesg Pica che la gh’ha da l’inviada a la repression del brigantagg[22]:

La produzzion leteraria[Modifega | modifica 'l sorgent]

El Ceser Cantù a 70 ann

El Cantù, nonostant i impegn politich, l’ha continuad la soa atività de studios e storich cont el scriver Gli eretici d'Italia (I eretich d'Italia) (1865-1866), indove el sotolineava el fator positiv che la Gesa catolica l’ha svolgiud in di confront de l'Italia, donca el gh’ha dad on ton politich a l'opera propi in di ann che s’era ‘dree a discuter in Parlament in quant a la quistion de Roma capital e al podé temporal di papa; i Storie minori (Lombardia, Valtellina, Brianza) del 1864 e ona serie de opere a carater erudid compagn de Edifizii di Milano (Edifizzi de Milan), la Storia della letteratura italiana (Storia de la leteradura italiana) del 1865, Il Conciliador e i carbonar in del 1878, la Storia universale (Storia universal), manzonada chì de sora, impostada in del period 1838-1846 e sgrandida in del period ricordad prima. El Romanzo autobiografico (Romanz autobiografich), el sarà publicad dopo mort domà in del 1969 curad de l’Adriano Bozzoli, Milano-Napoli, Ricciardi, 1969. A la fine, se segnalen i opere morai scrivude per l'educazzion del catolich minga istruid: Buon senso e buongoverno (Bon sens e bon governa - Milan, 1870), Portafoglio d’un operaio (Portafoeuj d’on operari - Milan, 1871), Attenzione! Riflessi di un popolano (Ocio! Rifless de vun del popol - Milan, 1871)[11]. L'ultima grand’ opera del Cantù, scrivuda quand che l’era diretorede l'Archivi de Stat de Milano, l’era Della indipendenza d'Italia (De l’indipendenza d’Italia). Cronistoria (1872-1877, Turin), indove el scritor oramai anzian l’esita nò a dàgh contra a di figure ciav del Risorgiment (compagn del Napoleon III e del Cavour) e a mostrà compassion per i "vinciud" del Stat Unitari noeuv, o ben el Carlo Cattaneo e, adritura, el Francesch Giusep d'Austria. In de l’opera, de sorapù, el Cantù el resta fedel ai sò proposit antiliberai, cont el tacà i posizzion ideologiche che a inn stade el fondament del Regn d'Italia.

Diretor de l'Archivi de Stat de Milan[Modifega | modifica 'l sorgent]

Per savenn pussee, varda l'articol Archivi de Stat de Milan.
El Ceser Cantù: medajon in sul scalon monumental del Palazz del Senad a Milan

Dopo la mort del Luigi Osio in del 1873, el governa guidad del Quintino Sella e del Sgiovann Lanza l’ha nominad el Cantù diretor interinal in di Archivi de Stat a Milan el 24 de avril in del 1874 per diventà poeu Diretor de l'Archivi de Stat de Milan in del desember del 1875[23]. L'Archivi, sota el mandad de l'Osio, l’haveva subid on process de concentrament in di vari poli archivistich spantegad a Milan in quell che l’era stad l'ex Colesg elvetegh/Palazz del Senatd, ma el vegg diretor l’ha minga riessid a vedé l'opera completada. El mandad de vint ann del Cantù (1873-1895) l’è ritegnud vun di periodi pussee prosper e important in la vita de l'istitut meneghin, come l’è raportad del Nicola Raponi:

