Assolombarda

Quest articol chì l'è scrivud in lombard, con la Noeuva Ortografia Lombarda

Assolombarda l’è l'associazzion di industriai de la cità metropolitana de la Milan e di province de Lod, Monscia e Brianza e Pavia. Per grandezza e rapresentatività a l’è l'associazzion pussee importanta de tut el sistema Confindustria.

Storia

I prim indizzi de la nascita de l'associazzion se treouven in del 1890, quand che nassen in Lombardia i prime associazzion de imprenditor e industriai che lavoraven in quella zona là. La prima che l’è nassuda l’è la Federazzion di Industriai de Monscia, e poeu dopo adree, in del 1898 el Consorzi di industriai mecanich e metallurgich de Milan. A l'è del 1903 l'Associazzion Comerciant Botegar e Industriai de Milano e del 1908 la Lega Industrial, inveci in del 1910 la nass la Federazzion Comercial Industrial.

In del sgener del 1919 l’è trada insema la Federazzion Industrial Lombarda, che gh'ha denter la pussee part di associazzion del territori de la provincia de Milan. L'organizazzion de la Federazzion el muda in del 1934, adree a la lesg che l’istituiss i corporazzion: la federazzion de Milan, donca, la diventa voeuna di 82 union provinciai.

L'Associazzion Industrial Lombarda, poeu Assolombarda, l’è fada su el 25 de sgiugn del 1945 sota la guida del comissari straordinari Giovanni Falck, cont el fin de fà repihà l'economia territorial in del temp dificil dopo la guerra. L’associazzion la se stabiliss a Milan in del Palazz Casati Stampa, in via Turin: nonistant l’agetiv “lombarda” (ligada al roll ciav di Azzalarie Falck, che eren conossude propi come "azzalarie lombarde") né fann part domà di aziende del territori del provincia de Milan.

Decenni dopo decenni l'associazzion l’è rivada a esprimer e tutelà i interess de pussee de 6.000 imprese de ogni grandezza: picole, medie e grande, nazzionai e internazzionai, che produsen di ben e di servizi in tanti setor merceologich. La gh’ha lì adree a 320.000 adet a livell local e di alter centene di mijara in del rest d’Italia. L'associazzion la tutela i interess di imprese associade in del raport coi alter interlocotor ativ in ambient come i istituzzion, la formazzion, l'ambient, el territorio, la cultura, l'economia, el lavor, la socetà civil. La ofriss ancasì di servizzi di consulenza specialistica in tut i setori de interess per i aziende.

El 29 de setember del 2015 el Gianfelice Rocca, che l’era president de Assolombarda, e l’Andrea Dell'Orto, president de Confindustria Monza e Brianza hann sotoscrivud l'at de fusion per incorporazzion intra i dò associazzion, e inscì gh’hann dad vita a l'Assolombarda Confindustria Milano Monza e Brianza Lodi. In del 2020, sota la presidenza del Carlo Bonomi, l’è ancasì avegnuda la fusion a tirà denter el territori de Pavia.

La sede principal è situada al numer civich 9 de via Pantano a Milan, a 200 meter de Piazza del Dom. El presidi territorial de Monscia e Brianza el gh’ha sede in via Petrarca 10 a Monscia, quell di Lod l’è situad in via Haussmann 11/I e quell de Pavia l’è in via Bernardino da Feltre 6.

President de Assolombarda

• 1946: Giovanni Falck
• 1946 - 1955: Alighiero De Micheli
• 1955 - 1961: Furio Cicogna
• 1961 - 1971: Emanuele Dubini
• 1971 - 1977: Giuseppe Pellicanò
• 1977 - 1980: Alberto Redaelli
• 1980 - 1985: Antonio Coppi
• 1985 - 1991: Ottorino Beltrami
• 1991 - 1997: Ennio Presutti
• 1997 - 2001: Benito Benedini
• 2001 - 2005: Michele Perini
• 2005 - 2009: Diana Bracco
• 2009 - 2013: Alberto Meomartini
• 2013 - 2017: Gianfelice Rocca
• 2017 - 2020: Carlo Bonomi
• 2020 - : Alessandro Spada