Corresg

Quest articol chì l'è scrivud in lombard, con la Noeuva Ortografia Lombarda

Correggio Comun
Dats aministrativ
Stat	Itàlia
Rejon	Emìlia-Romàgna
Provinça	Provincia de Resg
Politega
Sindeg
Orgen lejislativ	Consili comunal
Territore
Coordinade	44°46′18″N 10°46′50″E
OSM	43563
Voltituden	33 m s.l.m
Superfix	77,51 km²
Abitants	25 664 ab. (1º genar 2018)
Densitaa	331.11 ab./km²
Confin	Campagnola Emilia, Rio Saliceto, Carpi, Bagnolo in Piano, Campogalliano, Novellara, San Martino in Rio e Reggio Emilia
Fus orari	UTC+01:00 e UTC+02:00
Varie
Prefiss	0522
Codex postal	42015
Sigla autom.	RE
Codex ISTAT	035020
Codex catastal	D037
Cl. climatega
Cl. sismega
Localizazion
Sit istituzional

Corresg (in de la parlada local: Curèz, in italian: Correggio) l'è 'n comun de la provincia de Resg, in Emilia-Romagna. Ghe viven pressapoch in 20'596 e 'l gh'ha 'na superfiss de 77 km², per 'na densità de 267 ab./km². El confina coi comun Bagnolo in Piano, Campagnola Emilia, Campogalliano (MO), Carpi (MO), Novellara, Resg, Rio Saliceto e San Martino in Rio.

A longh segond comun de la soa provincia, a l'è incoeu el comun pussee popolad de l'Union Pianura Resgiana e, in general, center pussee grand del so circondari.

Storia

	«In Lombardia, ciamada di storegh paradis d'Italia, a gh'è Corresg, ciamada di scritor Castell: fada su 'me cità del Ferdinand Imperator l'ann 1559 el 16 de masg e confermada del Massimilian Segond con piena autorità de bater monede d'or e de arsgent.»
	(Della origine, et de' fatti delle famiglie illustri d'Italia, 1582)

El nom el vegn minga de la vesina Resg ma del latin corrigia, del che el vegn anca el lombard corrensgia, a parlà de 'na banda de terra in tra el paltan. La sgent la ghe viveva sgiamò al temp di Zelt, ma 'me comun el nass intorna al temp di Lombard antigh. L'è tirada a man per la prima voeulta in del 946 e la se desvilupa in la cità 'na signoria, che la resta in pè de l'ann 1000 al 1635. In del 1559 l'imperator Ferdinand I d'Asborgh el fa de Corresg 'na cità, a dàgh el dirit de bater moneda e de tegnì 'n register nobil. In del 1616, cont el pagà de 'na gran zifra, el deventa un prenzipad, ma la roba la dura poch quand che el Sir de Corresg a l'è acusad de bater moneda falsa e ghe caven el territori in del 1635 e, in del 1641, el tachen al Ducad de Modena e Resg, e ghe starà adree al so destin fina a la conquista savojarda e al fà su de l'Italia, che i met in la noeuva Emilia.

In del 1886 l'è verta la Ferrovia Carp-Bagnoeul, che 'l conliga el center a Resg, e fina al 1887 el resta capolinia. 'Sta ferrovia chi l'è serrada in del 1955.

La cità la resta in man al bloch liberal fina al 1920, ma poeu i socialista vincen i elezzion e in del midem ann tachen di violenze fassiste in la cità, che menarann poeu la ministrazzion ai dimission. Impunemanch, i violenze contra i opositor del regim vann inanz e gh'è stad anca vari mazzament de antifassista.

In di agn '40 a l'è regordada per i azzion de la Leonarda Cianciulli, che la mazzava i sgent e ghe faseva el savon. Dopo de la Liberazzion ghe dann la medaja al valor militar per i sacrifizzi di so sgent per liberàss di fassista.

Pussee inanz, el sarà cognossud per i so ughe, doperade per fà el Lambrusch e per vesser la cità che inn nassud el Marco e 'l Luciano Ligabue.

Roba de vedé

• Palazzi Comunal, el municipi de la cità
• Correggio art home, musee de ducumentazzion del Corresg
• Basilega de San Quirin, ciamada "el Dom"
• Gesa de San Franzesch (Corresg)
• Gesa de San Sebastian
• Palazz di Prinzep, ghe viveven i Prenzip de Corresg e incoeu el gh'è el Musee el Corresg
• Teater Asioeul, teater in pè del 1400

Frazzion

Bodri

Bodri (Bódri in emilian, Budrio in italian) a l'è 'na borgada sgiamò tirada a man in l'Alta Età de Mez, cont el so castell. La soa gesa parochial, dedicada al San Peder, a l'è tirada a man in del tricent e l'è fada su 'me che l'è al dì d'incoeu in tra el 1743 e 'l 1762, forsi in su proget del Francesco Cipriano Forti. A gh'è una riserveta natural, o ben 'n spegget d'aqua cont una maggia de natura, che ghe viven vari pess e usei.

