Bodhisattva
|
Quest articol chì l'è scrivud in lombard, con la Noeuva Ortografia Lombarda |
In del buddhesim, un bodhisattva (sanscret: बोधिसत्त्व) l’è una creadura in sul senter de l’inluminazzion, o de la buddhità.[1]
In di scœule buddhiste antighe, inscì coma ancamò in del buddhesim theravāda, la parolla ‘bodhisattva’ l’insegna vergun che l’ha tolt la decision de vegnì un buddha, e che el gh’è stait confermad de un buddha vivent che i sò sforz indarann a prodù i frut desiderad.[2]
In del buddhesim mahāyāna, un bodhisattva l’è chissessia che l’haiva insgenerad la bodhicitta – la ment concentrada in sul gagnament de l’inluminazzion – e che el vœula menà tute i creadure senziente a inluminàss.[3] In quella tradizzion chì, i bodhisattva inn l’equivalent spiritual de dei eroj che, inzigad de la sò compassion, i inn dree a dàss de fà per dessedàss. Quii vesser chì incarnen di sossenn importante qualità spirituai, compagne di brahmavihāras (i inscì-ciamade ‘quater baite divine’), o ben la maitrī (benevolenza), la karuṇā (compassion), la muditā (sgioja per i olter) e upekṣā (equanimità). A quei virtù chì a ghe andariss anca sgiontad i ‘perfezzionament del bodhisattva’ (pāramitā), soratut ol prajñāpāramitā, la cognossenza tranzendental.[4][5][6]
In del theravāda, un bodhisattva l’è vist coma un individov pussee unegh che rar. Nomà un cicinin de persone inn bone de deventà di bodhisattva, compagn, per esempi, del Maitreya. Inscambi, in del mahāyāna, sgeneralment l’ideja l’è quella che ol senter del bodhisattva l’è vert a tucc, e i mahāyāni midem inzighen tucc a vegnì di bodhisattva.[7][8] Di bodhisattva particolarment ispiritualment desvilupad – compagn de l’Avalokiteśvara, del Maitreya, e del Mañjuśrī – vegnen propri venerad in del mahāyāna, e la sgent la cred che i posseden di grand podé che dœuvren per vutà tute i creadure vivente.[9]
Ligam dedenter[Modifega | modifica 'l sorgent]
Ligam de fœura[Modifega | modifica 'l sorgent]
Wikiquote el gh'ha dent citazzion de o su Bodhisattva
Wikimedia Commons el gh'ha dent imagin o alter archivi su Bodhisattva- (EN) Concet del bodhisattva
Referenze[Modifega | modifica 'l sorgent]
- ↑ Skilling, Peter (2021). Questioning the Buddha: A Selection of Twenty-Five Sutras, Introduction, Simon and Schuster.
- ↑ Drewes, David, Mahāyāna Sūtras and Opening of the Bodhisattva Path, Paper presented at the XVIII the IABS Congress, Toronto 2017, Updated 2019.
- ↑ The Bodhisattva Vow: A Practical Guide to Helping Others, page 1, Tharpa Publications (2nd. ed., 1995), ISBN 978-0-948006-50-0.
- ↑ Flanagan, Owen (2011-08-12). The Bodhisattva's Brain: Buddhism Naturalized (in en). MIT Press, 107. ISBN 978-0-262-29723-3.
- ↑ Pye, Michael (1978). Skillful Means – A concept in Mahayana Buddhism. London: Gerald Duckworth & Co. Ltd. ISBN 0-7156-1266-2.
- ↑ Williams, Paul (2008). Mahayana Buddhism: The Doctrinal Foundations, pp. 50–51. Routledge.
- ↑ Samuels, Jeffrey (July 1997). "The Bodhisattva Ideal in Theravāda Buddhist Theory and Practice: A Reevaluation of the Bodhisattva-Śrāvaka Opposition". Philosophy East and West 47 (3): 399–415. University of Hawai'i Press. DOI:10.2307/1399912.
- ↑ Skorupski, Tadeusz. The Historical Spectrum of the Bodhisattva Ideal. The Middle Way. Journal of the Buddhist Society. August 2000. Vol. 75, No.2, 95–106.
- ↑ Williams 2008, pp. 220–221