Cesarino Monti

Chest artícol a l'è scricc in Lumbàrt, ortograféa orientàl unificàda.

Cesarino Monti (2008)

Ol Cesarino Monti (Saròn, 28 de mars del 1947 – Roma, 22 de löi del 2012) l’è stacc ün imprendidùr e ün òm polìtech lumbàrt de la Lega Nord.

La céza de Lazzaa

Per i stràde de Lazzaa

Per i stràde de Lazzaa

Trè ólte sìndech e dò ólte senadùr

Ol Cesarino l’è dientàt sìndech del sò paìs, Lazzaa, in del 1997, dòpo i prim sich agn l’è stài confermàt de bèl nöf a i elesiù del 2001 e l’è restàt sìndech ‘nfìna al 2006. Dal 2006 l’è stàcc asesùr al teritòre ‘ntat che gh’èra a sìndech ol Riccardo Monti. L’è turnàt a candidàs e l’è dientàt sìndech per la tèrsa ólta in del 2011 e l’è restàt al sò pòst ‘nfìna al dé che l’è mórt.

L’è stacc ach senadùr de la repüblica per dò ólte, in de la legisladüra chèla de XIV dal 2001 al 2006 e in de la legisladüra chèla de XVI, dal 2008 al 2012, ‘ndo che l’è stacc ach ol vicepresidènt de la Comisiù Teritòre, Ambiènt e Béni Ambientài .

In guèra col prefèt per ol “concorso padano”

In del 1998 ol Cesarino Monti, sìndech de Lazzaa, l’à portàt in consèi cümünàl e pò fài aproà ol 4 de mars de chèl an ü regolamét per i concórs cümünài che ‘l ghe dàa trì póncc in piö a chèi che i stàa de cà a Lazzaa almànch de 5 agn.

Ol Consèi di Minìster l’à alùra bociàt ol regolamét, ma ‘l sìndech l’è ‘ndacc inàcc l’istès e ‘l 2 de noèmber, dòpo i facc ü concórso cümünàl per ü pòst de ragiunàt con chèsto regolamét, l’è stàcia ciapàda a laurà ‘n cümü la Marisa Bredice, nasìda in Puglia, ma da piö de sich agn a Lazzaa. Segónt ü decrét firmàt dal presidènt de la repüblica Oscar Luigi Scalfaro e püblicàt sö la Gazèta Üficiàla ‘l 7 de dezèmber ‘l regolamét del Cesarino l’ìa ‘n contràst con i prensépe costitüsiunài e co i lègi cümünitàrie, ma zamò prima de Nedàl ol Cesarino Monti ‘l l’éra fài saì de ‘nsognàs gnach de cambià idèa e l’ìa minaciàt de dimètes piötòst che mandà a mut ol sò regolamét e licensià la sciùra che 'l l'ìa enzìt, isé l’à riempìt ol paìs de manifès-cc e de volantì per spiegàga a la zét ol perché del bònus per i residencc.

Dòpo ü lónch tìra e mòla ol prefèt de Milà, Roberto Sorge, ‘l l’à destitüìt dal incàrech e ‘l sò pòst l’è stài ciapàt dal vicesìndech Felicita Porta, l’è alùra che ‘l Cesarino l’à comentàt Benóne: só ‘l prim sìndech de töta la stòria d’Italia che l’è stài casàt vià, ma mia per màfia. Ol prefèt l’à pò fài saì al vicesìndech e a töt ol rèst de la giùnta che i gh’éra 10 dé de tép per scancelà ‘l regolamét e mandà a l’ària töt chèl che l’éra stài facc con chèl regolamét lé, sedenò l’avrès mandàt a vià pò a lur e comisariàt ol cümü.

Ol vicesìndech e i öter de la giunta i s’è söbet refüdàcc, piötòst i à domandàt de ès casài vià pò a lur e ‘l 27 de löi piö de 8.000 leghìsti, riàcc da töta la Padània, i à sfilàt per i stràde de Lazzaa a sostègn del Cesarino Monti. Ol vicesìndech e ‘l rèst de la giùnta, che i s’éra refüdacc de ritirà ‘l regolamét, i à spetàt che i pasès i 10 dé minaciàcc dal prefèt, ma i è restàcc al sò pòst sènsa saì piö negóta 'nfìna al 3 de setèmber, quàndo ‘l Cesarino l’à enzìt la sò batàia e ‘l prefèt l’à dözìt rimètel al sò pòst dòpo 43 dé de sospensiù. Di us söl sò “reintegro” i èra giràde sö i giurnài zamò a partì da la fì de löi e alùra ‘l Cesarino l’ìa dicc che segönt lü Roma l’à ciapàt pùra.

