Varon Milanes

Quest articol chì l'è scrivud in lombard, con la Noeuva Ortografia Lombarda

El Varon milanes de la lengua de Milan (o a la corta Varon milanes) l'è vun di pussee antigh test de la leteradura milanesa. Quell che el l'ha scrivud l'è 'l Giovann Capis, nassud a Dom intorna al 1550, mort despoeu del 1610. El Varon l'è un poo un dizzionari etimologegh di parolle milanese (intorna ai 570), che vegnen, segond l'autor, del latin e del gregh. El titol el fa vegnì in ment el Varon, che l'è famos perchè l'ha scrivud el De lingua Latina.

Storia

El Varon l'è stad stampad la prima voeulta a Pavia cont i stampe del Bartoli, ma quella prima edizzion chì la se cognoss domà perchè l'è regordada in de la segonda, fada a Milan del Sgiovann Jacom Com in del 1606. Quell'edizzion chì, reveduda de l'Ignazio Albani (de Meraa, nassud a la fin del cinch-cent e mort intorna al 1650), la contegn anca el Prissian de Milan de la parnonzia milanesa, scrivud del Giovanni Ambrogio Biffi.

Ancaben che el sia no scrivud in milanes (al contrari del Prissian), el Varon l'è importantissem per quell dialet chì e la so leteradura, al pont che el Porta 'l fa el so nom coma el prim di cinch pilaster de la leteradura milanesa – insema a Carla Maria Masg, Meneghin Balestrer, Carla Toni Tanz e Isep Parin – in d'un famos sonet che el scomencia inscì:

	«Varon, Magg, Balestrer, Tanz e Parin, cinqu omenoni proppi de spallera, gloria del lenguagg noster meneghin, jesuss! hin mort, e inscì nol fudess vera.»
	(Porta, Varon, Magg, Balestrer, Tanz e Parin)

Despoeu de queste prime edizzion, ghe n'è stad di oltre: in del 1750 a Milan, per oeuvra del Giuseppe Marelli; in del 1816 del Francesco Cherubini, in del prim di dodes tom de la soa Collezione delle migliori opere scritte in dialetto milanese (pp. 23-47); in del 1901 del Ferdinando Fontana in de la so Antologia Meneghina (Bellinzona, Tip. Em. Colombi, pp. 63-73). L'ultema edizzion la l'ha fada el Dante Isella (2005), che gh'ha sgiontad ona lista de vos che inn stade doprade di autor milanes, del Bonvesin de la Riva al Delio Tessa.

Composizzion del tratad

*Collezione delle migliori opere in dialetto milanese*, 1816

El tratad el poeul vesser spartid in d'un poo de toch. El Varon Milanes el scomencia cont una dedega de l'editor in italian al nobil milanes Ercol Gallarad, scrivuda el 6 marz del 1606. Poeu gh'è di noeuv sonet de l'autor, che inn revoeult a di collega poeta, a di persone polemeghe in di so confront, a l'Ercol Gallarad medem, a l'antigh orator roman Ciceron, o pura che parlen de la natura del dialet milanes. Poeu gh'è una segonda introduzzion de l'editor per la segonda edizzion e un'introduzzion a l'argoment del Varon.

Donca ghe ven presentad intorna ai 570 parolle milanese, cont el so significad in toscan, propi come 'l capita in d'un dizzionari. A la fin de l'elench, gh'è una spiegazzion etimologega de tute i parolle, al fin de provà la so orisgin o greca o latina.

A l'è donca un tentativ de conferì al dialet milanes una dignità compagna de quella del toscan, operazzion assee corasgiosa ai inizzi del 1600, period in del qual el modell vincent de la leteradura de la penisola taliana a l'era el petrarchism bembian.

Bibliografia

Varon Milanes de la lengua de Milan e Prissian de Milan de la parnonzia milanesa stampà de noev in Milan per Gio. Jacomo Como libraro 1606 e restampad del Giuseppe Marelli del 1750 (Test online)
Dante Isella, Lombardia stravagante. Testi e studi dal Quattrocento al Seicento tra lettere e arti, Turin, Einaudi, 2005 ISBN 8806176617