Pioneer 10

De Wikipedia

Chest artícol a l'è scricc in Lumbàrt, ortograféa orientàl unificàda.


El Pioneer 10 endei öltem momèncc de la fabricasiù

Pioneer 10 l'è 'na sónda spasiàla americàna lanciàda ai 2 de mars del 1972, prìma sónda a rià a streersà la sintüra dei asteròidi e a rià a vizità 'l pianeta Giove, obietìf principal de la misiù. La fàa part de la segónda generasiù de sónde del Programa Pioneer.

Endel més de zögn del 1983 l'è deentàda el prim ogèt fabricàt de l'òm a sorpasà l'òrbita de Netùno, che 'n chèl momènt lé l'ìa l pianéta piö delóns del Sul, dato che Plutone el se tróaa endel ciapèl de la sò òrbita ecèntrica che rèsta piö arènt la nòsta stèla.

El pónt piö arènt a Giove l'è stat tocàt ai 4 de dezèmber del 1973 (132,252 km) ma zamò quach dé prìma el gh'ìa ambiàt a tö zó fotografìe (en totàl el g'ha trasmitìt a la Tèra 500 fotografìe) che a chèl tép là i éra le 'nsömeànse piö detegliàde mai scatàde al pianeta. Del materiàl mandàt de la Pioner 10 s'è riàt a otègner informasiù presiùze sö la temperadüra de la atmosféra, de l'altèsa dei nìgoi piö alcc, de la fàsa de radiasiù e del càmp magnétich, en bèl tòch piö gaiàrt de chèl che se pensàa.

Dòpo la vìzita a Giove la sónda la g'ha ciapàt la diresiù del spàsio interstelàr e l'öltema cumunicasiù l'è stàda captàda sö la Tèra ai 23 de zenér del 2003, quan che 'l se troàa a presapóch 80 UA de la Tèra.