Stratocumulus castellanus

Quest articol chì l'è scrivuu in lombard, grafia milanesa.

Stratocumulus castellanus

El stratocumulus castellanus (abbreviadura Sc cas) a l’è ‘na nivola del gener stratocumulus con di crescénz che gh’hànn la forma de torrètt che gh’è dànn a sti nìvol chì on aspètt merlàa (di quàj el ne sortìss foeura el nòmm castellanus dàagh a la specie). Quèj tor piscinìnn — che quanivuna de lor la pò vèss alta pussée che larga — gh’hànn ‘na base comun de indoe se tiren su; el fenòmen el par assosénn evident quand che i nivol hinn vardàd de fianch.

Caratteristich

I stratocumul se formen a i livèj de bass de la troposfera denter ind on strat relativament suttil de aria instabil, che de tutt i maner la gh’hà sora de lee on strato de aria pussée stabil. E quèst'ultim strat chì el blòcca de fàtt el svilupp vertical di nìvol convettiv compagn di cumul o di cumulonemb. I stratocumul, per quèst, quand ch' hann raggiùnt on livèll de aria stàbil, tenden a slargàss foeura de fianch a fa su di banch de nìvol persisten anca dopò che i nìvol convettiv a s'hinn mangiàd foeura..

El stratocumulus castellanus a l’è caratterizzàa de ‘na fòrta attività convettiva per via de la presenza de aria instabil. El pò vèss distint di alter tipi de stratocumul pròppi grazie a la formazion di torrètt caratteristich ind la part de sora del strat, che se formen in di zòn indoe el strat inibitór superior a l’è pussèe sottil e manc marcàa. El pò vèss compagn del cumulus congestus, cont el quàl, di vòlt, el ven confonduu. In chèsschì, de tutt i maner, i torrètt se sviluppen sora di nivol isolàd in deperlór; in del caso del stratocumulus castellanus inveci la formazion di torrètt la càpita ind on strat ben definìi. I precipitazion occasionari associàd cont i stratocumulus castellanus hinn minga de sòlit inscì fòrt compagn che in del caso del cumulus congestus.