Assede de Bergem (1437)

De Wikipedia
Va a: navegá, truvá
Lombard Occidental Quel articol qì l'è scrivud in Lombard, ortografia SL.


Vedrína
Vedrina
Quest articol chì l'è assee ben faa Vedrina
Afresc de l'assede indel Castell de Malpaga

L'assede de Bergem del 1437 l'è stait un fat bellig di guerre de Lombardia.

Ol contest[Mudifega | mudìfica 'l sorgènt]

Bergem, a causa di lote intra i fazion citadine indel Liber Cumun, indel 1331 la s'era daita a Jovann I de Lussemburg, re de Boemia e Polonia.[1] Ma jamò l'ann dopo, Azon Viscont l'ha vencid i trœpe reai e conquistad la citaa. Insé Bergem l'è part di domini viscontei (a part i agn de Pandolfo Malatesta, 1407-1421) fina al 1428, dominio qe, insema a la fin di libertaa cumunai, l'ha portad a la destruzion de l'economia de la citaa e del so territore (sovertœt sota ol governar de Bernabò Viscont).[2]

Indel 1428, con la fraca di milanes indela bataia de Maclode, Bergem la ciapa l'ocasion per dar-s a la Republica de Venezia, e la citaa la sarà desbœtada intra i do stats fina a la pax de Ferrara del 1433.[3]

I prime operazion[Mudifega | mudìfica 'l sorgènt]

La guerra l'era apena recomençada, dopo circa quindex agn de pax. Al comand de l'esercet venezian al g'era ol nœv marqes de Mantoa, Janfrancesc Gonzaga, qe al sa trovava con l'esercet indel'isola bergamasca. Passad ol fiœm per tacar ol Ducad de Milan, sœ consei del so segretare, Orland Suardi, l'ha decidid de tornar indree per portar socors a Toniol de Bitunzin, qe l'era stait tacad da i milanes. Indel traversar anc'mò l'Ada, circa 500 soldads i è morts negads.[4]

A setember ol Niccolò Piccinino, comandant de l'esercet milanes, l'ha varcad l'Ada con circa 25.000 omegn[5] (di quai 12.000 cavalier)[4] plœ le cernide. L'esercet de la Republica l'era piantad ol camp a Bolger e Calcinad, e ol Gonzaga al vœliva dar bataia, ma i olter Provedidor de Camp i era mìa decorde a causa de la forza del nemix, donca i ha decidid de ritirar-s a travers l'Oi. La ritirada l'è staita mìa ordinada, plœ simel a una fraca qe a una manovra stratejiga. I venezian g'hera ol dœbe qe ol marqese al fœss decorde coi milanes; dœbe qe al se renforzad, quand ol Gonzaga l'ha lassad de per lor i olter comandants e l'è tornad a Mantoa coi so omen.[4]

Bergem circondada[Mudifega | mudìfica 'l sorgènt]

Senza l'esercet de la Serenissima, a difendir Bergem e ol so territore i era restaite adoma i milizie locai, qe i pudiva far quase negota contra l'esercet del Ducad. La resistenza la sa concentrava ind i forteze, mentre un pœgn de paes qe i era mìa stait ocupads (Sorisel, Poltranga, la Bastia de Scanz, e Nember) i circava de mandar in citaa tœts i viveri qi g'era prima del rivar di nemix.[4]

Indel mentre, ol Piccinino al circava de taiar fò la citaa da i olter territore venezian: dopo vesser passad a travers (e devestada) la Vall Cavallina, conquistads coi canon Predor e Sarneg, al vuliva ciapar ol Castell de Calepe per meter-ga una guarnijon a difesa del passaj sœ l'Oi. Ma ol so feudatare, ol Cont Trussardo, l'ha resistid fina a quand, dopo vinte dé de assede, l'è stait botad jo da i sbar di canon, e l'era plœ possibel per i milanes dovrar-l. Dopo la guerra ol Cont al sarà recompensad da Venezia col feudo perpetuo de la Vall Calepe.[4]

Dopo la toma de castell, i milanes s'è concentrad sœ i olter capisald bergamasc: intra ol 5 e ol 25 de otober i ha ciapad, grazie a l'artelaria, Urgnan, Cologn, Brignan, Pont San Peder, Cavrin, e a la fin (con di negoziads) la Vall San Martin, la Vall Imagna e Brembilla.[4]

Ol 25 de otober i ha provad a conquistar anc la Vall Seriana, ma i è stait caçads vià con tants morts e ferids.[4]

La difesa de la citaa[Mudifega | mudìfica 'l sorgènt]

Indel mentre i milanes i finiva de circondar la citaa, ol Colleon, decorde coi olter comandants venezian, dal bressan al torna a Bergem per defendir la citaa. Per far plœ a la svelta (e senza vesser vest) al viaja de noit, e ol so rivar al risolleva i anim di so concitadin. Donca al se met dree sobet a organizar i difese citadine: al far sistemar i mure (a l'epoga i g'era qelle medievale) e i torr, al dar orden de destribuir i riforniments di munizion e de polver da sbar ind i presidi, al reorganiza i milizie; e indel mentre, al circa de blocar o almanc de ostacolar i operazion del nemix.[4]

Quand al riva ol Piccinino (a la fin de otober), Bergem l'è armada e pronta a resister a l'assede. I milanes i se porta indela part orientala de la citaa, e i prova a assaltar la Roca, ma l'è difendida ben dal Colleon e i è descaçads vià. Al Piccinino al resta adoma de mantegner ol bloc, senza resultads, e indel mentre saqejar e bruxar Borg Pigœl[6] e di olter pais del contado.[4]

