Musee civegh de storia natural de Milan
|
Quest articol chì l'è scrivud in lombard, con la Noeuva Ortografia Lombarda |
| Musee civegh de storia natural de Milan | |
|---|---|
| (IT) Museo civico di storia naturale di Milano | |
 | |
| Sit | |
| Stat |  |
| Località | Milan |
| Adressa | Cors Venezzia 55 |
| Coordinade | 45°28′22″N 9°12′08.85″E / 45.472777°N 9.202457°E |
| Carateristeghe | |
| Tipo | Storia natural |
| Istituzzion | 1838 |
| Vertuda | 1893 |
| Visitator | 205 544 (2022) |
| Sitt web | |
El Musee civegh de storia natural de Milan a l'è un musee de storia natural de Milan, fad su in del 1838 e in tra i pussee important musee de la natura in Europa. Part del pol di musee del Comun de Milan, l'è dent ai Giardin publegh.
A l'è stad fad su grazzia a una donazzion del naturista milanes Giuseppe De Cristoforis e del Giorg Jan, naturista lombard-ongares che l'haveva dad anca la soa collezzion, e l'è stad fad prim diretor del musee.
Storia
[Modifega | modifica 'l sorgent]El musee l'è vert del 1838 per toeu dent la collezzion del Giorg Jan e del Giuseppe De Crisoforis, che l'era stada fada su 'me patrimoni inspartibel del 1832: el prim diretor del musee a l'è el Jan midem. L'è vert al publegh del 1844 per el VI Congress di Scenziad Italian, e se scerniss fin de subit che 'l gh'havarà un roeul didategh, roba che l'è fada pussee forta del 1863, quand che ghe fann dent i cors de l'Istitut Tecnegh Superior, che poeu el deventarà el Politecnegh de Milan. Del 1866 el gh'ha dent anca la Società italiana de scenze naturai.
Del 1924 al 1938 el gh'ha dent la facoltà de scenze naturai, matemateghe e fiseghe de l'Università di Studi de Milan: del 1943 un bombarament american el destruga la pupart del palazzi e di collezzion, el musee el torna vert al publegh del 1952, grazzia a una gran donazzion del dotor milanes Vittorio Ronchetti e ai jut del pian Marshall.
In principi el gh'haveva sed in del vegg convent de Santa Marta, del 1863 a l'è spostad a Palazz Dugnan e, del 1893, in d'un noeuv palazz in di Giardin Publegh, progetad del Giovanni Ceruti, che l'è stad el prim esempi de architetura museal in Italia.
Collezzion
[Modifega | modifica 'l sorgent]El musee el gh'ha 23 salon, spartid in du pian e 'n sota-tecc, e in tra esposizzion e collezzion el gh'ha intorna ai trii milion de oeuvere. Gh'è anca un centiner de diorama, che l'è la collezzion pussee granda in Italia, con di animai tassidermizad.
A gh'è el toch de solfer pussee grand che l'è stad mai trovad in del mond. A gh'è anca vuna di Tridacne pussee grande mai descoverte.
Diretor
[Modifega | modifica 'l sorgent]| Temp | diretor | note |
|---|---|---|
| del 1838 al 1866 | Giorg Jan | naturalista |
| del 1866 al 1882 | Emilio Cornalia | zoolegh e paleontolegh |
| dal 1882 al 1891 | Antonio Stoppani | gegolegh e paleontologh |
| dal 1892 al 1911 | Tito Vignoli | filosof e antropolegh |
| del 1911 al 1927 | Ettore Artini | petrograf e mineralogista, diretor de la sezzion de Mineralogia del 1893 |
| del 1928 al 1951 | Bruno Parisi | zoolegh, diretor de la sezzion de Zoologia del 1921 |
| del 1951 al 1964 | Edgardo Moltoni | ornitolegh, conservador de la Collezzion ornitologega Turaa del 1922 al 1951 |
| del 1964 al 1981 | Cesare Conci | entomolegh, conservador de la sezzion de Zoologia del 1957 al 1964 |
| del 1981 al 1994 | Giovanni Pinna | paleontolegh, conservador de la sezzion Geologia e Paleontologia del 1964 |
| del 1994 al 2001 | Luigi Cagnolaro | zoolegh, conservador de la sezzion de Zoologia di vertebrad del 1962 |
| del 2001 al 2010 | Enrico Banfi | botanegh, conservador de la sezzion de Botanega del 1976 |
| del 2010 al 2012 | Mauro Mariani | malacolegh, biolegh marin, l'è stad diretor de l'aquari civegh de Milan del 1988 |
| del 2012 - incoeu | Domenico Piraina |
Ligam de foeura
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Musee civegh de storia natural de Milan
Wikispecies el gh'ha dent informazzion su Musee civegh de storia natural de Milan