In del mas del 2000 se saìa però amò negót sö i “concórs padà”, se i éra ‘n régola o méno e ‘l sìndech ‘l'à fài saì de ès prónt a mandà ü telegràma ògne trì dé al Viminàl per ìga öna rispòsta che l'è riàda ol 14 de löi del 2000 quàndo con d’öna nòta del Viminàl se dizìa che 'l concörs cümünàl de Lazzaa l’ìa ‘n rególa e mia cóntra la Costitusiù. Ol Cesarino Monti l’à enzìt isé sö töta la lìnea la sò partìda tat de domandàga al istàt italià e al nöf prefèt Bruno Ferrante de scüsàs per chèl che 'l prefèt prìma de lü, ol Roberto Sorge, ‘l gh’éra fài patì al sò paìs.

Ol “miracolo Lazzate”

Quàndo ‘l Cesarino l’è dientàt sìndech i stràde ègie del paìs i èra metìde mal, i cà quàze o del töt bandunàde, mia tegnìde, con i sègn di cambiamécc facc in di agn ’60 e ’70 che i gh’éra fài pèrt chèl bèl göst di paìs lumbàrt de öna ólta.

Da alùra ‘l cümü ‘l s’è dài de fà per fà turnà bèl ol cör del paìs, l’à tiràt vià l’asfàlt di stràde per turnà a mèt zó la préda, l’à cambiàt i lampiù e töt l’arédo, ma sùra de töt ol Cesarino Monti l'è 'ndài decórde co i padrù di cà che i dàa sö la stràda e sènsa dàga gnà öna palànca 'l gh'à fài sistemàt a töcc e töt in d’öna ólta i faciàde. Ol cümü l’à ach compràt ü palasèt di agn ’60 che l’istonàa in del mès de la piàsa e che ‘l ghe entràa negót, ‘l l’à bötàt zó e ‘l l’à fài sö de bèl nöf, ma ‘n manéra che l’indès decórde col la nöa Lazzaa che l’éra dré a nas o mèi a turnà a ès. Fò sùra per rènt ol töt amò piö bèl ol cümü l’à pensàt bé de mèt apòst ol laatòi, de mèt öna fontàna e di zöch de àqua e de mèt ach, col permès di padrù de cà, di canète per l’aqua che i pasà iscondìde dét in di faciàde di cà e che i sèrf per bagnà i fiùr sö sö i balcù del paìs: i fiùr i è de la zèt, ma i à bàgna ‘l cümü.

Ol progèt ‘l se ciàma Progetto Lazzate 2005 e l’à funsiunàt isé bé che söl sìto del cümü l’è presentàt col nòm de Miracolo Lazzate .

L’esperimènt de Lazzaa l’è pò stài copiàt dal sìndech de Lesmo che l’à facc i stès laùr in de la frasiù de Gèren con i stès rizültàcc: pò a lé ol bórgh l’è turnàt a ès chèl de öna ólta.

La candidadüra a segretàre de la Lega Lombarda

Ol 12 de mas del 2012 ‘l s’è candidàt a dientà ol Segretàre de la Lega Lombarda, ol ram lumbàrt de la Lega Nord, e al congrès de Asàgh del prim de zögn l’à sfidàt ol Matteo Salvini che però l’à enzìt col 76% e l’è dientàt lü ‘l segretàre.

Ol bröt mal

Quàndo ‘l Cesarino ‘l s’è presentàt al congrès de Asàgh l’ìa zamò malàt de tat tép e l’éra dré fas cürà, ma l’è sèmper indàcc inàcc col sò laurà de senadùr e pròpe a Roma l’à ciapàt a löi öna bröta pulmunìt che ‘l sò còrp, zamò fiacàt dal càncher e da la chemio, 'l gh'è mia riàt a soportà: ricoeràt ol 3 de löi in del Campus Biomedico de Trigoria l’è mórt lé ol 22 de löi. A i sò fünerài i gh’éra töcc i òm piö ‘mportàncc de la Lega, tàce militàncc e sùra de töt la gh’éra tàta e tàta zét del sò paìs, tat che i s’è contàde piö de 3.000 persùne. . Fìna a l'öltem l'à lauràt per chèl che 'l credìa col sò anìmo de combatènt come regordàt ach sö Libero in de la sò öltima 'ntervìsta, quando, ciamàt al telèfono dal giurnalést per fà ön artìcol sö i sìndech gueriér che i dàa 'ndré la fàsa tricolùr, l'ìa respondìt che l'ü 'avrès mia pödìt fàl ol sìndech guerìer e dà 'ndré la fàsa e al giurnalést che 'l ghe domandàa se l'éra cambiàt ìdea sö la Padània e sö l'Italia 'l gh'à respondìt sèch: Machè, mé pöde mia dàla 'ndré la fàsa, adóma perchè l'ó mai compràda! .