Materiaj fònoassorbent

Quest articol chì l'è scrivuu in lombard, grafia milanesa.

Vos principala: Assorbiment acustich.

I materiaj fonoassorbént hinn di materiàj doperàa per controllà i riflession nò vorsùd, el rivèrber e ‘l rumór.

I materiàj fònoassorbént vegnen classificàa inscì segónd el sò meccanismo de assorbimént:

materiàj assorbént per porosità;
materiàj assorbent per risonanza d’ìncav;
materiàj assorbént per risonanza de membrana.

La quantità de energia sonòra surbida di materiàj assorbént l’è descrivuda per mèzz del coefficent de assorbiment acustich, definìi come ‘l rappòrt infra l’energia sonòra surbida e l’energia incidenta.

El coefficent de assorbiment acustich el dipend de:

i caratteristich fisich di materiàj;
el spessór di materiàj;
la presenza de spazi de mèzz infra i materiàj e 'l mur comunque ona superfice rigida de drée a lor;
i manér che i materiàj vegnen aplicàa.

El princippi fisich al fondamént de l’assorbimént acustich l’è la trasformazión de l’energia sonòra incidenta in calór e quèst el succéd in manera divèrsa segond el tipo e la struttura di elemént assorbènt. ^[1]

Materiaj assorbent per porosità

L’assorbimént per porosità l’è tipich di materiàj porós; la porosità l’è el rappòrt infra al volùmm di voeud e ‘l volùmm totàl $\Phi ={\frac {V_{v}}{V_{t}}}$ .Quand che la porosità l’è alta, sora 0,75 l’assorbimént el dipénd pù del tipo de materiàl ma domà de la soa porosità.

On'altra grandèzza importànta l’è resistività al fluss, che l’ìndica la resistenza che on materiàl l’oppònn al passàgg d’on fluss d’aria:

r={\frac {\Delta P}{d\cdot v}}

[ Pa • s / m² ]

Indoe:

∆P l’è la crodada de pressión che la succéd adrée a l’attraversamént del materiàl, in Pascal;

v l’è la velocità de l’aria [ meter al segond ];

d l’è el spessór del materiàl in meter.

Sora el valor de porosità de  $\Phi =0,75$  el tipo de materiàl el cunta pu nagòtt in sul coefficént de assorbimént acustich. I cunten domà i pòr.

Per di valór de la resistività al flùss comprés infra 10⁴ Pa s/m2 e 10⁶Pa s/m² el tipo de materiàl l'infleunza minga el coefficént d’assorbimént acustich.

L’assorbimént acustich el dipénd poeu anca del spessór, defàtt l’assorbimént l’è màssim quand che la distanza del materiàl fònoassorbént de la superfice dura indoe l’è poggiàa l’è almanch eguàl de ¼ de la longhèzza d’onda $\lambda$ del son che se gh'hà de surbì e on cressimént del spessór del materiàl oltra λ/4 l’è inùtil per quèlla freguenza là. I bass freguénz hinn pussée diffìcil de vèss surbìd de già che ‘l servìss on spessór del materiàl maggiór, per quèst l’assorbimént per porosità l’è nò adàtt de vèss doprà per surbì i bass freguénz ma domà per quèj alt. Anca a'a se aumentà nò el spessór del materiàl ma 'l se mètt a ‘na certa distanza d’on sostègn rìgid a se ottègn l'istèss effètt.

L’aumént del spessór del materiàl porós el fa de manera de surbì mèj i bass freguénz e de surbì di freguénz semper pù bass manemàn che 'l spessór el ven sgrandìi ma ‘l cambia nagòtt per quèj pussée alt che la soa longhèzza d'onda l'è minora de quatter vòlt el spessór. Per surbì de bon ‘na cèrta freguenza gh’è besògn d’on spessór del materiàl de almanch vun quart de la freguenza del son de surbì. ^[2]

La fà el sò mestée anca la forma de la superfice assorbént de già che di form che offrissen ona superfice pussèe estesa con l'onda incidenta favorissen ona stralattonaria maggiora de l'energia sonòra. Hinn assosènn dopràd i piràmid.^[3] Infra i materìaj fònoassorbènt d'usanza spantegada gh'hinn quèj fibrós (compagn de la lana de veder, la lana de ròccia, el sugher, el agglomeraa de buscaj de legn, la mochètt, i tappée e i tend) e quèj a cèllul avèrt compagn de la gommapiuma, la melamina spanduda, la vermiculite spanduda, la perlite spanduda e l'argilla spanduda^[4]

Materiaj assorbént per risonanza de incav

Segond quèll meccanismo chì, che ‘l lavora ben in sui freguénz medi, l’ènergia sonòra la ven mangiada foeura denter in di incàv che fànn el mestée di risonador acùstich per el fenòmen fìsich de la risonanza acustica. I risonadór hinn fàa su d’on incàv conligàa cont el defoeura per mèzz d’on còll pussée strècc de l’incàv medèmm. L’onda sonòra che la riva al risonadór la sollecita la massa d’aria del còll che 'l conliga l’incàv cont el defoeura. La risonanza l’interèssa soratùtt la freguenza de risonanza tipica del risonadór e la va sbassandòss a slontanàss de lée. La freguenza de risonanza tipica (in Hertz) d’on risonadór la po’ vèss inscì calcolada:

f_{o}={\frac {c}{2\pi }}{\sqrt {\frac {\pi r^{2}}{(L+1,6r)\cdot V}}}

indoe:

c l’è la velocità de propagazión del son in meter al segond;

S=\pi r^{2}

l’è la superfice del còll che ‘l conliga l’incàv cont el defoeura de l’ìncav;

L l’è la longhèzza del còll in meter;

r l’è el ragg del còll in meter;

L l’è la longhèzza del còll medésim in meter;

Per savenn pussee, varda l'articol Risonanza acustica.

