Giovann Bertacc

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.

El Giovann Bertacc, cognossuu anca cont el soranomm de Giovannin de Ciavenna (italian: Giovanni Bertacchi; Ciavenna, noeuv de febrar del 1869 - Brughee, 25 de november del 1942) l'è staa on professor, studios e poeta lombard.

Vita[Modifega | mudìfica 'l sorgènt]

Nassuu a Ciavenna de ona pora fameja (el pader l'era on legnamee e la mader fondeghera) l'è restaa orfen del pader che l'era anmò gioven. L'ha studiaa prima a Ciavenna e poeu a Comm, per poeu laureàss in Letter a Milan (1892).
L'è deventaa professor e l'ha insegnaa ai licee Manzon e Parin de Milan, e poeu in de l'Università de Padoa. L'ha lassaa l'insegnament in del 1938, per minga giurà fedeltà al fascism e 'l s'è retiraa a vita privada. L'è mort in d'ona cà de cura a Brughee in del 1942.

L'oeuvera[Modifega | mudìfica 'l sorgènt]

La soa prima oeuvera letteraria l'è el Canzoniere delle Alpi, sortii in del 1895. Quella chì l'è considerada la soa oeuvera pussee importanta, e l'è influenzada de la poesia de Berchet, Leopardi e Carducci. Inoltra l'ha scrivuu di liber de studi in sul romanticism e in su la letteradura italiana in general.
L'ha scominciaa a scriv poesii in lombard che l'aveva superaa i sessant'agn, con la regolta Il perenne domani del 1929. Quei poesii chì, scrivuu in del sò ciavennasch on poo messedaa col milanes, hinn pien de nostalgia per la soa vall, già che lu el viveva ormai delongg de quella che 'l considerava la soa cà.
Inoltra l'ha scrivuu in del 1921 l'inno del CNGEI, cioè Suona la sveglia[1].

Lista di oeuver[Modifega | mudìfica 'l sorgènt]

  • Il canzoniere delle Alpi (1895)
  • Alle sorgenti (1906)
  • Ore dantesche (1914)
  • Leopardi un maestro di vita (1917)
  • Il primo romanticismo lombardo (1920)
  • Riflessi di orizzonti (1921)
  • Il perenne domani (1929)
  • Il pensiero critico e le tragedie di A. Manzoni (1936)
  • Poesie dialettali (1973)

Esempi de poesia[Modifega | mudìfica 'l sorgènt]

QUANT 'L SPINÀZ

Quant 'l Spinàz col ciforèl in boca
al ghe fa segn al treno de inviàs,
ghe paar anca al mè cöor de distacàs
d'un quaicòs che 'l sia staa de la sua vita...
mi vedi 'l mè paees che a pòoch a pòoch
al se slontana ne l'ombra del pasaa.
L'è ormai finii l'estaa:
comincia un cèrto giàlt sü per i ram:
mi torni 'l fiöo che lasa la sua mam.
O mia mam granda, val di mè memòri...!

Bibilografia[Modifega | mudìfica 'l sorgènt]

  • AA.VV., Antologia della poesia nelle lingue e nei dialetti lombardi dal Medioevo al XX secolo, Milan, Libri Schweiller, 2006.

Referiment[Modifega | mudìfica 'l sorgènt]

  1. Font cngei.it

Ligamm de foeura[Modifega | mudìfica 'l sorgènt]