Ol contratac[Mudifega | mudìfica 'l sorgènt]

Ol Piccinino, vest qe l'è mìa possibel ciapar Bergem, al decid de indar inanz a ocupar ol territore bergamasc. Dopo qe i ha refudad de render-s, al conquista e destrux Sorisel e Poltranga, e i abitants i g'ha de refujar-s intra i monts. I milanes dopo i se sposta in Vall Brembana. Quand la riva notizia a Bergem, ol conestabel Detesalvo Lupi[7] al ciapa 200 omegn e, insema ai partijan locai, al prepara un'imboscada: al far indar inanz un poo i milanes e, indove la vall l'è plœ streita, al da l'orden de indar adoss ai nemix, e la tradizion la dix qe indel mentre i bergamasc i ha voxad tœts: "Carne! Carne!". I milanes i è fracads (l'istess Piccinino l'è ferid da una sassada) e i lassa sœl post 400 intra morts e prijonier. Di ipotesi i dix qe ol lœg de la bataia al fœss vexin a Dogn; g'è anc di oltre version de qesto episode.[5]

Ol Colleon, intant, al profita de qesta vitoria per reconquistar la Vall Cavallina e i olter territore ocupads, e insema al Lupi al descaça vià l'esercet del Ducad: ol 24 de november a Bergem la riva la notizia qe ol Piccinino l'ha portad i so trœpe a Carevaj. Ol condotier bergamasc al riva anc a ciapar la Vall Camonega, e al pœl insé tornar a Bressa da vencedor.[4]

I olter tentativ[Mudifega | mudìfica 'l sorgènt]

La guerra però l'era mìa finida, e l'ann dopo i milanes i ha provad anc'mò a ciapar la citaa: indel setember del 1438, dopo vesser penetrads in Borg Palaz e Borg Santa Caterina, i riva mìa a ciapar la citaa.[6]

Ma g'era mìa adoma i tentativ militar: i famee gibelline (sovertœt i Suardi), qe i è filo-milanese, i trama indel'ombra per consegnar la citaa ai Visconts. Semper indel 1438, mentre ol Piccinino l'è ocupad indel assede de Bressa, i tira insema i solds per comprar ol conestabel (tal Scaramuzza da Forlino)[4] e far entrar in citaa i trœpe gibelline a travers porta San Lorenz, guidade da Peder Viscont (qe l'hiva portad i so milizie, plœ un grœp armad de Brembilla). I è però descoverds e denonçads da un caporal, tal Becharino da Pratta, e ol tradidor l'è sobet justiaziad. I Suardi e olter gibellin, qe i pudiva plœ entrar in citaa, i ha saqejad ol contado per vendicar-s; a Bergem, ma anc indele oltre citaa de la Republica, i possess di Suardi e di oltre famee i è confiscads e i so member esiliads, e tants i pœderar plœ tornar in citaa gna a la fin de la guerra.[6]

I conseguenze[Mudifega | mudìfica 'l sorgènt]

La spartizion de la Lombardia

Grazie a la resistenza de Bergem, Bressa e Verona, ol Ducad de Milan, fruad da la guerra, al dovrar renonziar a reconquistar de la Lombardia orientala, e con la Pax de Cremona, segnada jo ol 20 de november del 1441, ol confin lombardo intra i do potenze l'è segnad anc'mò da l'Ada.

A la mort de Filip Maria Viscont, ol sucessor al sarà ol condotier Francesc Sforza, qe l'hiva sposad la s'cieta del Duca, Bianca Maria, in cambe di so servesse. La so salida al govern de Milan al segnerà la fin de l'esperiment de la Republica Ambrosiana, e ol tornar de la guerra in Lombardia; indel 1454, con la pax de Lod, l'è trovad ol pont d'equiliber definitiv intra ol Ducad e la Republica de Venezia.

Riferiments[Mudifega | mudìfica 'l sorgènt]

  1. (IT) Il Libero Comune di Bergamo - Ars et historia di Bergamo
  2. (IT) Bergamo Viscontea - Ars et historia di Bergamo
  3. (IT) La Serenissima Repubblica Veneta (parte prima) - Ars et historia di Bergamo
  4. 4,00 4,01 4,02 4,03 4,04 4,05 4,06 4,07 4,08 4,09 4,10 Continuazione della Memorie storiche della città di Bergamo (varda la bibliografia)
  5. 5,0 5,1 Il Castello di Cenate Sotto e la Famiglia Lupi (varda la bibliografia)
  6. 6,0 6,1 6,2 (IT) La città sotto assedio, Amici della Mura - Bergamo; Bergamo scomparsa, la città sotto assedio, Bergamosera.
  7. Cognossid anc come Detesalvi, Dietesalve, Diotesalvi, Dio-Tesalve, Detisalvo, Diotisalvi ecetera. De spess, come tants condotier, al tirava vià ol cognom e al sa faxiva ciamar Detesalvo da Bergem. Da Il Castello di Cenate Sotto e la Famiglia Lupi (varda la bibliografia)

Bibliografia[Mudifega | mudìfica 'l sorgènt]

  • (IT) Continuazione delle Memorie istoriche della città e della chiesa di Bergamo, opera postuma de Giuseppe Ronchetti, pajine 16-19, 21-23; online .
  • (IT) Memorie per servire alla vita di Diotisalvi Lupi, Marco Lupi, pajine 509-510; online .
  • (IT) Il castello di Cenate Sotto e la Famiglia Lupi, Aministrazion Comunal de Cenat Sota, 2003, pp. 201-207. Online col nom de Note biografiche di Detesalvo Lupi.