Lazaret de Milan
|
Quest articol chì l'è scrivud in lombard, con la Noeuva Ortografia Lombarda |
El Lazaret de Milan a l'era el sit che se meteven i malad in di epidemie, fad su foeura de Porta Renza in tra la fin del '400 e 'l principi del '500 'me un quadrilater de 378 m per 370 m, contornad de quelle che incoeu inn via Lazaret, via san Grigoeu, vial Vitori Veneto e Cors Buenos Aires.
Un sit per i malad a l'era stad sgiamò pensad sota la Republega Ambrosiana, prima a Cusagh e poeu arent a la Gesa de San Barnaba a Porta Tosa, desgià che prima eren tegnud al Castell de Porta Giovia. A l'è stad poeu insubid a Carsenzagh, in su la Martesana, inscì de podèi portà via aqua: el proget, anca se ghe piaseva no a quei che viveven lilinscì, a l'è stad aprovad del Consili del Duca, ma a l'è stad no fad su, se pensa perchè ghe calaven i daner.
Infin, dopo la pesta del 1485, el cont Galeot Bevlaqua ghe lassa di proprietà del barba apena mort a l'Ospedal Magior, inscì che deventen un ricover per quei con la pesta: 'sti proprietà eren arente a la Gesa de San Grigoeu e del 1488 i lavorà de la strutura, dedicata a la Madona de la Sanità, inn dad al Lazar Palazz, e la scomincia del 1497 e per i prim agn del secol adree a l'è fornida cont i detaj.
Quand che i peste fornissen del 1632 a l'è netad e dad indree a l'Ospedal, che 'l dopera prima 'me scoeula de veterinaria, poeu 'me sit militar e poeu 'me cà de lavorà per i pover: del 1797 a l'è espropriad de la Ministrazzion generala de la Lombardia, e l'è doperad 'me piazza: del 1812, pien de dagn, el torna a l'Ospedal, che 'l dà a vari professionista in ficc. Del 1861 la part a Nord a l'è tajada inscì de fà passà el viadot per la Stazzion Centrala e del 1881 el terren a l'è vendud: l'ann adree a l'è trad sgiò, inscì de fà su di noeuv palazz. L'è restada, per volontà del governo, in pè una part piscinina, che incoeu l'è doperada del Sant Sinod de Milan per la Gesa di Sant Nicola e Ambroeus.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Lazaret de Milan
