Fiducia supplicans

Quest articol chì l'è scrivud in lombard, con la Noeuva Ortografia Lombarda

Fiducia supplicans a l'è una deciarazzion in su la dotrina catolega dada foeura del dicaster per la Dotrina de la Fed con l'aprovazzion del Papa Franzesch el 18 de dicember del 2023 che, in del lassà ferma la dotrina catolega in sul matrimoni, che l'è domà in tra om e dona e che l'è l'unegh sit indova che l'è giust havégh di relazzion sessuai, ghe permet ai pret e ai diacon de dà una benedizzion ai relazzion irregolar, o ben quei situazzion monogame fade su de un ligam de afet che inn minga dent del matrimoni, compagne di convivenze, di matrimoni de quei che hann divorziad e di relazzion omosessuai, a pat che fàll el permet de respetà el volé de Dio, e che 'l sia ciar che l'è no un sacrament o un rit, donca senza nissuna cerimonia aposta.

A l'è la prima deciarazzion dada foeura del dicaster de Dominus Iesus, del 2000, indova che se se slargava la dotrina catolega che la Gesa catolega a l'è la vera gesa fada su del Gesù Crist.

Reazzion

Quella deciarazzion chi l'ha vist varie reazzion, soratut positive in di ram pussee progressista de la Gesa e negative in quei pussee conservador.

El vescov de Anversa Johan Bonny el s'è did a favor e i ha vist 'me prim pass per el matrimoni sacramental omosessual catolegh, e in Belgi i cobie omosessuai eren sgiamò benedide de la Gesa. El gesuita american James Martin l'ha parlad de "un gran pass inanz in del ministeri catolegh vers i LGBT+" e 'l dì adree l'ha dad la soa benedizzion a una cobia gay.

L'arcivescov de Astana Tomasz Peta e 'l so ausiliari Athanasius Schneider l'hann condanada, a dì che la va contra la rivelazzion divina e dumila agn de pratega catolega che l'è andada inanz senza interruzzion e gh'hann proibid ai so pret de fà 'sti benedizzion chi. Istess hann fad i vescov del Malawi, del Zambia e de la Namibia, anca per schivà de violà la lesg local contra l'omosessualità. Di criteghe inn rivade anca de foeura del catolicesim: el Franklin Graham e 'l Albert Mohler, famos pastor evangelegh, s'inn s'cerad contra.

La conferenza di vescov di Stat Unid l'ha volud meter in ciar che l'è no un cambi de la dotrina e che se trata no de un sacrament, e istess l'ha fad quella canadesa. El vesch danes Czeslaw Kozon l'ha did che l'è no un problema la deciarazzion ma quell che l'è stada la ricezzion e la reazzion de la sgent, el president de la conferenza di vescov del Ghana l'ha did che "la sgent l'ha capid no che benedissom i persone e no l'union".

La Gesa gregh-catolega ucraina l'ha sostegnud che quella roba chi la val domà per la gesa latina e che donca ghe interessa no.

Riferiment

Ligam de foeura

Test de la deciarazzion (in italian)