Pioneer 11

De Wikipedia
Va a: navegá, truvá
Chest artícol a l'è scricc in Lumbàrt Orientàl, ortograféa unificàda Lombard oriental
Puzisiù ipotética del Pioneer 11 ai 8 de febrér del 2012

Pioneer 11 l'è 'na sónda spasiàla americàna lanciàda de Cape Canaveral ai 5 de bril del 1973. Dòpo de ìga streersàt la sintüra dei asteròidi, la g'ha vizitàt i pianeti Giove e Saturno e dòpo la g'ha ciapàt la diresiù del spàsio interstelàr. L'öltema cumunicasiù l'è stàda captàda sö la Tèra ai 23 de setèmber del 1995. La fàa part de la segónda generasiù de sónde del Programa Pioneer.

La vìzita a Giove[Mudifega | mudìfica 'l sorgènt]

Pioneer 11 l'è pasàda arènt a Giove 'ntra 'l més de noèmber e chèl de dezèmber del 1974. El pónt piö arènt al pianeta Giove l'è stat pasàt ai 2 de dezèmber, (42.828 km de la part piö alta dei nìgoi). La sonda la g'ha töt zó 'nsomeànse bèle detagliàde de la Gran Macia Rósa, la g'ha mandàt le prìme fotografìe de le regiù polàre, e la g'ha püdìt stabeléser la masa de Calisto. A la fì de la sesiù de rileamèncc e mizüre, la Pioneer 11 la g'ha sfrötàt la fórsa gravitasiunàla de Giove per ciapà la ónda e fàs proietà en diresiù de Saturno.

La vìzita a Saturno[Mudifega | mudìfica 'l sorgènt]

La Pioneer 11 l'è pasàda arènt a Saturno al prim de Setèmber del 1979, a la distànsa mìnima de 21,000 km de la part piö àlta dei sò nìgoi.

En chèl momènt là, le sonde Voyager 1 e Voyager 2 le gh'ìa zabèlia sorpasàt Giove e i éra pò a lùre en viàs 'nvèrs Saturno, isé i tècnich de la NASA i g'ha dicidìt de fàga streerà el piàno dei anèi endel stès pónt che le g'harà de pasà le Voyager dòpo quach més, isé de verificà la traietòria prìma che riès le Voyagers, e cazomài ghe fös el perìcol de restà denegiàde, devià le Voyager sönden ótra traietòria. El pasàgio envéce l'è stat realizàt sènsa problémi.

La g'ha töt zó fotografìe — e quàze la ghe nàa a sbàter adòs — pò a de giöna de le lüne piö pesène de Saturno. L'ogèt l'è stat identificàt come Epimeteo, 'na lüna scuprìda el dé prìma co le fotografìe scatàde de la stèsa sònda. La gh'è pasàda arènt apò a Janus (1 de setèmber del 1979 a le 14:52 UTC a 'na distànsa de 2500 km) e Mimas (a le 16:20 UTC del stès dé, a 103000 km).