Messa

Quest articol chì l'è scrivud in lombard, con la Noeuva Ortografia Lombarda

Quell articol chì l'è domà un sbozz. Se violter sii bon de metegh dent un quaicoss pussee, preocupeves minga e provegh. Inscì de havégh un'ideja de tucc i alter sbozz, vardee chinscì.

La messa, ciamada anca celebrazzion eucaristega, a l'è la liturgia pussee important de varie gese cristiane, che la se fonda in su l'eucaristia, pratega che l'è stada fada su del Gesù midem in di Vangeli, in l'Ultima Cena. Ai prim temp i cristian la ciamaven "frazzion del pan" e la celebraven in di cà privade, in del mez di so cene, el termen missa l'è vist per la prima voeulta in d'una letera de l'Ambroeus de Milan del 386 e 'l deventa, in ocident, el nom doperad in manera comun dopo la mort del Papa Grigoeu I. La frazzion la resta comunque un toch bell important de la celebrazzion.

I gese ortodosse, la pupart di gese ortodosse oriental e i gese catoleghe orientai, in bona sostanza quell che l'è ciamad cristianesim oriental, la ciamen Divina Liturgia, termen che 'l gh'ha origin in del rit bizantin, menter per i siriach la se ciama Santa Qurbana. Per tucc 'sti gese chi a gh'è la presenza real del Gesù in di spece eucaristeghe, la pupart con la dotrina de la transustanziazzion.

In del mond protestant, inveci, se parla pussee de Santa Cena, cult o servizzi divin e gh'è un roeul minor in la comenion, desgià che in 'sti gese chi se cred minga che el pan el deventa carna e che el vin el deventa sangu. I Testimoni de Geova gh'hann di inconter, indova che se studia la Bibia e se lensg la Torr de Guardia, e el pan e 'l vin gh'è domà a la comemorazzion, in ocasion de la Pesach, ma domà quei che se senten ciamad del Signor poden toeu i element.