Monestee de Bagg

Quest articol chì l'è scrivuu in lombard, grafia milanesa.

El Monestee (localment: Monastee; Cascina Monastero in italian) l'è on vegg monastee de Bagg, incoeu sed di Ghisa e del Consej del Municipi 7. L'è arent a la scoeura elementara "Carla Fracci", in precedenza "Zima-Garibaldi", e l'è in de la via Anselm de Bagg, via che quij de Bagg ciamen "Via de l'Istruzion" perchè gh'è trè scoeur: 'na scoeula primaria, 'n asili e 'n asili di fiolitt che prumma l'era scoeula media.

Storia

Faa su del Balzarin Pusterla, parent di Viscont, a l'è donaa ai Olivetan intorna ai 1400, che 'l consacren 'me "Monestee de Santa Maria de Bagg". Bagg l'era staa scernuu perchè l'è arent a Milan e protegiuu del Castell de Cusagh, arent a Bagg, oltra che per el bon numer di possediment del Pusterla in la zona. L'è staa onoraa del Balzarin che 'l scerniss de vessegh sotteraa.

In di agn, el Monestee el devegn important e i vilan ghe fan su i sò cà linscì, e ricchissen el sò patrimòni. El deventa donca 'n compless formaa de 'na cort agricola, dò cort saraa, el Monestee, 'na filanda, 'na Gesa e 'na giazzaia.

La desconsacrazion

In tra el 1773 e 'l 1775 a l'è soppressa e giontada al Monestee de San Vitor: I locai resten sconsacraa e hinn doperaa per l'agricoltura, che resisten finna ai mità del 1900, de che 'l deriva el nomm italian. La pupart di edifizzi a hinn staa demolii intorna al 1960 per permett la costruzion de Piazza Anita Garibaldi e 'l restaver de la cassina.

In del 1964 a l'è recuverada 'me sed de la Zona 18 e gh'hinn staa di mestee de restaver: In del frattemp a l'è faa su el parch de Bagg in la zona arenta. Finna al 1963 l'ha ospitaa anca la Biblioteca de Bagg, che poeu a l'è stada spostada in d'on edifizzi noeuv faa su del Fabi Mell.

In del 1980 a l'è descovert on tunnel de conligament in tra el Castell de Cusagh e la Badia de Santa Maria Rossa in Cusagh, donada del Bernabò Viscont ai religios: Di ducument e di personn sostegnen che 'l tunnel el rivass finna al Monestee, e che 'l fuss staa doperaa anca de la Resistenza italiana 'me canton per scond i monizion.

In del 2002 a l'è restaveraa el primm pian e in del 2005 anca la Sala del Cerimonial, la pussee granda e doperada per i cerimoni.