Szczerbiec

Quell articol qì l'è scrivud in Lombard, cond l'ortografia Scriver Lombard.

Documentazion pitorega de la Szczerbiec ind el 1764.

La Szczerbiec (prononça polaca: [ˈʂt͡ʂɛr.bʲɛt͡s])^[1] l'è la spada cerimoniala dovrada ind le incoronazion de la plu part dei Re Polac dal 1340 a'l 1764. L'è conservada e esponida ind el Castell del Wavel a Cracovia come l'uneg restait dei joiei de la Corona Polaca Medievala.^[2]

Etimolojia

Ol so nom al vegn dal polac szczerba (sqeia, bux, capeta).^[3] In lombard s'pœl render-l come Spada Sqeiada. Segond la lejenda ol re polac Boleslav I ol Corajos l'havress sqeiada ind el sbater jo la Porta Dora de Kiev ind el 1018 (la porta però l'è staita fabregada adoma ind el 1037). In realtaa, ol nom de la spada al vegn de l'intai ind la lama, qe l'è probabel qe al sies stait cread per portar dei reliquie, come l'era comun ind el Medioev.

Storia

La Szczerbiec l'è staita fabregada ind la prima metaa del secol XIII, fors in Renania. A'l prencepe l'era proprietaa del princep Boleslav (fors Boleslav I de Masovia o Boleslav ol Devot) come l'indeçava l'iscrizion (qe la g'è plu) su l'impugnadura. L'è probabel qe a'l temp la fœss dovrada come simbol del poder judiaziare (gladius iustitiae).^[2]

Ind el 1320 l'è staita dovrada de Ladislav I de Polonia come spada de incoronazion ind la Catedral del Wavel. Despò l'è staita tegnida ind el Castell del Wavel insema a i olter joiei de la corona polaca, e l'è staita dovrada ind le incoronazion de la plu part dei Re Polac fina a'l 1764.^[2]
Ind el 1795 ol castell l'è saqejad dei prussian, e la spada la passa de man plu volte ind el XIX secol, fina a vesser comprada de l'Hermitage de San Pedersburg ind el 1884.^[2] L'Union Sovietega la darà indree a la Polonia ind el 1928. Ind la Segonda Guerra Mondial, la Szczerbiec l'è portada a'l segur in Canada, e la torna a'l Wavel adoma ind el 1959.

Descrizion

La spada l'è caraterizada de un'elsa d'arjent, quarciada jo con dei piastre d'or, qe i è decorade con dei formule majege, 118 simboi cristian e dei motiv floreai. Prope sota la guardia g'è una streita crena ind la lama, con tacad un picen scud d'arjent cond el stema dei Piast. Qest a l'è probabel qe al sies l'ultem rest del fœder, cread ind el 1340 e perdid intra ol 1819 e ol 1874. La lama l'è de tipo Oakeshott XII. I misure principale i è:

Longeza totala: 98,4 cm
Longeza lama: 82 cm
Largeza massema lama: 5 cm

Decorazion e inscrizion de l'elsa^[4]
	Dreit		Banda streita	Rovers		Banda streita
Pomell	Cercc ind el mez: Letera T stilizada (opur T sora una C) intra i letere alfa e omega con sora dei crox, e sota tut una crox dent una rœsa con 12 foie		Motiv romboidal	Cercc ind el mez: Boscal de vida		Motiv romboidal
Pomell	Anell estern smussad: inscrizion: + REC. FIGVRA. TALET. AD AMOREM. REGVM. ET. PRINCIPVM. IRAS IUDICV. M		Motiv romboidal	Anell estern smussad: Foie de vida		Motiv romboidal
Impognadura		Sora: Lion alad de San Marc, inscrizion: MARCVS	inscrizion: LIST E. EST. GLAUD… h.BOLEZLAI ‘DVC… (perdid e sostituid con un motiv romboidal)		Sora: Agola de San Joann, inscrizion: IhOANNES	inscrizion: CVM. QVO. EI DNS. OS. AVXIL ETVR. ADUS. PARTES. AMEN (perdid e sostituid cond un spessor de cera)
		Mez: Bœv alad de San Luca, inscrizion: LVCAS			Mez: Anjol de San Matee, inscrizion: MMThCVS
		Sota: Agnell de Dé			Sota: Agnell de Dé
Guardia		Estremitaa sinistra: Lion alad de San Marc	Motiv triangolar		Estremitaa sinistra: Anjol de San Matee	Motiv triangolar
	Mez: inscrizion: QVICVMQVE hEC + NOMI[N]A DEII SECVM TVLERI[T] NVLLVM PERICVL[VM] CN EI OMNINO NOC[E]BIT			Mez: inscrizion: CON. CITOMON.. EEVE SEDALAI. EBREbEL Sota una decorazion de foie de vida
		Estremitaa dreita: Bœv alad de San Luca			Estremitaa dreita: Agola de San Joann