Puja

Spartida in una cità metropolitana e in cinch province, la confina a Nord cont el Molis, a Ovest con la Campania e la Basilicada, per el rest l'è bagnada del mar. L'è anca la region pussee orientala d'Italia: el Capo d'Otranto l'è el pont pussee a est del Paes.

Geografia

L'è la region pussee granda de la Bassitalia e con pussee longhezza di coste, che per la pupart se po fà el bagn.

A l'è una region indova che pianura e colline se messeden e l'è rari vedé montagne volte: el Tavoler di Puje a l'è la pianura pussee granda de la Penisola italiana e la segonda d'Italia, dopo de la Pianura Padana.

Pussee de precis, l'è pianura al 53%, collina al 45% e montagna domà al 2%: l'è donca la region men montagnera d'Italia. L'è anca ben succ, roba che la mena a poch rial e fium che corren in superfiss: la gh'hà di lagh coster, spartid del Mar Adriategh de mur de sabia.

Storia

El nom de la region el vegn del latin Apulia, che 'l vegniva de vun di popoi che ghe viveven: i roman hann poeu fad su la Regio II Apulia et Calabria, un poo pussee larga de la region de adess: in l'età de Mez, tant 'me per Lombardia, Puja l'era rivad a volé dì tuta la Bassitalia.

Dopo la toma de l'Imperi roman d'Ocident el territori l'ha vist vari governi: i lombard, i normand e anca i bizantin, l'è finid infina sota el Regn de Napoli e gh'è stad adree al so destin fina a l'unità d'Italia.

Cultura

Lengov e dialet

La lengua ofizziala de la Puja l'è l'italian. In del Nord de la region se parlen dialet de la lengua napolitana, menter in del Salent se parla di dialet compagn del sicilian: el dialet tarantin, in del vesser comunque meridional, el fa de transizzion in tra i du sistema.

Gh'è anca una minoranza che la parla gregh.

Cusina

La cusina pujesa l'è ben sciora e cognossuda in tuta Italia e anca foeura: mangià tant 'me i tarai, la pasta a l'assassina, i panzerot e i cartellate inn esempi de la cusina pujesa, ma gh'è anca di specialità propi locai, tant 'me el bescot de Ceglie.