Archivi Storich Lombard, anno I, 1874

De fat el Ceser Cantù l’ha tacad a fa vegnì foeura, a partì del 1874, la rivista l'«Archivio Storico Lombardo» (L’archivi Storich Lombard) che, publicada de la Società Storica Lombarda, la gh’haveva de vesser «anca el sgiornal de l'Archivi de Stat»[24]. L’è stad lu, de sorapù, a che ‘l gh’ha dad on organizazzion definitiva a l'Archivi, a spostà in del Palazz del Senad a partì del 1886 tut i fond archivistich metud sgiò in vari spazzi spategad per Milan [25] anca grazzie a l'influenza che lu, storich nominad, el gh’haveva in la società milanesa[26]. Nonostant el vigor cultural quistad da l'Archivi grazie a la soa preparazzion e a la soa cultura, el Cantù però el gh’haveva minga la forza de mudà el sistema archivistich che a Milan ‘l la faseva de padron, ciamad "peronian" per via del nom de l'archivista Luca Peroni che l’ha dirisgiud i archivi governativ de Lombardia del 1818 al 1832. El Cantù el s’è limitad domà a blocà la ripartizzion fond second quell sistema chì, ma minga a metegh ona pezza ai operazzion che inn stade tirade inanz inscì in pressa del Peroni e di so sucessor[27]. Registrant minga de mester, el Cantù l’ha operad in di fond de l'Archivi meneghin con la mentalità del storich, fina a rivà a dannesgià di fond cont el fà de part in manera arbitraria di carte scrivude prima del 1650, azzion che l’ha risvejad ona discussion acesa in del Consili per i Archivi in del 1876 e che l’ha risvejad l'atenzion del Minister de l'Intern, che l’ha ordinad on'inchiesta el 10 de marz del 1878[28].

El Ceser Cantù in del sò studi

Impunemanch, el tacament del Cantù a l'Archivi meneghin l’è stad mirabil, del moment che lu ‘l l’ha gestid financa de vegg e mez andad: in di ultim ann malad de gota, pur de adempì al so impegn de diretor «el s’è fad portad su per i scale»[29] fina al sò ofizzi.

La mort e 'l funeral[Modifega | modifica 'l sorgent]

El Cantù l’è restad bon de capì e ragionà e ativ financa de vegg veggent fina al moment che, compagn de quell che gh’era capitad a l’amis Manzon vint'ann indree, in del marz del 1894 ghe s’è rot on femor in del sortì de la messa quotidiana in la gesa de Santa Maria Pedon de piazza Borromeo.[30] De quell moment là l’è tacada la soa decadenza fisica e l’è mort che ‘l gh’hera novantun ann in la soa abitazzion de via Morigi n. 5 a Milan (indove incoeu l’è metuda ona lapida comemorativa)[31] ai 6:25 de la matina del 11 de marz del 1895[32].

La scomparida del storich l’ha suscitad on gran s’cess in tuta Italia e gh’inn rivad a la famija di messagg de dolor per la soa mort di autorità civil e religiose pussee alte: infra i quai quei del papa Leon XIII e del Cardinal Segretari de Stat Mariano Rampolla del Tindaro, del re Umbert I e de la regina Margherita, del Princip de Napoli Vitori Emanuell e del President del Senad Domenico Farini[33].

Tomba del Ceser Cantù in del cimiteri de la soa cità natal, Brivi

El funeral l’è stad celebrad el dopomezdì del 14 de marz e gh'è stada ona partecipazzion enorme di milanes, che s’inn strensgiud insema adree a tut el tragit infra l’abitazzion del Cantù e la Gesa de San Lissander in Zebedia, indove s’è tegnuda la cerimonia del funeral[34], e a la fin in su la strada per el Cimiteri monumental, che in del sò Famedio el storich l’è stad soterrad[35]. El 11 de november del 1905 i rest a inn stad trasferid del Cimiteri Monumental al cimiteri de Brivi, paes natal del Cantù, indove requien ancamò adess[11].

Discendenza[Modifega | modifica 'l sorgent]

El Ceser Cantù el gh’ha havud do fioeule bastarde insema a la metress[36], l’Antonieta Becaria Curioni de' Civati (1805-1866), mier del Giuli Becaria (1784-1858), costù fioeul del giurista e filosef ben conossud Ceser e barba del Lissander Manzon[37]:

  • Rachele (1836-1919)
  • Antonieta

Onorificenze[Modifega | modifica 'l sorgent]

Onorificenze raportade da Maurizzzi Casseti[23] e de la Guida sgeneral di Milan per l'ann 1874[38]:

