Stema de Pavia

De Wikipedia
Jump to navigation Jump to search
Quell articol qì l'è scrivud in Lombard, ortografia SL.
Stema de Pavia
Como-CoA-historical.svg
Blasonadura
De ross a la crox d'arjent

Ol stema storeg de Pavia l'è un scud ross cond una crox d'arjent.

Stema ofiçal de l'aministrazion comunala[Modifega | mudìfica 'l sorgènt]

Ol stema ofiçal del Comun de Pavia l'è: de ross a la crox d'arjent, con sora un masqeron cond una corona comitala antiga. Ol tut in su un cartocc, qe al g'ha segnads i monogram CO (a manzina de qell qe al varda) e PP (de l'oltra banda), contrazion de Commune Papie.[1]

Storia[Modifega | mudìfica 'l sorgènt]

La crox bianca in camp ross la nass in Lombardia come simbol gibellin, derivada de la Blutfahne, la bandera de l'imperador del Sacro Roman Impero. Pavia, come dei oltre citaa lombarde (per esempe Com), l'era sqierada cond l'imperador, contra la Liga Lombarda (e sovertut la citaa de Milan, qe la circava de spander la so influenza a tuta la Lombardia).

La plu antiga descrizion del stema (scrivida in latin) l'è contegnida ind el Commentarius de laudibus Papiae, del qual l'è conservad l'orijinal (o la copia) del 1330.

Ind el 1396 l'è istituida la Contea de Pavia, con diploma de l'imperador Venceslav. A l'epoca la citaa l'era sota ol domini dei Visconts, e ol nœv stema l'è partid, ind el prim ol Bisson, ind el segond la crox citadina. L'è qest qé ol stema scolpid su la façada meridionala de la Certosa de Pavia.

Cond el rivar dei Sforza, a'l stema l'è jontad ol so simbol (d'or a i tri agole nigre una sora l'oltra) ind la partizion del Bisson.[1]

Ind el 1600 ol stema al torna a vesser blasonad adoma de la crox, ma ol scud al deventa oval, e l'è jontad ol cartocc cond el masqeron e una corona qe la cambia forma ind i agn.[1]

Cond el rivar dei revoluzionare frances anc l'araldega del cumun l'è cambiada: prima i è tirats vià la corona e ol masqeron, ma a la fin l'è cambiad tut ol stema, qe al deventa oval, con la rapresentazion allegorega de la revoluzion (una fomna).[1]

Ol tornar dei austrieg e la creazion del Regn Lombard-Venet al porta anc'mò dei cambiaments ind el stema: ol scud con la crox a l'è metid sota una corona cond l'Agola Bicefala, e l'è contornad con dei ricam d'or.[1]

Cond la conquista piemontesa de la Lombardia ol stema al torna qell storeg, fina a l'adozion ofiçal del stema d'incœ.

Galleria d'imajin[Modifega | mudìfica 'l sorgènt]

Bibliografia[Modifega | mudìfica 'l sorgènt]

  • (IT) Carletto Genovese, La provincia di Pavia: gli stemmi civici del Pavese, della Lomellina e dell'Oltrepò, ISBN 8890722606, ISBN 9788890722608; una part de l'articol sul stema de Pavia al pœl vesser lejid .

Riferiments[Modifega | mudìfica 'l sorgènt]

  1. 1,0 1,1 1,2 1,3 1,4 (IT) Lo stemma della città