San Donaa (MI)

De Wikipedia
(Rimandaa da San Dunaa (MI))
Va a: navegá, truvá



Lumbard ucidental Quest articol chì l'è scrivuu in lombard, grafia milanesa.


San Donaa
San Donato Milanese-Stemma.png
San Donato Milanese.jpg
Map of region of Lombardy, Italy - grey.svg
Stat Itàlia
Regiun Lombardia
Pruvincia Milan
Cuurdinade 9°16′22″ E
45°25′08″ N
Vedè sü la mapa
Abitant 32 492 ab.
Superfiss 12,8 km²
Densità 2 538 ab/km²
Altitüden 102 m s.l.m.
Cumün tacaa Milan, Peschera Borromee, Mediglia, San Giuglian, Overa, Locaa
CAP IT-20097
Còdes ISTAT 015192
Prefiss tel. 02



San Donaa (San Donato Milanese) l'è on comun de la Provincia de Milan che 'l cunta 32492 abitant. Situada a sud-est de Milan, cont el qual la confina, San Donaa la gh'ha dò frazion: Poasch e Sorighee.

Stòria[Mudifega | mudìfica 'l sorgènt]

La stòria de San Donaa la scomincia cont el rivà di vari popolazion de epoca pre-romana, anca se 'l ver svilupp de la zòna gh'è staa pròppi sòtta el domini latin. In del 333, la strada che la portava de Milan a Lòd l'era longa sedes mia: a ògni mia la gh'era ona preja che la mostrava la distanza de Milan. San Donaa la se trovava a la quinta preja.

A l'altezza de ògni pedra de fatt la via principal la s'incontrava cont ona via minor, e arent a quij carròbbi chì hinn staa costruii di ges, trai quai anca quella de San Donaa (on vescov de Arezz molto popolar in la diòcesi milanesa) intorna a la qual l'è nassuu el center de la città futura.

Sòtta l'epoca di Longobard (VII secol) la nass la piev de San Donaa, a òpera de l'esercit del Grimoald, duca de Benevent, che 'l gh'aveva di ambizion vers Pavia e l'aveva miss i sò trupp pròppi in sul territòri de San Donaa.

La fondazion vera e pròppia la se sa nò quand che la gh'è stada, ma se pensa che a fàll el sia staa on abaa de la vesina Abbadia de Ceravall.

Dòpo l'oocupazion longobarda, tutt el territòri l'è staa part d'on feud unich che, in del XI secol, l'è staa proppietà de la famiglia nòbil di De Advocati. Quand che quella famiglia chì la s'è estingiuda, i ben hinn finii in di man de l'Arcivescov de Milan, gina al XVI secol.

El territòri che 'l ciappava dent i comun de Ceravall, San Donaa e Bolgian l'è staa teater de tanti sconter militar. El 9 settember 1158 el Federich Barbarossa el s'è stabilii chì per sett dì, dòpo avè saccheggiaa Milan. El 13 luj 1278 gh'è stada ona battaglia tra Viscont e Torrian per el possess de la Signoria milanesa. Infin, el 14 settember 1515, l'è vegnuda la Battaglia di Gigant, trai fòrz milanes e svizzer e quij frances, finida con la vittòria di transalpin e la resa de Milan al Francesch I. Anca la resa di nòbil milanes l'è stada fada a San Donaa, per la precision a la Cassina Roma.

In età napoleònica (1809) l'è staa taccaa a San Donaa el comun de Bolgian. Dòpo duu ann, San Donaa l'è stada unida a Viboldon. Quand che l'è nassuu el Regn Lombard-Venet, tucc i center hann trovaa la soa veggia autonomia.

San Donaa la gh'ha avuu on ròl stòrich subit dòpo i Cinqu Giornad de Milan (1848), perchè l'armistizzi trai Piemontes e i Austriach che l'ha portaa a la fin de la Prima Guerra d'Indipendenza l'è staa firmaa, anmò ona vòlta, a Cassina Roma.

In del 1862 San Donaa la gh'ha ciappaa el nòmm offizial de San Donato Milanese. In del 1870 gh'è stada taccada Bolgian.

Dòpo l'Unità, i territòri comunai gh'hann avuu on mucc de modifich. San Donaa l'ha ceduu a Milan i paes de San Martin e Triulz de Sora in del 1922, Ceravall e Nosed in del 1924. Inveci in del 1932 hinn passaa de Milan a San Donaa i frazion de Poasch, Sorighee, Bagnoeu, Cassina Bosch e Teccion.

In del 1976, San Donaa la gh'ha avuu el titol de città.


Evoluzion demografega[Mudifega | mudìfica 'l sorgènt]

L'andament del nümer de abitant del cumün de San Donaa l'è mustraa in de la tabela chi de sutta:



Habitantes censados