Comendador dell'Ordin di Sant Maurizzi e Lazar - nastrin per uniform ordinaria Comendador dell'Ordin di Sant Maurizzi e Lazar
Comendador de l'Ordin de la Corona d'Italia - nastrin per uniform ordinaria Comendador de l'Ordin de la Corona d'Italia
Cavalier de l'Ordin civil de Savoia - nastrin per uniform ordinaria Cavalier de l'Ordin civil de Savoia
Cavalier de la Legion d'onor (Francia) - nastrin per uniform ordinaria Cavalier de la Legion d'onor (Francia)
comendador de l'Ordin del Crist (Portogall) - nastrin per uniform ordinaria comendador de l'Ordin del Crist (Portogall)
Grand oficial de l'Ordin Imperial de Nostra Signora de Guadalupe (Impero del Messich) - nastrin per uniform ordinaria Grand oficial de l'Ordin Imperial de Nostra Signora de Guadalupe (Impero del Messich)

Note[Modifega | modifica 'l sorgent]

  1. ↑ S.I.A.E., 125 anni di attività. Diritto d'autore.it. URL consultad in data 28 giugno 2018.
  2. ↑ 2,0 2,1 2,2 2,3 2,4 2,5 2,6 Berengo.
  3. ↑ Manfredi, p. 15.
  4. ↑ Berengo:
  5. ↑ Manfredi, p. 23.
  6. ↑ Cesare Cantù; Manfredi, p. 29; p. 32
  7. ↑ Manfredi, p. 21; Berengo
  8. ↑ Cesare Cantù; Manfredi, p. 23
  9. ↑ De fat la part final del Carlambroeus la dis: «In del mond a gh'è men elefanti che formighe ... el numer di menant el sorpassa sossenn quell di resgior; amé la patria e ‘l vost governa, vivì d'acord e lavoré: a l’è questa chì tuta la vostra politica»; inveci in Il galantuomo: «intimen ai potent la verità in nom de Dio, istruissen i ignorant, protesgen gli opress, ghe fann fà pas ai nemis». Raportad inscì in la vos biografica del Barengo
  10. ↑ Ferroni, p. 37: «...in di sò test el s’è semper moss cont on pont de vista moralistich, rigorosament catolich, che sgiamò in di ann Trenta l’assumeva di carateristiche reazionarie»; Canova, p. 174 §2: «Per tut i scrit del Cantù ghe passa ona vena moralistico-pedagogica reazionaria...»
  11. ↑ 11,0 11,1 11,2 Cesare Cantù.
  12. ↑ 12,0 12,1 Iovino.
  13. ↑ Ferroni, p. 37.
  14. ↑ Manfredi, p. 37; Cesare Cantù
  15. ↑ Manfredi, p. 44.
  16. ↑ Manfredi, p. 49.
  17. ↑ Manfredi, p. 64: «El pesg el gh’è capitad in grazzia di sò raport con l'arciduca Massimiliano, per i quai gh’inn stade minga risparmiade insolenze e calunie».
  18. ↑ Berengo:
  19. ↑ Berengo; Cantù deputato
  20. ↑ Cantù deputato.
  21. ↑ Manfredi, p. 83.
  22. ↑ Manfredi, p. 99: «Terz, perchè finissarann quei condane a mort senza process, che hann contaminad per des ann l'Italia central e adess de ses l’Italia meridional»; Berengo: «...e ‘l ciapa l'ocasion per condanà sia i "condane senza process" de l’Italia meridional...»
  23. ↑ 23,0 23,1 Cassetti, p. 309.
  24. ↑ Santoro, 2011, p. 4; Società Storica Lombarda - Storia
  25. ↑ Cagliari Poli, p. 13 §2.
  26. ↑ Cesare Cantù: «L’è stad grazzie a la soa autorità in del mond milanes del secol Votocent che ‘l Cantù, l’ha riessid a fà concentrà tut i archivi milanes in del palazz incantevol del Senad».
  27. ↑ Cagliari Poli, p. 15 §1; Berengo: «A inn certe i benemerenze del Cantù in la carica che la gh’era stada fidada, desgià che l’ha interrot la trinciadura di serie archivistiche per materia, che l’haveva sconvolgiud e falcidiad i documentazzion milanes».
  28. ↑ Cassetti, p. 51.
  29. ↑ Manfredi, p. 104.
  30. ↑ Manfredi, p. 106.
  31. ↑ Chi era Costui - Scheda di Cesare Cantù. URL consultad in data 28 febbraio 2017.
  32. ↑ Cantù, p. 16 virtual (minga esistenza in su quella pagina là).
  33. ↑ Cantù, Da Sua Santita Leone XIII (p. 29 "virtual") e Dalle LL. MM. il Re e la Regina - da S.A.R. il Principe Ereditario (p. 31 "virtuale").
  34. ↑ Cantù, p. 5.
  35. ↑ El Manfredi, p. 110 el scriv che el mort « el requia in d’ona nicia del colombar che ‘l Comun el gh’ha assegnad»; la famija del Cantù, p. 39 la dis che ‘l cofen l’è stad metud ai pee del Famedio. Pò vesser che vun di colombar che ‘l Manfredi l’ha tirad a man el fudess in del Famedio. El Marino Berengo el dis nagot in la soa vos biografica del Dizzionari biografich i italian.
  36. ↑ Boneschi, p. 364: «El Ceser Cantù, che l’è diventad amigon di Becaria e gimach de l’ameda Antonieta...»
  37. ↑ Cremante, p. 318, n° 5 e 6.
  38. ↑ Guida di Milano, p. 199.