Fazan

Fazan (Fazân in emilian, Fazzano in italian) l'è tirada a man in del secol quell de des, in di domini del convent resgian de San Prosper, la passa ai De Corresg in del 1407. A gh'è una gesa dedicada al San Donin, cont overe di secoi XVIII-XIX, fornida in del secol quell de XIX.

Canel

Canel (Cànel in emilian, Canolo in italian) la se troeuva in di ducument del 935 e in del Liber focorum del 1315 l'era tirada a man 'me comun resgian. L'è stad poeu un feud e castell de la familia Lov, e anca incoeu resten i vegge fortifegazzion, almen in toch. La gh'è anca 'na capella dedicada al San Paol.

Fossdond

Fossdond' (Fosdònd in emilian, Fosdondo in italian), tirad a man in del secol quell de des, a l'è stad prima in di domini di Canossa e poeu di De Corresg e gh'era 'na piev e du castei. Incoeu la gh'è la Gesa de l'Ascension, fada su in del secol quell de voeundes e in stil romanegh.

Lemizzon

Lemizzon (Almisòun in emilian, Lemizzone in italian) a l'è tirada a man in del 1311 di Statut de Resg e la ciapa el nom del nom de persona lombard antigh Lamizo. Part de San Martin Grand fina al 1802, l'è poeu tacada a Corresg.

A gh'è una Gesa del 1300 dedicada al San Giovann Batista, fada su ancamò in di agn 1850 del Pietro Marchelli. El dedent, comunque, el resta assee vesin a quell del XVII e XVIII secol soratut coi quader.

Mandri

Mandri (Mândri in emilian, Mandrio in italian) a l'era bell che cognossud sgiamò al temp di lombard antigh, a l'era part de la veggia zona de Centum juges. Lilinscì la gh'è la Gesa de San Salvator, cognossuda del secol quell de dodes e fada su ancamò in di secol XVII e XVIII, ma el che aspet del dì d'incoeu el vegn di lavorà del 1928. A gh'è la cà del Dorando Pietri, ator che l'ha tolt part ai Olimpiadi a Londra del 1908.

Manderioeul

Mandrioeul (Manderiōl in emilian, Mandriolo in italian), l'era ciamad un temp Val Putrida e l'è tirad a man prima de l'ann milla, cont el so antigh castell e la capella. La Gesa de la Nonziazzion a l'è stada fada su ancamò in tra el 1754 e 'l 1756, forsi in su proget del Francesco Cipriano Forti. La gh'ha dent varie robe del secol XVI - XIX.

Pré

Pré (Prê in emilian, Prato in italian) l'è abitad di temp de l'età del bronz, intorna a l'ann milla a l'è tirada a man per una piev e 'n castell. Del 1300 al 1800 l'era part de San Martin Grand.

A gh'è una gesa dedicada a San Sgemian, fada su ancamò in stil baroch in del 1664, con varia roba dent di secoi XVII e XVIII.

Stema

Stema de Corresg
Blasonadura
D'azur, al sol d'or, circondad de 'na corrensgia con fibia, del midem

El stema, aprovad con decret del capo del governo Benito Mussolini el 29 de november 1928, el gh'ha un sol, che l'è simbol de la scioraria e la prosperità del sit, e 'na corrensgia, che la reciama el nom latin de la cità. A l'è anca inquartad in del stema de la provincia de Resg.

Quand che l'era un prenzipad deperlu el stema l'era compagn ai color de la bandera de l'Austria, pussee vari caregh e inquartadure: el Sol cont el dedree d'azur comunque el gh'è anca in di vegg stema d'epoca del comun e anca in quell de la familia di Bis.

• 

  Stema di Corresg fina al 1452

• 

  Stema fina al 1580

• 

  Stema fina al 1616

• 

  Stema dopo del 1616

• 

  Un taller de fin 1500, se nota l'aquila imperial e la corrensgia

Riferiment

• Stemma del Comune di Correggio
• Araldicacivica

Ligam de foeura

• Sit ofizzial

Alter proget

Altri progetti

• Wikiquote
• Wikimedia Commons
• Wikivoyage

• Wikiquote el gh'ha dent citazzion de o su Correggio
• Wikimedia Commons el gh'ha dent imagin o alter archivi su Correggio
• Wikivoyage el gh'ha dent Informazzion turisteghe su Correggio

Vos corelade

• De Corresg