Gesa de Sant Ironem (Bari)
|
Quest articol chì l'è scrivud in lombard, con la Noeuva Ortografia Lombarda |
La Gesa de Sant Ironem (chiesa di San Girolamo in italian) a l'è una gesa de Bari, in del quarter Marconi - San Girolamo - Fesca. L'è part del segond vicariad de l'Arcidiocesi de Bari-Bitonto.[1]
Storia[Modifega | modifica 'l sorgent]
La parochia l'è fada su el 18 de sginer del 1958 de l'arcivescov de Bari Enrico Nicodemo in d'una sed provisoria, cont el cult che 'l scomincia el 30 de avril in d'una villa tolta in ficc, con di alter messe che inn fade in di capelle e gesete de proprietà privada arente.[2] El 24 de luj del 1959 l'arcivescov, insema ai autorità, ghe fa la benedizzion a la sed noeuva, che l'è una sala, comunque ancamò provisoria.[2]
In di agn '60 se proeuva sgiamò a fà su una noeuva gesa pussee bella a nivell architetonegh, ma per reson economeghe e de calà de aziende che voleven toeu i apalt in del 1963 se scerniss de fàlla no.[3]
In su la bas de un proget del Lorenzo Netti fad del 1995[4], l'arcivescov Francesco Cacucci el nonzia del 2006 che la Conferenza Episcopal Italiana gh'ha dad el via libera al fà su de una gesa noeuva[5], con la prima preja del proget, deventad esecutiv del 2017[4] che l'è mituda a marz 2019 e, dopo cinch agn de lavorà, l'è consacrada el 15 de dicember del 2023 cont una messa de l'arcivescov Giuseppe Satriano in del sit noeuv bon de havégh denter circa 400 fedei.[6]
La prima preja del proget noeuv l'è stada benedida del Papa Francesch el 23 de avril del 2014 e mituda el 31 de marz del 2019 de l'arcivesch Cacucci.[7]
Architetura[Modifega | modifica 'l sorgent]
De foeura la gesa l'è granda in la dimension orizontala e l'è quatada de lamera, foeura per el spazzi del batisteri che l'è quatad de preja de Trani del de foeu, e gh'è poeu un gran campanin a forma de trapezzi.[7]
Quand che se va dent, se ved che l'è fada su de 'n aula unega che la gh'ha un presbiteri longh con dent l'altar e l'ambon. Propi a drizza del sit che se va dent ghe un spazzi a forma quadrada per el batisteri.[7] I pared inn piturade con stabilidura bianca, foeura che el presbiteri, che l'è quatad de foeuja d'or, inscì de inluminà el sit che gh'è el tabernacol, che sora el gh'ha una lus. [7]
Comunque, ghe cala no la lus in la gesa, grazzia ai gran fenestre orizontai, e i ared de legn e i oeuvere d'art che gh'è dent inn de la botega de l'Albano Poli. I paviment inn de ciment cilad. [7]
Curad[Modifega | modifica 'l sorgent]
La cronologia di curad de la Gesa de Sant Ironem l'è[5]:
- Don Vito Diana (1958-1967)
- Don Nicola Pascazio (1967-1979)
- Don Antonio Bonerba (1979-1988)
- Don Luigi Spaltro (1988-2011)
- Don Pasquale Zecchini (2011-Incoeu)
Riferiment[Modifega | modifica 'l sorgent]
- ↑ I Vicariati - Arcidiocesi di Bari-Bitonto.
- ↑ 2,0 2,1 Una comunità tra le difficoltà ansie, progetti e speranze 1958 – 1968.
- ↑ Notiziario di un progetto… non realizzato.
- ↑ 4,0 4,1 Ecco la nuova chiesa di San Girolamo attesa per 65 anni. Luce e vetro con uno sguardo verso il mare.
- ↑ 5,0 5,1 Parrocchia San Girolamo - Sito ufficiale.
- ↑ Bari, ecco la nuova chiesa di San Girolamo.
- ↑ 7,0 7,1 7,2 7,3 7,4 Bari (BA) Chiesa di San Girolamo.