Quand che la succéd la risonanza la vastitàa de la danda l’è importanta e inscì anca l’energia mangiada foeura; l’assorbimént l’è selettìv intorna di freguénz de risonanza.

Per surbì di freguénz divèrsi a gh’è besògn donca de installà tanti risonadór, ciaschedun di quàj d'ona grandèzza divèrsa. L’è minga necessari che i vari risonadór sìen separàa infra de lor, per esempi ‘na lamerina o on pannèll perforàa con di busminga piazzàa tucc a la stèssa distanza infra de lor, miss a ‘na cèrta distanza d’on mur inflessìbil, i fànn l’istèss lavoràa d’ona serie de risonadór cischedùn di quàj d’on volùmm divèrs de l’alter. ^[5]

La risonanza de incav insèma a la risonanza per porosità

I meccanismi de la risonanza d'incàv e de quèlla per porosità pòden vèss mes’ciàa insèma cont el mètt del materiàl porós in del spazzi de mèzz o ben in di incàv.

Intanta che materiàl porór el surbìss per prosità, i bus hinn ona serie de risonadór de l'Helmotz che la soa freguenza de risonanza l’è:

f_{o}={\frac {c}{2\pi }}{\sqrt {\frac {\pi r^{2}}{(L+1,6r)\cdot V}}}

indoe V=d²h indoe d l’è la distanza infra du bus e h a l'è 'l spessór del spazzi de mèzz infra la lamerina o 'l pannèll e la struttura rìgida che la ghe stà de drée.

A ghe sarìss ancasì 'n’altra fórmola empirica de calcolà la freguenza de risonanza, in del caso de bus tucc eguàj, fondada in su la percentuàl de sbusadura:

f_{o}=5000{\sqrt {\frac {P}{l\cdot (d+0,8D)}}}

indoe:

P l’è la percentàl de la lamiera occupada di bus;

l l’è la profondità del spazzi de mèzz in millimeter;

d l’è l’è el spessór del pannèll in millimeter o ben la longhèzza del còll;

D l’è el diameter di bus in la lamera (o in del pannèll) in millimeter.

'Na sbusadura fada su con di bus de diametri divèrsi la detèrmina on assorbimént acustich de pussée de freguénz comprés ind ona gamma pussée granda. ^[6]

Materiaj assorbent per risonanza de membrana

La risonanza de membrana la lavora ben ai bass freguenz (chi là infra i 50 e i 500 Hz). I materiàj assorbént per risonanza de cavità hinn di materiàj assée elàstich e dotàa d’on cert pes (pannèj flessìbil) piazzàa a 'na cèrta distanza di mur. L’energia sonòra la ven mangiada foeura per l’effètt di attriti intèrni caosàa de la desformada de la massa elastica fada su de la membrana e del volùmm de l’aria che la gh’è de drée de lée inzigada de l’onda incidenta. Anca in quèll caso chì l’è el fenòmen de la risonanza acustica che ‘l fa de manera se starlattà l’energia e donca de surbì el son. L’assorbiment acustich l’è pussée fòrt intorna de la freguenza de risonanza, che in quèll caso chì la pò vèss clacolada ìnscì:

fo=60{\sqrt {\frac {1}{m\cdot l}}}

^[7]

indoe m l'è la massa specifica del pannèll in kg/m² e l l'è la profondità del spazzi d'aria de mèzz in meter.

L'assorbiment per risonanza de membrana el fà el sò mestée de bon soratùtt ai bass freguénz e la soa freguenza de risonanza la dipend domà de la massa del pannèll e del spessór del spazzi infra el pannèll e 'l mur che 'l gh'è de drée.

Vos correlad

Riferiment

↑ Michele Pascali (2015). Acustica ambienti interni (in italian). Grafill, 49. ISBN 978-88-8207-781-5.
↑ Michele Pascali (2015). Acustica ambienti interni (in italian). Grafill, 49-58. ISBN 978-88-8207-781-5.
↑ https://www.panasorb.eu/lng/it/espanso-piramidale-acustico/?language=it
↑ https://www.acustico.com/approfondimenti/pannelli-fonoassorbenti.html
↑ Michele Pascali (2015). Acustica ambienti interni (in italian). Grafill, 58-60. ISBN 978-88-8207-781-5.
↑ Michele Pascali (2015). Acustica ambienti interni (in italian). Grafill, 60-63. ISBN 978-88-8207-781-5.
↑ Michele Pascali (2015). Acustica ambienti interni (in italian). Grafill, 63-65. ISBN 978-88-8207-781-5.

[1] Michele Pascali (2015). Acustica ambienti interni (in italian). Grafill, 49. ISBN 978-88-8207-781-5.

[2] Michele Pascali (2015). Acustica ambienti interni (in italian). Grafill, 49-58. ISBN 978-88-8207-781-5.

[3] ttps://www.panasorb.eu/lng/it/espanso-piramidale-acustico/?language=it

[4] ttps://www.acustico.com/approfondimenti/pannelli-fonoassorbenti.html

[5] Michele Pascali (2015). Acustica ambienti interni (in italian). Grafill, 58-60. ISBN 978-88-8207-781-5.

[6] Michele Pascali (2015). Acustica ambienti interni (in italian). Grafill, 60-63. ISBN 978-88-8207-781-5.

[7] Michele Pascali (2015). Acustica ambienti interni (in italian). Grafill, 63-65. ISBN 978-88-8207-781-5.

[1]

[2]

[3]

[4]

[5]

[6]

[7]