Bibliografia[Modifega | modifica 'l sorgent]

  • Modell:DBI
  • Marta Boneschi, Quel che il cuore sapeva: Giulia Beccaria, i Verri e i Manzoni, Milano, Mondadori, 2005. 88-04-54779-0
  • Rinaldo Caddeo, Cesare Cantù. In: Epistolario di Carlo Cattaneo. Gaspero Barbèra Editore, Firenze 1949, pp. 34, 157, 161, 162, 164, 420, 427, 428.
  • Gabriella Cagliari Poli (a cura di), L'archivio di Stato di Milano, Firenze, Nardini Editore, 1992. 88-404-1301-4
  • Gianni Canova (a cura di), Letteratura, Volume 1 A-O, Milano, Le Garzantine, 2003, Vol. 4.
  • Famiglia Cantù (a cura di), In morte di Cesare Cantù, Milano, Tipografia Bernardoni di C. Rebeschini, 1896. URL consultad: 28 giugno 2018.
  • Maurizio Cassetti (a cura di), Repertorio del personale degli Archivi di Stato (PDF), Roma, Ministero dei Beni e attività culturali, 2008, 1 (1861-1918). 978-88-7125-294-0 URL consultad: 5 luglio 2018.
  • Renzo Cremante (a cura di), Emilio De Marchi un secolo dopo. Atti del convegno di studi: Università di Pavia, 5-6 dicembre 2001, Roma, Edizioni di storia e letteratura, 2005. 88-8498-209-X
  • Franco Della Peruta, Cesare Cantù e il mondo popolare dell'Ottocento, in Il Calendario del Popolo, vol. 52, nº 595, Milano, Nicola Teti Editore, Febbraio 1996.
  • Giulio Ferroni, Giulio Ferroni, Andrea Cortellessa, Italo Pantani e Silvia Tatti (a cura di), Il Romanticismo e Manzoni: Restaurazione e Risorgimento (1815-1861), Milano, Mondadori, 2006, Vol. 10.
  • Pietro Manfredi, Cesare Cantù: la biografia ed alcuni scritti inediti o meno noti, Torino, Unione Tipografico -Editrice, 1905. URL consultad: 28 giugno 2018.
  • Modell:EI
  • Nicola Raponi, Per la storia dell'archivio di stato di Milano. Erudizione e cultura nell'Annuario del Fumi (1909-1919), in Rassegna degli Archivi di Stato, vol. 31, nº 2, Roma, Istituto Poligrafico dello Stato, Libreria dello Stato, maggio/agosto 1971, pp. 313-334, ISSN 0037-2781.
  • Carmela Santoro, "Una casa di vetro per il mondo degli studiosi". Il Regio Archivio di Stato in Milano nell'Annuario di Luigi Fumi, Milano, Archivio di Stato di Milano, 2011.
  • Guida di Milano per l'anno 1874, Milano, presso Giuseppe Bernardoni, 1874. URL consultad: 13 luglio 2018.

Vos corelade[Modifega | modifica 'l sorgent]

Ligam de foeura[Modifega | modifica 'l sorgent]

Modell:Box successione

Utegnüü da "https://lmo.wikipedia.org/w/index.php?title=Ceser_Cantù&oldid=1273580"