Nomograma de l'Herlofson
(Rimandad de Diagramma de l'Herlofson)
El nomograma del'Herlofson a l’è vun infra i quatter diagrama tèrmodinamich (insèma al diagrama del Stüve, l'emagrama e al tefigrama) doperàa per analizzàa la struttura tèrmica de l’atmosfera terrèstra e per fa i prevision meteorologich.(i diagrama fàa su a quèl fin chì hinn anca ciamàa diagrama aerològich[1]).
El sò uso a l’è fondamental in meteorologia perché per mèzz del nomograma del’Herlofson a se pò trà foeura l’umidità specifega effettiva e de saturazion, l’umidità relativa e ‘l livèll de condensa.
A l’è on diagrama che ‘l gh’ha tanti curv:
- Linej isòbar: la pression atmosferega l’è rappresentada in su l’ass vertical in scala logaritmica, i linej isobar hinn orizzontaj;
- Linej isotermi: la temperadura a l’è rappresentada in su l’ass orizzontal in scala linear; i linej isotérmi hinn inclinàd vèrs dèstra;
- Linej isoigrometrich: i linej isoigrometrich hinn on poo inclinàd vèrs destra;
- Linej adiabategh sècch: i linej che rappresenten i trasformazion termodinamich adiabategh sècch (o ben senza scambi de calor e senza condensa del vapor de l’acqua) hinn inclinàa vèrs sinistra;
- Linej adiabategh satur: i linej che rappresenten i trasformazion termodinamich adiabategh satur (o ben senza scambi de calor con l’ambient de foeura, ma con scambi de calor sconduu per via de la condensa ) hinn un poo curv e tenden a sinistra ma men di adiabategh sècch.[2]
In sul diagramma del’Herlofson poden vèss rappresentàa i dati del stat vertical de la troposfera misuràa per mèzz del radio-sondagg, oppur prevìst per via di modèj meteorologich:
- la curva de stat ( che la designa come la temperadura la varia in fuzione de la pression - o ben de la quòta che a lee l’è conligada);
- la temperadura de rosada (variazion de la temperadura de rosada con la quòta);
- la curva che la rappresenta i variazion de temperadura che ona bolla d’aria in salida la gh’avarìa.
Vos correlaa
[Modifega | modifica 'l sorgent]Ligamm de foeura
[Modifega | modifica 'l sorgent]- Nomogramma di Herloffson in Corso basico di meteorologia
Riferiment
[Modifega | modifica 'l sorgent]- ↑ Mario Giuliacci (2010). Manuale di meteorologia (in italian). Alpha Test, 282. ISBN 88-483-1168-7.
- ↑ Mario Giuliacci (2010). Manuale di meteorologia (in italian). Alpha Test, 284–289. ISBN 88-483-1168-7.